Промовирано првото истражување за мониторинг на работата на Агенијата за млади и спорт

Младински образовен форум денес го промовираше истражувањето „Мониторинг и унапредување на работата на Агенцијата за млади и спорт“ со фокус на Агенцијата како носител на креирањето и спроведување на младинските политики. На настанот говореа:  Сафет Незири од Министерството за образование и наука, Младен Фрчковски од Минстерството за труд и социјална политика, Матеј Маневски од Центар за интеркултурен дијалог, Горан Ѓорѓиев од Сојуз на извидници на Македонија, Гордана Цекова од АМС, Мартина Илиевска и Александра Филипова од МОФ.

 

Според истражувањето за перидот 2014-2016г, соработката помеѓу Агенцијата за млади и спорт (АМС) и другите институции била на ниско ниво. Имало малку заеднички проекти и нема уредна документација за активностите. Агенцијата имала константна соработка единствено со МОН и одредена соработка со МИОА, АВРМ и Министерството за култура. Со Министерството за локална самоуправа немало соработка, додека Агенцијата за администрација и МТСП не располагале со информации за соработка со АМС.

 

Соработката со младинските организации била посебно слаба. Во минатите години агенцијата делувала сегрегирачки кон младинските органзации и соработувала само со малку од нив. Од 2014 до 2016 Агенцијата имала потпишано само 11 меморандуми со 6 организации што е мал број за период од три години. Односот на агенцијата кон младите и општата јавност придонел да биде перцепирана како „агенција за спорт“ која ги исклучува младите од своето делување.

 

Правна рамка за млади речиси и да не постои. Освен Националната стратегија за млади, нема правен акт ги уредува прашањата во областа „млади“. Креирање на Закон за млади или Закон за младинско учество е клучно за да регулираат правните празнини, а Агенцијата да добие јасни насоки за да може успешно да ги исполнува своите цели и приоритети.

Според препораките на истражувањето Агенцијата треба да го зајакне секторот млади, да ја ревидира стратегијата за млади и да започне квалитетен процес за креирање на акциски план за млади за 2018-2019. Агенцијата треба воспостави и модели за поддршка на младинските организации.

 

Истражувањето е реализирано во периодот јуни 2017 – јануари 2018, со фокус на соработка со младински организации, соработка со државни институции, правна рамка, внатрешно уредување и работење и перцепцијата на младинските организации и младите.

 

Проектот „Мониторинг и унапредување на работата на Агенцијата за млади и спорт“ е реализиран од страна на Младински образовен форум во периодот од јуни 2017 до јануари 2018 година. Проектот е поддржан од проектот “Граѓанска алијанса за транспарентност – Набљудување на процесот на реформи на јавната администрација од страна на граѓанските организации”, имплементиран од “Фондација Отворено општество – Македонија” (ФООМ) и “ЕВРОТИНК – Центар за европски стратегии”, и е финансиски поддржан од Европската унија во рамки на IPA Civil Society Facility and Media Programme 2015.

Аргумент 2015 – Овој дом верува дека меѓупартиските преговори (не) водат до излез од кризата

Mладински образовен форум (МОФ) со задоволство Ве поканува на седмотото издание на јавниот дебатен настан АРГУМЕНТ: ОРГАНИЗИРАНО ИЗРАЗУВАЊЕ.

Настанот ќе се одржи на 16-ти декември (среда) 2015 година, со почеток во 19:00 часот, во Кино Милениум, во Скопје.

АРГУМЕНТ: ОРГАНИЗИРАНО ИЗРАЗУВАЊЕ

е целовечерен дебатен настан чија цел e да ја подобри културата на дијалог и структурата на говорeње во јавниот дискурс и да ја промовира аргументацијата како неопходен услов за продуктивна дискусија. И оваа година ветуваме квалитетна дебата на актуелна општествено-политичка тема, прецизно структурирана и организирана на начин кој ќе овозможи фер дискусија на говорниците на дебатата и на присутната публика.

Тезата на коja заеднички и организирано ќе дискутираме гласи:

ОВОЈ ДОМ ВЕРУВА ДЕКА МЕЃУПАРТИСКИТЕ ПРЕГОВОРИ (НЕ) ВОДАТ ДО ИЗЛЕЗ ОД КРИЗАТА
Афирмативен тим [тим кој ја поддржува тезата]:
Бујар Османи, Фросина Ременски, Петрит Сарачини;

Негациски тим [тим кој ја оспорува тезата]:
Лилјана Поповска, Гордан Калајџиев, Миша Поповиќ;

Модератор:
Огнен Јанески

На дебатата ќе разговараме за три клучни области:
I. Како ќе влијаат преговорите на демократијата во Македонија?
II. Дали преговорите се доволно инклузивни?
III. Какви други механизми се потребни за да се излезе од кризата? Дали има други фактори независни од преговорите кои ќе влијаат на надминување на кризата?

За да можете да присуствувате на настанот, Ве молиме да се регистрирате на следниот линк. Крајниот рок за регистрација е 14ти декември, понеделник, во 12 часот.

 

Видео записите од претходните изданија на Аргумент се достапни на:

Аргумент 2014 – Овој Дом би си заминал од Македонија засекогаш

Аргумент 2013 – Овој Дом (не) би гласал на избори  

Аргумент 2012 – Овој дом верува дека религијата (не) го унапредува општеството 

Аргумент 2011 – Овој дом верува дека во Македонија постои доволно дебата за развој на демократијата

Аргумент 2010 – Oвој дом верува дека проектот Скопје 2014 (не) го унапредува македонското општество

Настанот Аргумент:Организирано изразување е организиран од Младински образовен форум со поддршка од Проектот на УСАИД за граѓанско општество.

Конференција Дијалог и демократија – Магна Карта денес

Hа 11ти декември 2015 година (петок) во Младински културен центар (МКЦ) – Скопје со почеток од 10:00 часот ќе се одржи конференцијата „Дијалог и демократија – Магна Карта денес“. На конференцијата ќе се дискутира за вредностите на оваа повелба и нејзиното значење за човековите права и слободи во современиот свет и досегашниот развој на демократијата.

Ова е финалниот настан после конкурсот за средношколци за есеи на тема „Магна Карта“ кој траеше до 20-ти ноември, 2015 година. Сертификатите на победниците во секоја од трите категории ќе им бидат врачени од страна на Британскиот амбасадор во Македонија, Чарлс Гарет. Тие ќе прочитаат извадок од својот есеј, по што по секој прочитан извадок ќе следува панел од тројца говорници на темата.

На оваа конференција ќе има три панел-дискусии модерирани од Ана Јовковска:

Панел 1 – Историја и влијанието на Магна Карта врз уставноста во светот

Мишо Докмановиќ, Професор на Правен факултет Јустинијан I

Маја Вељанова, Претседателка на ЕЛСА

Константин Битраков, дипломиран правник

 

 

 

Панел 2 –Независно правосудство како предуслов за владеење на правото

Ива Михајловска, Канцеларија на Народен правобранител

Гоце Коцевски, Проектен координатор во Македонско здружени на млади правници (МЗМП)

Мерсиха Смаиловиќ, раководителка на хуманитарната организација „Легис

 

Панел 3 –Демократијата денес и улогата на Магна Карта во нејзиниот развој

Андреја Стојковски, Претседател на Македонски центар за европско образование (МЦЕО)

Јован Близнаковски, Програмски директор на Институт за демократија Социетас Цивилис (ИДСЦ)

Доан Сулејманоски, Предавач во Учиме право програмата на МОФ

 

Вашето учество може да го најавите на https://docs.google.com/forms/d/1ZqnQWd5f2CUPDjHvpwMl-R0Zve9zHurenqPTMQxX5Jc/viewform?usp=send_form

 

Агенда:

09:30 – 10:00 Регистрација на гости и учесници
10:00 – 11:00 Обраќање на Британскиот амбасадор во Македонија, Чарлс Гaрет
Поздравно обраќање од МОФ
Доделување на сертификати и награди на победниците од секоја категорија
11:00 – 12:00 Читање на извадок од победничкиот есеј во категоријата: „Влијанието на Магна Карта врз уставноста во светот“
Панел 1 – Историјата и влијанието на Магна Карта врз уставноста во светот
Мишо Докмановиќ, Константин Битраков, Маја Вељанова
12:00 – 12:30 Пауза за кафе
12:30 – 13:30 Читање на извадок од победничкиот есеј во категоријата: „Независно правосудство како предуслов за владеење на правото“
Панел 2 – Независно правосудство како предуслов за владеење на правото
Ива Михајловска, Гоце Коцевски, Мерсиха Смаиловиќ
13:30 – 14:00 Пауза за кафе
14:00 – 15:00 Читање на извадок од победничкиот есеј од категоријата „Улогата на Магна Карта во развојот на демократијата“
Панел 3 – Демократијата денес и улогата на Магна Карта во нејзиниот развој
Андреја Стојковски, Јован Близнаковски, Доан Сулејманоски
15:30 Доделување на сертификати на сите пријавени на конкурсот за есеи и затворање на конференцијата

 

Тренинг за студентски права

Студенти, запознајте се со своите права и обврски за време на своите студии.  МОФ организира тренинг за права на студенти, преку кој ќе можете да дознаете повеќе како да се стават студиите во мирување; како да се побара и кој има дозвола на бесплатни студии;  како се заштитуваат личните податоци на студентите; распределување на финансиите од давачката ИИКСА; користење на универзитетскиот простор; како да се спротиставите на корупцијата на вашиот факултет; како и за студентското организирање.

Дополнително, дознајте кои се надлежните институции кои работат во сферата на заштита на правата на студентите како академски граѓани, но и како припадници на општествената сфера.

Предавањата ќе се одржат во периодот од 10 до 18 часот, на 12.12.2015 година (сабота), во просториите на Coffice (ул. Мито Хаџивасилев Јасмин).

 

Студентите учесници ќе слушаат предавања од претставници на:

– Државниот просветен инспекторат
– Државната комисија за спречување корупција
– Дирекција за заштита на лични податоци
– Младинскиот образовен форум

Кандидатите треба да ги исполнуваат следниве услови:

– да се студенти на еден од факултетите на УКИМ
– да имаат интерес за подобрување на состојбата на студентите во Р. Македонија

Сите заинтересирани студенти може да се пријават најдоцна до 10-ти декември (четврток) 2015 год. до 12 часот на пладне, со испраќање на следниве информации:

1. Факултет
2. Година на студии
3. Возраст
4. Контакт телефон
5. Информација дали студентот членува во некоја организација

Информациите се испраќаат на е-маил адресата:policy@mof.org.mk

Бројот на местата е ограничен. Избраните кандидати ќе бидат известени во четврток, 10-ти декември, во попладневните часови. Тренингот ќе се одржи на македонски јазик.

Настанот е поддржан од Проектот на УСАИД за граѓанско општество.

Работна средба: Уредување на средношколското организирање

Финални консултации за предлог препораки

Младински oбразовен форум, Коалиција СЕГА и Прва детска амбасада Меѓаши организираат работна средба за уредување на средношколското организирање, која ќе се одржи на 7 декември (понеделник) 2015 со почеток во 11 часот во хотелот  Хотел Холидеј ин.

Работната средба за Уредување на средношколското организирање ќе биде повеќечасовен настан кој има за цел да ги претстави  добиените препораки од локалните дискусии и националната работилница[1] и да се спроведат финални консултации со важните чинители за предлог препораки за уредување на средношколското организирање. Истата ќе овозможи простор за дискусија околу значењето на организирањето и учеството на средношколците во процесите на одлучување и нивно вклучување во работата на телата кои функционираат во училиштата.

Преземете ги препораките за средношколско организирање тука.

На сребата организаторите ќе презентираат препораки за законско уредување на средношколското организирање учесниците ќе можат да земат збор во првата дискусија и да ја презентираат својата и позицијата на организацијата или институцијата која ја претставуваат. Добиените мислења и препораки се значајни во креирање на финалните препораки кои ќе се достават до надлежните институции.

Во рамките на панел дискусиите и обраќањата на говорниците, ќе се зборува за учеството на средношколците во управувањето, ќе биде образложен досегашниот процес на консултации за уредувањето на средношколското организирање во Македонија и ќе се промовираат добиените порепораки од локалните дискусии и националната работилница и отворат за дискусија                                                                                                                       

На настанот се добредојдени претставници на сите средни училишта, средношколски заедници, институции и организацџии кои би можеле да дадат придонес во процесот на подобрување на средношколското организирање. Вашето учество треба да го најавите на:

martina_ilievska@mof.org.mk

[1] Процесот на консултации со средношколци и претставници на органите на средните училишта (родители, професри, психолози, педагози, претставници на невладини организации) се одржа во месец ноември. Во овој период се одржаа 82 средби во кои учествувааопфатени повеќе од 500 учесници. Од средбите произлегоаа препораки кои беа разработени и сумирани на национална работилница која се одржа во периодот 26-29 ноември во Струга.

Ноемвриски караван на МОФ и Македокс со документарецот „Facing Animals“

Документарниот филм „Facing Animals“ во текот на ноември ќе се прикажува во младинските кино клубови на МОФ и МакеДокс, во 12 градови низ Македонија. Ноемврискиот караван започнува денеска, во 19:00 часот, со проекција во Кратово, во клубот на МОФ (Регионален Центар за одржлив развој, Гоце Делчев, 24)

„Facing Animals“ (Соочување со животните) е триесетминутен холандиски документарен филм во режија на Jan van Ijken и говори за исклучително комплексниот и неретко бизарен однос меѓу животните и луѓето.

„Зошто го тргаме погледот од милионите животни кои се одгледуваат на индустриските фарми додека другите ги галиме и се однесуваме кон нив како да се човечки суштества? Протагонистите во филмот се свињи, кокошки, крави и кучиња, а антагонисти се луѓето. Светот го гледаме од перспектива на животните: пилињата се фрлаат на подвижна лента, жена гали крава на ливада, прасиња квичат додека им ги сечат опашките, кучиња се благословуваат во црква. Шокантни и често спротивставени слики кај гледачите предизвикуваат цела палета на спротивставени емоции. Сепак, како што и самиот режисер истакнува, фимот не е памфлет против индустриското одгледување на животни, туку му е намера да се преиспита односот на луѓето и животните во сите негови контроверзи.“, се наведува во појаснувањето за филмот.

Во продолжение целосниот распоред на проекциите:

06.11 Кратово, 19:00 Регионален Центар за одржлив развој, Гоце Делчев 24
16.11 Струга, Здружение за развој и активизам „АКВА“–Струга, ул: „Климетица“ бр. 8
20.11 Битола, просториите на МКЦ, Цар Самоил 29
20.11 Дебар 12:00, Гимназија
21.11 Тетово 12:00, МОФ Клуб ул. „Јане Сандански“ 50/1
26.11 Велес 17:00, Фондација за локален развој и демократија Фокус, Солунска 2а(спроти Североф)
27.11 Ресен 18:00, простории на Акција Плус – Ресен
30.11 Неготино 19:00,  простории на Центар за Регионален Одржлив Развој (ЦРОР)

Распоредот на проекциите како и новости и дополнителни информации може да најдете на линкот на Фејсбук настанот на Младински филмски клубови.

Консултативна средба за уредување на средношколско организирање

Младински образовен форум – МОФ ве кани на дискусијии за ЗАКОНСКО УРЕДУВАЊЕ НА УЧЕНИЧКОТО УЧЕСТВО ВО ЗАКОНОТ ЗА СРЕДНО ОБРАЗОВАНИЕ, во вторник на 03.10.2015г. во Хотелот City Park.

Средбата за ученици е со почеток од 11:00 часот.
Средбата за професори, педагози, психолози, родители и претставници на невладини организации кои работат со средношколци е со почеток од 14:00 часот.
 
МОФ во соработка со коалицијата СЕГА и Првата детска амбасада Меѓаши спроведува консултации за прибирање на мислења на учениците и претставници на средните училишта и родители за потребата и важноста од регулирање на правото на учество во средното образование. 

Ве каниме да земете учество и да дадете свој придонес во дискусијата за предизвиците и пoтребите на младинското учество и младинското организирање на училишно ниво; можностите за креирање на ученичко организирање и поддршка од институциите во имплементирање на ученичко учество.
Препораките кои ќе произлезат од дискусиите, ќе бидат вклучени во процесот на застапување за подобрување на моменталната состојба.

 
Со цел да се соберат мислења од повеќе засегнати страни ќе се организираат повеќе локални дискусии на територијата на цела Македонија, со млади, средношколци, младински организации, и локални носители на одлуки – од средни училишта и локална самоуправа. По дискусиите ќе следува и Национална работилница – на која ќе учествуваат млади на возраст од 18 – 29 години и претставници на национални/локални институции како носители на одлуки.
 
Вашето присуство може да го потврдите на martina_ilievska@mof.org.mk до понеделник (02.10) 12 часот. 

Започнуват октомвриските проекции на МОФ и МакеДокс во дванаесет градови

Со проекцијата на документарниот филм „Зависник од интернет“, денеска (20 октомври) во МКЦ клубот во Битола, во 17:30 часот, започнуват октомвриските проекции на МОФ и МакеДокс.

Документарецот „Зависник од интернет“ е избраниот филм кој ќе се прикажува во октомври во дванаесет градови низ земјава. Продукција на Израел и САД, снимен е во 2013 и трае 79 минути.

Филмскиот караван на МОФ и МакеДокс започна во март и ќе трае до декември. Досега беа прикажани филмот „Алфабет“ кој претставуваше критика на формалното образование, потоа „Girl Model, „Машки филм“ и „Песната на Ајша“ кои беа проектирани во април и потикнуваат свесност за женските права , додека во мај беше прикажан документарецот „Мал свет“,

Септемвриската проекција беше посветена на глобализацијата, а публиката имаше можност да го следи филмот „Најсреќната кикиритка на светот“.

Кина е првата земја во светот која ја прогласи „зависноста од интернет“ за клиничко нарушување. Со цел да се справат со она што наликува на најголемата општествена криза на денешницата, кинеските власти отвораат установи за детоксикација и лекување на зависноста на тинејџерите од водењето на живот онлајн.

Преку неконвенционалните психолошки сесии, каде што момчињата постепено споделуваат зошто се чувствуваат поповрзани со разните гласови во сајбер-просторот отколку со семејството, филмот „Зависник од интернет“ нуди искрен, промислен и непријатен портрет на општество во движење и на младина изгубена во технологијата, на работ на бездната отаде непознатата иднина.

Филмот го прикажува современиот кинески живот во мало, посматрајќи ги меѓугенерацискиот притисок и симптомите на таканареченото „доба на интернетот“.

За октомвриските прокции гости говорници ќе бидат @Goran Man, блогер и твитерџија кој ќе гостува на проекциите во Кратово и Неготино и Гораст Цветковски, актер и гејмер кој ќе гостува на проекцијата во Скопје која ќе се случи во културниот центар КУЛА.

Модератори на дискусиите се Сашо Н. Алушевски и Марија Павлеска.

Во продолжение целосниот распоред на проекциите:

  20.10.2015 17:30ч Битола (вторник) во просториите на МКЦ клубот, Цар Самоил 29

 21.10.2015 Кратово 19:00 (среда) Регионален Центар за одржлив развој, Гоце Делчев 24

 23.10.2015 Ресен18:00 (петок) простории на Акција Плус – Ресен

 23.10.2015 Кичево 18:00 (петок) Регионален Центар за одржлив развој -11 Септември (Зграда Сушица)

 24.10.2015 Тетово 12:00 (сабота) МОФ ул. „Јане Сандански“ 50/1

 25.10.2015 Скопје 20:00 (недела) – Кула

 26.10.2015 Велес 17:00 (понеделник)Фондација за локален развој и демократија Фокус, Солунска 2а(спроти Североф)

 27.10.2015 Неготино 19:00 (вторник) простории на Центар за Регионален Одржлив Развој (ЦРОР)

 29.10.2015 Дебар 12:00, Гимазија

 30.10.2015 Струга 18:00 (петок) Здружение за развој и активизам „АКВА“–Струга, ул: „Климетица“ бр. 8

 30.10.2015 Гевгелија 12:00 Регионален Центар за одржлив развој, Маршал Тито 60

Студентите и професорите дебатираа: Улогата на студентите во градењето на академскиот свет

На 23 септември (среда), на платото на УКИМ се одржа промоцијата на првата анализа на студентското организирање на државните универзитети „Анализа на студентското организирање и учество во Македонија“ и панел дискусија со: Александра Живковиќ (МОФ), Проф. д-р. Димитар Гелев, Ивана Туфеџиќ (Студентски плеум) и активистот Александар Стојановски, под модерација на новинарката Јасмина Јакимова.

Александра Живковиќ од МОФ, која е и еден од авторите на публикацијата кажа дека анализата нуди осврт на правната рамка во Македонија за студентското организирање, а се анализира и формата на студентсктите парламенти како единствени признаени претставнички организации. Таа изјави дека универзитетите ја овозможуваат монополската форма на парламентите и само нив ги препознаваат како форма на организирање. На голем дел од факултетите не се одржуваат избори, па дури ни на некои универзитети.  „Студентите во Македонија според законот се вклучени во сите тела во кои се носат важни одлуки – Кој да биде ректор, колкав е буџетот, какви програми да има, обновување на библиотечните фондови и други прашања. На студенските претставници од парламентите им е дадена можност да одлучуваат во универзитетските и факултетските тела рамноправно со професорите“ кажа таа.

Професорот Гелев кажа „Во скоро време при анализа на актите, со шок констатирав дека студенскиот парламент е регистриран како невладина организација. Студентските претставнички организации мора да се дел од универзитетот и инкорпорирани во неговиот статут и акти“. Зборуваќи за студентските протести тој кажа „Бунтот претстанува крик на едно општество кое тоне“ и потенцираше дека проблемите се решливи се додека има волја и интерес од студентите.

Ивана Туфеџиќ од Студентски пленум кажа „Лично сметам дека ни е потребна компетитивност во претставувањето на студентите. За да кажеме дека правиме студентски избори, треба да имаме избор“. Таа кажа дека тоа што студентите не очекуваат ниту пак бараат нешто од СПУКМ им помага да ја задржат монополската позиција како страно тело кое Универзитетот треба да го отфрли, чекор направен при влезот на Студенсткиот пленум во работната група за Законот за високо образование.

На ова се надоврза активистот Александар Стојановски, кој го отвори прашањето за независноста на студентскиот правобранител кој треба да биде правна алатка за студентите и застапник за нивните права. Тој искажа загриженост дека правобранителот не смее да биде сојузник на лошите и пасивни оранизации туку на студентите.

Дискусијата помина во судир на мислења за правната рамка за парламентите, начините на финансирање и уредување, но и согласување дека во овој момент не ја вршат својата улога. Пасивни во јавноста, реактивни на други студентски иницијативи и нападнати за корупција и нетранспарентност, на студентските тела им треба предизвик и од студентите и од универзитетите за да се промени нешто во интерес на студентот.

Публикацијата „Анализа на студентското организирање и учество во Македонија“ е првиот документ кој транспантно и систематизирано ја прави достапна структурата, учеството и формата на парламентите на јавните универзитети во Македонија од правен аспект и нивната досегашна работа. Нејзини автори се Мартин Алексоски, Сања Божовиќ, Мартин Галевски, Александра Живковиќ и Марија Мирчевска, а е достапна на страницата на МОФ на линкот.

Подготовката на публикацијата и настанот се поддржани од Проектот на УСАИД за граѓанско општество.

Јавна трибина „Студентското организирање како преуслов за квалитетно високо образование”

Младинскиот образовен форум ве поканува да го проследите настанот кој има за цел да понуди конструктивна дискусија за студентското организирање и учество во Р. Македонија. Настанот ќе се одржи на 23.09.2015 (вторник), со почеток во 11.00 часот, на платото на УКИМи е поддржан од Проектот на УСАИД за граѓанско општество.

Јавната трибина ќе започне со презентација на наодите од анализата за „Студентско организирање и учество во Република Македонија”, од страна на претставник на Младински образовен форум.

Поканети говорници за оваа панел дискусија се: Проф.Д-р. Димитар Гелев [професор на  Правниот факултет „Јустинијан Први” во Скопје]; Ивана Туфегџиќ [претставник од Студентскиот пленум]; Александар Стојановски [поранешен студентски активист].

Во изработената анализа се дискутираат учеството на студентите во универзитетските и факултетските тела, организациската поставеност и работата на студентските парламенти на сите државни универзитети во Република Македонија. Публикацијата ги дискутира и формите на организирање на матичните факултети на УКИМ и европските практики.

На настанот е дозволено видео и аудио снимање. Говорниците на трибината ќе бидат достапни за изјава 15 минути пред почетокот.

Повеќе информации на https://www.facebook.com/events/1499082950408057/