[МОФ за екстерното] Прашања и аргументи за Министерството за образование и наука

 

Само 2 часа откако МОФ ги достави 25.378-те потписи за екстерното оценување оваа година да се прогласи за пробно, Министерството за образование и наука (МОН) се огласи дека тестирањето ќе важи бескомпромисно, без да одговори на прашањата кои говорат за оспорениот квалитет на екстерното и со единствена порака дека реакцијата на МОФ била задоцнета.

Го прашуваме МОН, како успеа за толку кратко време да ја прочита и разбере нашата анализа и како се осмели за само 2 часа да отфрли иницијатива на повеќе од 25 илјади граѓани? Дали искуствата, сведоштвата и барањата на овие граѓани, ученици, родители, наставници и професори не се доволна порака за Министерството да се одважи и да одлучи да го подобри образовниот процес, наместо инаетливо да не отстапува од своите одлуки кои прават штета на сите засегнати страни?

Во обид да го претстави екстерното оценување како процес кој бил поддржан од засегнатите, МОН во неколку наврати потенцираше дека тестирањето оваа година било спроведено во партнерство со учениците и наставниците? Дали МОН ги смета за свои партнери илјадниците ученици кои протестираа уште во мај во обид да спречат конфузно проектирано екстерно? Дали партнери на вакво екстерно се сите оние ученици кои реагираа на серијата технички пропусти и законски недоследности и прекршувања на закон? Дали партнер на МОН и на ваквото екстерно се и Младинскиот образовен форум и оние 25 илјади граѓани кои бараат екстерното да се прогласи за пробно оваа година?

Не, граѓаните не се и нема да бидат партнери на фалично екстерно оценување. Граѓаните се партнери на здрава и аргументирана критика која има за цел да го подобрува образовниот процес, а не да оштетува ученици кои утре ќе имаат проблем при своето запишување на факултет.

Зошто акцијата за екстерното да се прогласи за пробно не е задоцнета?

МОФ трпеливо и темелно го следеше целиот процес на спроведување на екстерното оценување. И нашата организација и сите засегнати од екстерното имаа минимум надеж дека барем техничкото спроведување на тестирањето ќе помине без пропусти и дека ниту еден ученик нема да биде оштетен, онака како што јавно вети Министерот за образование. Но, искуствата на учениците и наставниот кадар го потврдија спротивното. Фактите говорат дека екстерното годинава помина со пробиени тестови, прекршени законски рокови, прашања со повеќе точни одговори, паѓање на сотфверскиот систем, одложувања на тестирањата и атмосфера на страв и конфузија. Кој можеше од напред да претпостави дека МОН ќе си дозволи да спроведе тестирање со толку многу технички и законски пропусти?

МОФ уште еднаш потенцира дека одлуката на Министерството да го прогласи екстерното оценување за пробно во никој случај не може да биде задоцнета, напротив, може само да биде во корист на учениците, во насока на отстранување на пропустите и во насока на остварување на ветувањето дека ниту еден ученик нема да биде оштетен.

Министерството потенцира дека екстерното тестирање е и ќе продолжи да биде законски проект. Потсетуваме дека законската рамка на која МОН се повикува во неколку наврати беше прекршена. Тоа е уште една причина МОН да се одважи, да ги согледа пропустите и да го прогласи за пробно екстерното кое сериозно потфрли во првата година од своето спроведување. Законските 7 дена за објавување на предметите за тестирање беа скратени на 4, а рокот за поднесување приговори по однос на објавените оцени беше скратен од 3 на 2 дена. Потсетуваме дека во законот недостасува одредба за негативни оцени (незадоволителен „1”). На голем број ученици „единиците” им беа внесени во свидетелства, иако македонскиот образовен систем не ја препознава оваа оцена како преодна. Потсетуваме и дека основите за поднесување приговори се претесни и не им дозволуваат на учениците да реагираат на техничките пропусти со кои се соочија при тестирањето.

Лажна е сликата дека само 3.200 ученици поднеле приговори бидејќи на останатите не им беше овозоможено да реагираат и приговорите им беа одбивани како неосновани. Прашуваме дали прекрушувањата на законите во Македонија не е доволна причина за да се преземат конкретни мерки, да се прогласи екстерното за пробно и со тоа да се спречи официјализирање на процес во кој законите се прекршени, а учениците оштетени?

За илустрација, во Србија, поради пробивање на тестовите се поништува државната матура.

Конечно, и покрај тоа што МОН оваа акција ја декларира како обид на МОФ да добие публицитет, сметаме дека е корисно што МОН реагира на нашата аргументација и на барањата на 25378 граѓани, со надеж дека најавата за средба, за дискусија и за анализа на аргументацијата конечно ќе се оствари.

МОФ сеуште е заинтересиран за работен состанок со Министерството за образование и наука во интерес на подобро екстерно оценување во иднина, а во меѓувреме ќе продолжи со водење на институционалните процедури преку претставки до Државниот управен инспекторат, Државниот просветен инспекторат и Уставниот суд на Република Македонија.

Стоиме на располагање да му помогнеме на Министерството за образование да воведе реформа која ќе биде успешна, а не реформа која ќе оштетува. Успешна реформа не може да биде екстерно оценување за чии пропусти сведочат повеќе од 25 илјади граѓани… ќе беа многу повеќе, но дел од загрозените се плашеа да се потпишат, па поддршката ја даваат усно, преку телефон или преку е-пошта.

 

Повеќе информации за процесот на екстерното оценување како и препораки за идното тестирање може да најдете во Анализата за екстерното оценување во училиштата во Македонија.

 

Поткуп, корупција и непотизам – Секојдневие за студентите

mof-pres-300x199Дури 39 проценти од студентите на Универзитетот „Св. Кирил и Методиј“ имале искуство со поткуп во форма на купување книга од професорот, со цел да се добие поголема оценка, а најголем дел од нив не пријавуваат корупција бидејќи сметаат дека нема да променат ништо, покажува истражувањето на „Младинскиот образовен форум“.

Регионалното истражување во кое се вклучени најголемите високообразовни установи во Македонија, Србија, Хрватска, Молдавија и Бугарија, открива дека на УКИМ, најмалку 30 проценти од испитаните студенти биле директно изложени на непотизам.

„Формите на непотизам за кои зборуваме се кога професори го користат своето влијание во процесот на уписи, студенти користат познанства за упис, професорот дава повисока оценка на основа на познанство и студент користи познанства за да добие повисока оцена или да положи испит“, истакна Петар Димитров од МОФ.

Иако студентите постојано околу себе забележуваат коруптивни појави, тие ретко се подготвени да ги пријават. Според истражувањето, 66% од испитаниците одговориле дека би го пријавиле професорот кој прима поткуп но само доколку пријавувањето е анонимно, додека само 26.8% би ја пријавиле ваквата постапка ако од нив се бара откривање на идентитетот.

Најчест одговор кај студентите е дека не пријавуваат корупција, зашто не веруваат дека би промениле нешто, додека 28% од вкупните испитаници, се плашат од одмазда.

„Речиси 84% од студентите одговориле дека не би го пријавиле колегата/колешката која мами на испит. За компарација студентите од Загреб покажуваат поголема „солидарност“ со колегите односно 92%, не би пријавиле ваков настан“, истакна Мартин Алексоски од МОФ.

Регионалното истражување на тема: Перцепција за корупција во Високото образование е спроведено во рамките на Антикорупциската студентска мрежа во Југоисточна Европа (ACSN-SEE).

Истражувањето во Македонија е спроведено на случаен примерок од 721 испитаник, од шест факултети (Машински фаултет, Факултет за електротехника и информациски технологии, Правен факултет, Економски, Филозофски  и Филолошки факултет) на УКИМ, во текот на септември- ноември 2012 година. Истражувањето на ниво на мрежата на ACSN – SEE е спроведено на 615 испитаници во Загреб, два државни Универзитети во Молдавија на 825 испитаници, на Универзитетот во Белград со 827 испитаници и Универзитетот во Пловдив со 475.

ACSN Регионално истражување за перцепција на корупција  (Прашалници)

ACSN Регионално истражување за перцепција на корупција ( Интервјуа)

Училиштата потфрлија на тестот за вклученост на учениците во процесите на одлучувањe

Резултати од истражувањето за средношколско организирање и учество во Македонија

Младински образовен форум (МОФ), денеска, 28ми јануари 2013 година, ги презентираше резултатите од истражувањето на тема “Средношколско организирање и учество во Република Македонија”. Преку истражувањето беа испитани 54 средни училишта и 155 ученици од 14 градови во Македонија, преку реализација на 18 фокус групи и испраќање 270 прашања со алатката “слободен пристап до информации од јавен карактер”.

Резултатите покажаа дека не постои унифициран систем на средношколско организирање во училиштата во државата и дека учениците се организирани преку различни облици и нивоа, но заедничко за сите училишта е што средношколците не учествуваат во процесите на одлучувања и не се застапени во органите на училиштата.

При истражувањето на начините на избор на претседатели на класови и генерации, се забележува дека училиштата, претставени преку класните раководители, поставуваат строги и дикриминаторски услови, дозволувајќи им само на редовните, дисциплираните, примерните и учениците со солиден успех да можат да ги застапуваат своите соученици. Од одговорите на учениците се забележува дека класниот раководител има големо влијание врз изборот на претседател на клас, преку предлагање листа од избрани кандидати или преку презентација на профил на ученик кој заслужува да биде претседател. Сеуште постојат училишта во кои изборот на претседател на клас го врши класниот раководител, со што на учениците директно им се одзема правото да одлучуваат кој ќе ги претставува.

“Најчесто само во прва и втора година, професорите им дозволуваат на учениците сами да си бираат претседател на клас, а потоа откако ќе ги запознаат сите ученици подобро, тие самите го прават тоа“ – изјава од еден од учесниците на фокус групите;

Средношколците лоцираат низа проблеми во воспитно-образовните процеси во училиштата, а најмногу ги издвојуваат квалитетот на настава, комуникацијата професор-ученик, оценувањето, комуникацијата со стручните служби и со претставниците на учениците, меѓуетничките конфликти и инфраструктурата во училиштата.

И покрај тоа што учениците се свесни за проблемите, сепак училиштата ги консултираат само за помалку важни прашања, како на пример организирањето екскурзии и матурски прослави. Учениците сметаат дека не можат да влијаат за решавање на суштинските проблеми бидејќи тоа зависи директно од волјата на професорите и управите во училиштата. Сметаат дека немаат авторитет, нивниот глас не е слушнат и не е почитуван од надлежните, односно не можат да влијаат за промени. Дополнително, средношколците не се интересираат за своите права и не преземаат иницијативи, од страв да не бидат погрешно разбрани од професорите и управите и тоа да не се одрази негативно врз нивниот успех и поведение.

Дел од проблемот, средношколците го лоцираат и кај своите родители, кои ретко им даваат поддршка за нивните иницијативи.

“Еднаш се собравме 6 класа, ни беше ладно и избегавме. Добивме по 5 неоправдани. После тоа, се собраа родителите и зборуваа за тоа. Рековме дека ни е ладно. Ни рекоа ако ви е ладно облечете јакни и толку. Затоа некој и да сака нешто да направи, нема да направи“. – изјава од еден од учесниците на фокус групите;

Учениците и училиштата не препознаваат средношколско организирање на национално ниво. Последните јавни активности на Унијата на средношколци на Македонија и на Средношколската унија на Македонија се забележани во 2008 и 2009 година, преку оградување од протестите против воведувањето државна матура и преку приклучување кон протестите кои студентите ги организираа пред Европската комисија во Скопје, а против одложувањето на датумот за почеток на преговори за членство на Македонија во Европската Унија. Според одговорите од училиштата, од 45 испитани училишта, само едно има претставник во ова национално организирање на средношколците.

Разгледувајќи ја ваквата состојба на средношколското организирање во Македонија, МОФ изработи низа препораки упатени до Министерството за образование и наука, училиштата, професорите, учениците, родителите, локалните самоуправи и младинските организации. Во една од препораките се потенцира потребата од измени на Законот за средно образование и статутите на образовните институции, со што ќе се гарантира учество на учениците во органите на одлучување во училиштата.

Студентите за себе: Истражување за студентското (не)организирање

Ни претставува задоволство да ја најавиме прес конференцијата и трибина на која Платформата за студентски плурализам ќе ги презентира резултатите од истражувањето на темa Студентите за себе: Истражување за студентското (не)организирање

Прес конференцијата ќе се одржи на 14.05.2012 со почеток во 12:00 часот во просториите на ГЕМ, во старата скопска чаршија.

Според истражувањето 59% од испитаниците сметаат дека се свесни за проблемите со кои се соочуваат студентите, но немаат механизми како да ги решат. На трибината ќе бидат претставени резулататите кои даваат одговор на прашањата колку од студентите членуваат во студентски организации, колку се запознаени со нивните студентски претставници и областите од студентскиот живот кои сметаат дека се приоритетни.

Панелистите ќе споделат ставови и искуства поврзани со темата на истражувањето и резултатите. Говорници на трибината ќе бидат претставници на дел од организациите-членки на Платформата за студентски плурализам: Мартин Алексоски и Моника Божиновска – Младински образовен форум, Ана Велковска – Европско здружение на студентите по право во Република Македонија (ЕЛСА), Наташа Давчева – Ромаверзитас и Катерина Ѓорѓиевска – Меѓународно здружение за размени на студенти од техничките факултети (ИАЕСТЕ Македонија).

Истражувањето е спроведено од МОФ како дел од активностите на Платформата за студентски плурализам која претставува неформална коалиција на 17 студентски и младински организации. Целта на ПСП е темелна и конечна реформа на постоечкиот систем на студентско организирање преку обезбедување демократска функционалност, транспарентност, вклученост и легитимност на сите организации и групи кои ги застапуваат правата и интересите на студентите во Македонија.

Настанот е отворен за сите заинтересирани посетители.
Повеќе информации на http://www.facebook.com/psp.macedonia

Дискусија наместо насилство & Diskutim ne vend te dhunes

Diskusija namesto nasilstvoТука сме 50тина млади од  Струга, Скопје, Штип, Велес и Кичево. Сите сме членови на МОФ, а викендов реализираме тренинг за нови предавачи кои ќе ги водат дебатните клубови низ Македонија. Тука сме Македонци, Албанци, Турци, Срби и други, но тоа денес не е толку важно. Важно е дека оваа група се развива и шири дискусија и дебата меѓу младите низ Македонија.

Крајно сме загрижени поради последните изливи на насилство меѓу младите и граѓаните, непотврдените пораки дека тензијата е исклучиво на меѓуетничка основа и интензивирањето на сегрегацијата.

Наместо со физички пресметки или со апатија, како две крајности, повикуваме младите да се ангажираат и да се мобилизираат за да ги научат своите права, да ја вежбаат демократијата, да се здружат и да дејствуваат онака како што им прилега, со активизам.

Младите треба да притискаат кон институциите, но и да се нудат како релевантен партнер. Комуникацијата меѓу младите и институциите мора да започне веднаш. Младите треба да имаат секојдневен контакт со Министертвото за образование и со Агенцијата за млади и спорт, а не со Министерството за внатрешни работи.

Сметаме дека тензиите и насилствата на етничка основа само ќе ја ослабат позицијата на младите во општеството, а младите не смеат да го дозволат тоа.

Повикуваме на разум и на отпор кон секоја форма на насилство и агресија. Насилството мора да запре. 

До институциите, професорите и родителите:

Ги повикуваме институциите, професорите и родителите  да ги мотивираат младите на дискусија со своите врсници од различна етничка, верска, културна, политичка или било која друга припадност. Партиите, професорите и родителите мора да се одважат и во интерес на своите деца да работат многу повеќе на надминување на разликите и предрасудите и актуелните проблеми.

Младите посегнуваат по насилството најмногу поради тоа што нивната енергија не се канализира низ институциите и не се овозможува нивните идеи и ставови да бидат слушнати и признаени.

До медиумите:

Ги замолуваме и медиумите да овозможат пренесување на ставовите на младите во јавност, да и дадат простор на интеграцијата и бидат активен играч во смирувањето на тензијата.

Физичките пресметки заслужуваат медиумско внимание, но во вакви моменти тоа не смее да биде пренагласено и нападно пласирано. Уште помалку е потребно нагласување на етничките припадности на граѓаните во било кој контекст, па и во контекст на физичките пресметки.

Младите во Македонија ги споделуваат истите проблеми и интереси. Нашите реални заеднички проблеми се многу поголеми од разликите кои постојат меѓу нас.

Младите имаат поважни, заеднички проблеми

За нас најголеми проблеми се невработеноста, исклученоста од одлучувањето, слабото средношколско и студентско организирање, недовербата кон институциите.  Истражувањата покажуваат дека младите од различни националности се чувствуваат подеднакво исклучени од општеството и споделувааат зеднички проблеми.

Етничките разлики постојат и за нив сме сите свесни, но од нив не треба никој да прави проблем. Ние повикуваме на почитување на различното, толерирање на ставовите кои се различни од нашите и на учење едни од други.

Сојузот на студенти се жали на погрешна врата


Отворено писмо до Студентскиот сојуз на Универзитет Св. Кирил и Методиј

Минатиот четврток весникот „Вечер“  на својата насловна страница го објави текстот „Ќе те “решам” за 100 евра, а може и за “две тегли ајвар”“ кој предизвика реакции кај студентите и  интернет заедницата поради стереотипизацијата на студентите кои живеат во домовите, сомнителноста на информациите, но и контроверзната изјава на Сојузот на студенти.
Со цел подобро да ја истражиме ситуацијата пред да ја искажеме нашата реакција, успеавме да откриеме дека не станува збор за текст од 2012, туку плагијат на постар текст објавен во весникот Шпиц. Во тој момент не постоеше никаков демант за изјавата од страна на Сојузот на веста која ја пренесе „Вечер“ и всушност МОФ откри дека станува збор за плагијат, и дека изјавата не датира од 2012 од самиот Студентски сојуз на УКИМ туку од 2009 од Претседателот на Сојузот на студенти на Филозофски факултет.

Сепак, во МОФ пристина писмо од  Сојузот во кое реагираат за коментарите на членови на МОФ на Фејсбук, за користењето на името Сојуз на студенти наместо Студентски парламент, и објавување на невистинити информации и бараат формално извинување за истите.

Подолу следи нашиот одговор на овие забелешки на Студентскиот сојуз на УКИМ:

1. Членовите на МОФ имаат право на сопствено мислење, и МОФ не може да одговара за индивидуалните изјави на своите членови. Дополнително, реакциите на членовите се резултат на изјава која ги деградира студентите од внатрешноста и вели дека за некои луѓе да имаат „нормален“ живот, единствениот избор е проституцијата. Напротив, немање реакција на ваква изјава би било загрижувачки.

2. МОФ секогаш се обидувал да учестува во аргументирана дискусија, да истражува и нуди конкретни мерки и активности. Нам ни е доволно важна позицијата на студентите во Македонија што и покрај сите гафови на ССУКМ, пасивност и идеолошки разлики, на неколку наврати имаме седено на иста маса и разговорано на иста тема.
3. МОФ нема  објавено невистинити информации, напротив ги разоткри истите додека од ССУКМ немаше никаква реакција. Медиумот „Вечер“ пласира застарени и туѓи информации, и реакциите на ССУКМ за злоупотреба на името и ширење невистинити  информации треба да бидат упатени таму.

4. Весникот „Вечер“ го користи името „Сојуз на студенти“  во својот текст.
Сепак, МОФ смета дека има право да го нарекува СПУКМ Сојуз на студенти, бидејќи претставува рудиментиран модел на студентско организирање кој до пред неколку години се нарекуваше Сојуз. Иако Сојузот го промени името во Парламент, тоа не се случи со структурата и членството. МОФ ќе го признае Парламентот кога тој ќе биде транспарентен, плурален и демократски.
За крај, МОФ нема да се извини за реакциите на своите членови на погрешно пласираната вест на „Вечер“, за користење на името кое е реален одраз на организацијата на ова тело, ниту за објавување на невистинити информации бидејќи тоа го нема направено. Напротив, го разоткривме потеклото на она што го објави „Вечер“, додека од ССУКМ се уште нема официјална реакција во јавноста.

Ние побаравме весникот „Вечер“ да се извини на студентската јавност за лажните наоди, како и од Здружението на новинари на Македонија да реагира за грубото кршење на новинарската етика и професионализам.

Доколку ССУКМ се промовира себе си како заштитник на студентите, треба прв да излезе со реакција, а не лично да го напаѓа МОФ за пропустот на Вечер.

Република Млади во Скопје: Речиси 50% од младите во Македонија се невработени, а дури 96.6% од младите би почнале со работа наредната недела

Republika Mladi vo SkopjeЕден од најголемите проблеми на младите во Република Македонија е невработеноста. Додека во државата вкупната стапка на невработеност е 32%, за младите на возраст од 15 до 29 години таа е значително повисока и изнесува дури 45.8%, што значи дека речиси половина од младите во Македонија се невработени.

99% од младите сакаат да работат, а само 17.9% или помалку од една петина заработуваат свои пари преку работа. Шокантен е фактот што неверојатни 96.6% од младите би почнале да работат наредната недела. Ова се резултати изнесени од истражување, реализирано од Реактор-истражување во акција, на јавната дебата – Република Млади. Оваа дебата, реализирана во Скопје, е дел од циклусот дебати организирани од Иницијатива за младинско учество (mladizakon.org).

Во салата, преполна од млади и младински организации, немаше претставници на државните институции(Агенција за вработување на РМ, Агенција за млади и спорт, претставници на бизнис сектор, претставници на факултети), како би ги слушнале младите и нивните проблеми и потреби. Младите, во повеќе наврати изразија револт кон ваквиот чин.

Невработеноста е само еден од проблемите на младите. Покрај вработување, младите сакаат да бидат вклучени и во процесите на одлучување, да има плурализам во младински одлуки, односно нивно директно учество.

Марјан Забрчанец, од Младински образовен форум, посочи дека доколку се носи Закон за млади, тој треба соодветствува на потребите на младите и им дава можност на младите да бидат директно вклучени во социјалните случувања. Токму затоа е организирана и оваа јавна трибина за широко учество на младите со свои мислења и препораки кои ќе влезат во т.н. Бела книга.

Линдита Реџепи, од Центарот за меѓукултурен дијалог од Куманово,  посочи дека е неопходно да се здружат младите како би биле поефективни во исполнување на своите цели, „последно што треба да се случи во оваа држава е да имаме паралелни групи на македноци, албанци, срби, роми, но и оние од рурални средини или со одредени попречености“.

„Младите мора да бидат консултирани, за да не се одалечат од општеството, како понатаму не би одговориле на општестовото со протест“, изјави Матијас Кристенсон, од Европски младински форум. 

Како одговор на изнесените мислења на  говорниците и младите, се донесе заклучок дека е соодветно да се создаде Младински парламент, кој би бил најдемократска форма за организирање на младите.

Препорака испратена до младите, во недостаток на функционална стратегија за млади, е да бидат похрабри и погласни кога сакаат да го споделат својот став.

Уста пуста отворете, нека каже ако боли

На 10 декември пред 63 години Генералното Собрание на ООН во Њу Јорк ја усвои и прогласи Универзалната Декларација за човековите права (УДЧП) со што за прв пат во историјата беше пратена глобална и јасна порака за универзалната важност на заштитата и остварувањето на правата на луѓето насекаде и подеднакво за сите. Оттогаш наваму секоја година низ светот заштитниците и промоторите на човековите права го прославуваат овој ден и потсетуваат на суштината и содржината на правата и слободите во животот на секој човек.

Младински образовен форум (МОФ) е младинска граѓанска организација која повеќе од 12 години се залага и активно работи на вредностите како што се дебата во демократско општество, култура на дијалог и толеранција, владеење на правото и заштита на човековите права, младински активизам и слободоумно размислување и изразување. Затоа, МОФ реши оваа година на Меѓународниот ден на човековите права да повика на внимание во јавноста за важноста и значењето на слободата на изразување како најактуелно и најсуштинско прашање од областа на човековите права денес во нашето општество.

Загрижени од општата состојба во нашето општество кое изобилува со говор на омраза и недостаток на дијалог и слободно изразување, но исто така и инспирирани од силната порака на светскиот просветителски мислител Волтер кој вели “можеби не се согласувам со тоа што го кажуваш, но ќе се борам до крајот на животот за твоето право да го кажеш тоа”, и ироничната порака на нашиот голем поет Кочо Рацин во неговата „Елегии за тебе“ која вели “уста пуста затворете, да не каже дека боли”, сакаме на јавноста да и укажеме на важноста на слободното размислување и изразување на сопствените ставови за одржување на демократијата.

Слободното изразување во сите сфери на општеството (помеѓу граѓанските организации, помеѓу младите, во политичкиот живот, во институциите во бизнисот и најважно во медиумите) претставува кислород за демократското живеење без кој целиот поредок не може да се нарече ниту современ ниту демократски. Слободната размена на идеи помеѓу слободни луѓе е клучот за формирање на пазар на идеи меѓу кои се препознаваат и анализираат различните ставови и концепти.

Различните ставови се основа за формирање на категориите на мнозинство и малцинство во едно општество и тоа не само по етничка туку уште повеќе по идеолошка или некоја друга основа. Но, слободното изразување и толеранцијата на различните мислења, во такви услови, претставува сигурносен вентил преку кој се изнесуваат вистинските и потенцијалните „фрустрации“ на оние поединци и групи кои не се согласуваат со моменталните општествени сиутации кои можат да им предизвикаат општествени фрустрации. Преку слободното изразување во својата средина и во медиумите овие фактори имаат можност да критикуваат и предлагаат решенија за општеството. На тој начин се амортизираат потенцијалните нивни агресивни и насилни реакции, а судирот на концепти станува нормална состојба на разменети ставови во јавниот дискурс наспроти агресија и омраза. Затоа МОФ порачува дека критиката е секогаш поздрава опција од насилството.

Слободата на изразување и комуникација во јавноста се уреден меѓународен стандард кој ги разликува демократските од авторитарните општества, а Република Македонија со својот Устав ги уредува и гарантира слободата на мисла, говор и комуникација. За крај на ова обраќање ги цитираме клучните членови од УДЧП и од Уставот на РМ кои ги уредуваат овие прашања за подсетиме за содржината и значајноста на слободата на изразување, но и за да ги поттикнеме сите луѓе во Македонија слободно да говорат и да размислуваат секој ден, а не само денес, на 10 декемри, Меѓународниот ден на човекови права.

Член 19 од Универзална декларација за човекови права на ООН:
„Секој има право на мислење и на негово изразување. Ова право ја вклучува слободата да се држи/има мислење без надворешно мешање и право да се бараат, примаат и предаваат информации и идеи преку каков било медиум и без оглед на границите“.
Член 16 од Уставот на Република Македонија:
„Се гарантира слободата на уверувањето, совеста, мислата и јавното изразување на мислата. Се гарантира слободата на говорот, јавниот настап, јавното информирање и слободното основање на институции за јавно информирање…  Цензурата е забранета“.
Младински образовен форум ви го честита 10ти декември, Меѓународниот ден на човекови права

Видео: Слобода на изразување – Ден на човекови права

Студентите се свесни за корупцијата, но одбиваат да ја пријават

На 06 Декември во просториите на ГЕМ (Менада) се одржа прес конференција со цел презентација на резултатите од истражувањето на тема: Поткуп во високообразовните установи, кое беше спроведено од страна на Младински образовен форум. Во склоп на презентација на резултатите од истражувањето, беше промовирана и публикација со наслов: Пакет за прва помош – Студентски прирачник за истражување на корупцијата во високото образование кој претставува финален производ  од повеќегодишните истражувања на Младински образовен форум како дел од Антикорупциска студентска мрежа во Југоисточна Европа [Anti Corruption Student Network (ACSN)].

Резултатите од истражувањето на тема „Поткуп во високообразовните установи“ наведуваат на заклучот дека митото и поткупот постојат во изразена форма во високото образование и дека студентите се свесни за нивната појава. Сепак, кај студентите постои толеранција кон митото и поткупот, па дури и потикнување наместо пријавување.

Резултатите од истражувањето се следните:
Дали некогаш си бил/а изложен/а на некои од случаиве наведени подолу?
·    Високи 32% од испитаниците навеле дека биле приморани да ја носат сопствената копија од книгата или скриптата на професорот за да учествуваат на часовите, односно предавањата, додека 24% познаваат некој на кој му се случило истото. Истовремено 34% од испитаниците изјавиле дека биле приморани да ја имаат книгата, односно скриптата на професорот за да им биде дозволено да го полагаат испитот.

Дали некогаш си бил/а изложен/а на некои од случаите наведени подолу?

·    На прашањето дали некогаш се нашле во ситуација да мора да посетуваат платени приватни часови кај некој од професорите/асистентите со коишто им се гарантира повисока оценка 4% од испитаниците одговориле дека им се случило на нив, додека пак 28 % одговориле дека познаваат некој на кој му се случило.
·    На прашањето за нудење на услуги на професор/службеник во возврат за други услуги, 1% одговориле дека се нашле во таква ситуација, додека 34% одговориле дека познаваат некој на кој му се случило.

Што би направил/а ако се најдеш во ситуација да мораш да купиш книга/скрипта
која професорот ја поставил како услов за добивање на потпис или полагање?

·    На ова прашање 44% од испитаните студенти одговориле дека би ја купиле книгата/скриптата и не би го пријавиле професорот, а 21% би го пријавиле професорот, но само доколку тоа е анонимно.

Дали некогаш си одбил да ја купиш книгата/скриптите на професорот иако тоа било поставено како услов за добивање потпис или полагање?
·    Високи 58% од испитаните одговориле дека никогаш не одбиле да ја купат книгата односно скриптата на професорот, доколку тоа било поставено како услов за добивање потпис, односно положување на испитот.

Кој може да понуди мито (пари, подароци или услуги) на професорите на твојот факултет?
·    На ова прашање 33% од студентите одговориле дека поткуп може да понуди секој кој сака и кој има доволно пари, 32% дека тоа го можат оние кои имаат врски или на кои посредникот односно професорот им веруваат, а само 6% одговориле дека на нивниот факултет е невозможно да се понуди мито.

Ако се најдеш во ситуација да изгубиш година, стипендија, или право на студирање, дали би направил/а нешто од подоленаведеното во обид да ја промениш ситуацијата?
·    19% од испитаниците одговориле дека би побарале фамилијарни, пријателски или политички врски, додека дури 47% велат дека би размислиле за таа можност. 4% би понудиле пари или подароци на професорот или на службено лице, додека 14% би размислиле за таквата можност.

Во која од следниве институции и личности имаш најмногу доверба кога станува збор за пријавување на корупција?
·    На ова прашање 21% од студентите изјавиле дека не би пријавиле корупција никаде, додека пак од оние кои би пријавиле случаи на корупција 26%  би пријавиле во Антокорупциска комисија. Кај деканот на факултетот би пријавиле 8%, кај Студентскиот парламент на УКИМ 5%, додека во ректоратот би се обратиле 1% од испитаниците.

Истражувањето е спроведено на случаен примерок од 302 студенти, од шест факултети (Машински фаултет, Факултет за електротехника и информациски технологии, Правен факултет, Економски факултет, Филозофски факултет и Филолошки факултет) на УКИМ, во текот на мај 2011.

На прес конференцијата во својство на говорници се појавија Марија Мирчевска, Дона Костуранова, Мартин Алексоски и Петар Димитров кои ги презентираа резултатите. Прес конференцијата беше посетена од страна на претставници на институциите и на граѓанскиот сектор, особено од оние кои работат на полето на борба против корупцијата или пак кои се дел од високото образование со цел да се покрене дискусија меѓу засегнатите страни за спречување на корупцијата во високото образование.

На настанот беше промовирана и публикацијата Пакет за прва помош – Студентски прирачник за истражување на корупцијата во високото образование која е финален производ од повеќегодишните истражувања на оваа тема која има за цел да ги доближи истражувачките алатки до студентите и да поттикне иницијативи за спречување на појавата на корупција.

[Прес конференција] “Поткуп во високото образование”

Potkup vo visoko obrazovanieНи претставува особена чест да ве поканиме на прес конференцијата на која Младински образовен форум ќе ги презентира резултатите од истражувањето на тема: “Поткуп во високото образование” како и ќе ја промовира публикацијата со наслов ”Пакет за прва помош: Студентски прирачник за истражување на корупцијата во високото образование”.

Настанот ќе се одржи на 6 декември со почеток во 11:00 часот во просториите на ГЕМ, во старата скопска чаршија.

Причината зошто оваа тема е во фокусот на нашиот интерес е затоа што појавата на поткуп негативно влијае врз образовната програма, ја намалува социјалната кохезија, квалитетот на високообразовните служби и еднаквоста. Но она што е загрижувачко е и намалувањето на вредноста на знаењето и работната етика.

Според истражувањето, 39% од испитаниците знаат за случаи на нудење на пари на професори или службеници во возврат за други услуги, додека 34 % од студентите се запознаени со случаи каде нивни колеги морале да поседуваат учебник од професорот како услов за да полагаат испит.

На настанот ќе биде промовирана и публикацијата со наслов ”Пакет за прва помош: Студентски прирачник за истражување на корупцијата во високото образование” е комбинација на истражувачки искуства и експертиза во ова полето на истражување на корупцијата. Публикацијата е наменета за организации кои се занимаваат со истражување, но и за индивидуални истражувачи.

Би ни претставувала голема чест и задоволство доколку дадете поддршка на антикорупциките активности во рамките на високото образование.