Повик за анкетари

Младински образовен форум во периодот од февруари – јуни 2020 година спроведува истражување за студентскиот стандард на станарите во студентските домови.

За потребите на истражувањето, отвораме повик за 8 (осум) анкетари кои ќе бидат директно вклучени во теренското спроведување на истражувањето и внес на податоците. Теренското истражување предвидува спроведување на прашалници во студентските домови: „Браќа Миладиновци“ – Штип, „Кочо Рацин“ – Битола и „Пелагонија“ – Скопје, во периодот од 23-ти февруари до 23-ти март, 2020 година.

За подготовка на избраните анкетари ќе биде организиран еднодневен тренинг на 20- ти февруари на кој е задолжително да присуствуваат избраните анкетари. За прибирање и внесување на податоците, анкетарите ќе бидат ангажирани во месеците февруари и март 2020 година.

Сите заинтересирани за овој повик потребно е:

  • Да се полнолетни;
  • Да имаат мотивација да бидат вклучени во теренско спроведување на истражување;
  • Да се во можност да го спроведуваат истражувањето во текот на работно време во работните денови;
  • Во периодот од од 23-ти февруари до 23-ти март да бидат во државата и во можност да го извршат анкетирањето во горенаведените студентски домови;
  • Претходно искуство во анкетирање ќе се смета за предност;
  • Да присуствуваат на еднодневен тренинг на 20-ти февруари во Скопје;
  • Да поседуваат добри комуникациски вештини.

Заинтересираните кандидати потребно е да достават своја биографија (CV), најдоцна до 16-ти февруари 2020 година до 23:59 часот на policy@mof.org.mk со назнака „Пријава за анкетар“. Сите прашања за повикот може да ги упатите на истата мејл-адреса. Избраните анкетари ќе бидат известени на 17-ти февруари 2020 година за времето и локацијата на еднодневниот тренинг, а за ангажманот е предвиден финансиски надомест.

Ова истражување има за цел да открие повеќе сегменти од студентскиот живот на студентите во домовите. Преку спроведување на истражувањето, ќе се добие претстава за моменталната состојба на вклучување на станарите во носењето на одлуки, условите за живот, задоволување на културните, информативните, спортско-рекреативните и други заеднички потреби на студентите.

Проектот Ангажирани студенти за студентски домови без корупција во Северна Македонија е имплементиран од страна на Младински образовен форум (МОФ) и ќе се спроведува во периодот од ноември 2019 до октомври 2020. Целта на проектот е да придонесе за зголемување на транспарентноста и отчетноста, како и за подобрување на квалитетот на сервисите што ги добиваат студентите во студентските домови преку нивна поголема вклученост и преку локални студентски организации за подобрување на условите во домовите и на студентскиот стандард воопшто.

Проектот е финансиран од Програмата за високо образование на Фондациите отворено општество, преку Фондацијата Отворено општество – Македонија.

Промоција на две истражувања за студентски стандард

 Анализа на јавни набавки во ДСД  и  Крпен студентски живот се насловите на двете истражувања кои  Младински образовен форум (МОФ) на 22.01.2020 ги промовираше во Europe House.
Истражувањето „Крпен студентски живот – истражување за животниот стандард на станарите во ДСД – Скопје“ ги адресира прашањата поврзани со корупцијата во студентските домови, начинот на носење одлуки и вклученоста на студентите во истите, како и квалитетот на живот во домовите, додека пак истражувањето „Анализа на јавни набавки во студентските домови“ ги одговара прашањата: колку, во колкава мера и дали се трошат и инвестираат доволно средства од страна на Државниот студентски дом „Скопје“ – Скопје, а во врска со квалитетот на домувањето и квалитетот на услугите за студентите во домовите под капа на Државниот студентски дом „Скопје“ – Скопје.
Проектот „Студентски домови без корупција“ се спроведуваше од август 2018 до јули 2019. Примарната цел на проектот беше поттикнување на институциите на потранспарентно и поодговорно управување со студентските домови, како и вклучување на други институции, организации и правни лица за подобрување на условите во домовите. Анализата на јавните набавки се однесува на периодот 2015-2018 година, додека пак податоците во Крпен студентски живот се однесуваат на перцепциите на станарите во ДСД во учебната 2018/2019 година.
Целосните истражувања се достапни во електронска форма:
Крпен студентски живот
Истражувањата се дел од проектот „Студентски домови без корупција“ овозможен со финансиска поддршка на Програмата за поддршка на високото образование на Фондациите Отворено општество, преку Фондацијата Отворено општество-Македонија.

Дополнување:

По изготвувањето и објавата на Анализата на јавните набавки на студентските домови, на 23.01.2020 година стигна информација до Младински образовен форум дека во 2018 година во ДСД „Скопје“ имало вработено лице со положен испит за јавни набавки. Презентираните податоци во анализата се добиени преку интервју со официјален претставник на ДСД „Скопје“.

Презентирани наодите од Студија за социо-политичко учество на младите

Само три отсто од младите се целосно задоволни со своето место во општеството.

Шест од 10 млади лица веруваат дека воопшто не можат да влијаат врз тоа како работат властите. Една третина од младите во Северна Македонија веруваат дека земјата ќе биде подобро место за живеење за младите за 5 години од сега. Шеесет отсто од младите веруваат дека Северна Македонија ќе стане земја членка на Европската унија, додека 70% од нив веруваат дека тоа ќе се случи во следните 5 години. Младите кои веруваат во европската перспектива на земјата се помалку расположени да си заминат од земјата. Младите кои се граѓански ангажирани се позадоволни со своето место во општеството од своите врсници.

Ова се дел од податоците кои беа презентирани на денешната конференција организирана од Фондацијата за демократија на Вестминстер (ВФД) и Младински образовен форум (МОФ), во Холидеј ин.

На настанот, амбасадорката на Обединетото Кралство Рејчел Галовеј изјави:

„Податоците покажуваат дека само 3% од младите се задоволни со своето место во општеството. Оваа слика мора да се промени, затоа што е важно да имаме силни, здрави и ангажирани млади. Поради ова ја го поддржуваме проектот на ВФД и нивната работа за зголемување на нивото на младинско политичко и институционално учество. Ова е еден од клучните елементи за зголемување на младинската вклученост и ангажираност во општеството.“

Дамир Незири, претставник на Фондацијата за демократија на Вестминстер изјави:

“Истражувањето носи наслов: „Апатија, оптимизам или разочараност?  – три зборови што совршено ги сублимираат ставовите на младите во однос на нивното место во општеството. Тие не се информираат за општествено политичките случувања, но скоро секогаш гласаат на избори; сметат дека не се доволно консултирани и вклучени во процесите на одлучување, но сепак голем дел од нив веруваат дека во иднина ќе биде подобро, особено ако државата стане дел од Европската унија.“

Во неговото обраќање на конференцијата, Министерот за образование и наука Арбер Адеми кажа:

Ја подржувам иницијативата за спроведување на истражувањето, чии резултати се важни за институциите бидејќи тие се индикатор за задоволството и незадоволството на младите за нивното учество и вклученост во општеството. Преку ова истражување се иницираат нови идеи и можности за соработка. Неколку од заклучоците кои на нас ни беа презентирани претходно, се вклучени во новите закони во образованието преку кои се овозможува поголема вклученост на учениците во процесот на одлучување за програмите во нивните училишта. ”

На конференцијата, главниот истражувач Мартин Галевски ги презентираше клучните резултати од студијата „Социо – политичко учество на младите во Северна Македонија: Апатија, оптимизам или разочараност?“.  Податоците од истражувањето не се изненадувачки ако се има предвид дека 85% од младите се изјаснија дека никогаш не биле консултирани од властите, ниту на локално ниту на централно ниво. Со оваа студија, целта е да се дадат повеќе информации за перцепциите на младите и политиките и пристапите кои треба да се преземат за да се подобри нивната позиција во општеството. Младите треба да бидат високо на листата на приоритети на националните и локалните власти, образовните институции, граѓанските организации и медиумите за се поддржи нивното активно учество.

ВФД во соработка со МОФ и со поддршка на Британската влада ќе продолжи да работи на овие прашања, преку работа со ученици и студенти, претставници на партиските подмладоци и граѓанските организации, но и преку давање поддршка на Клубот на млади пратеници, кој е светол пример за искрена соработка за подобрување на положбата на младите.

Промоција на резултати од четири труда

Младински образовен форум (МОФ) вчера, на 16.07.2019 г, одржа промоцијата на резултатите од четири истражувачки труда кои се изработени во рамки на Проектот за образовни центри за советување и алумни стипендисти на Фондациите Отворено oпштество.

Истражувачките трудови се изработени од страна на четири тима составени од седум млади истражувачи кои во изминатите неколку месеци беа менторирани од искусни истражувачи, со поддршка од МОФ. Младите истражувачи обезбедија податоци за теми кои се значајни за младите и тоа: врсничкото насилство помеѓу средношколците, национализмот кај младите средношколци, работата и функционалноста на центрите за кариера и популаризирање на руралноста кај младите.

На промоцијата секој тим кусо го презентираше своето истражување и ги сподели главните наоди добиени од истражувањето, како и заклучоците од истото. Изработените истражувања се :

1. „Популаризирање на руралноста – Потенцијалите на руралното коработење и ефектот врз миграциските трендови на младите во Р. Северна Македонија“ – Елена Андонова и Ѓорѓи Димески;
* 25% од вкупното население живее во Скопскиот плански регион, со акцент на градот Скопје, иако по површина овој регион е најмал од 8-те плански региони.
* Р. Северна Македонија е трета држава во светот по бројот на фриленсери.
* Најголемата категорија на иселеници од руралните средини е младо работоспособно население кое ја напушта руралната средина заради ниски образовни и кариерни можности.
* Работниците од креативната класа имаат минимално влијание врз стапката на вработеност на локалното население во руралната средина, но големо влијание врз социоекономскиот раст (диверзитет на бизнис средина, иновативност, внесување дигитални технологии итн).
* Се појавува и тренд на контраурбанизација во кој млади професионалци се преселуваат во     руралните средини.

2. „Улогата и работата на центрите за кариера при факултетите на Универзитетот „Св. Кирил и Методиј“– Ангела Тасевска;
* 54,73% од испитаните студенти не знаат дали има Центар за кариера на нивниот факултет.
* 61,61% од испитаниците не учествувале во работата на Центарот за кариера, но би сакале да учествуваат.
* 85% од испитаниците се согласни Центарот за кариера да ги известува студентите за своите активности на веб-сајтот на факултетот

3 „Анализа на врсничкото насилство на интернет кај средношколците“ – Симона Стојчевска
*Секој четврти средношколец поминува над 6 часа дневно на интернет.
*40 % од испитаниците одговориле дека се имаат почувствувано непријатно поради вознемирување или навреда на Интернет во последната година.
*42 % од испитаниците барем понекогаш имаат потреба да пријават кога ќе доживеат непријатно искуство на Интернет.
*74 % од нив не знаат кои механизми им стојат на располагање.
*Кај 63 % од нив не се зборува на училиште на тема врсничко насилство на Интернет.

и

4. „Националистички чувства и ставови кај средношколците во Република Северна Македонија“ – Исаја Карадаковска, Емилија Божиновска и Мартина Георгиевска.
* Етничките Македонци од соседните народи за најблизок го чувствуваат српскиот народ, додека пак етничките Албанци како најблизок го чувствуваат албанскиот и косовскиот народ.
* На тврдењето Ја сакам Македонија и горд/а сум на мојот народ, делумна или целосна согласност изразуваат 44% од испитаниците.
* На тврдењето „Би употребил/а физичко насилство за одбрана на честа и угледот на мојот народ“ делумна или целосна согласност изразуваат 36.8% од вкупниот број на средношколците, додека пак несогласност изразуваат 41.5%.
* На тврдењето „Мојата историја е пославна од онаа на другите народи“ , на скала од 1 до 5 етничките Македонци одговориле со просечна оценка 1,2 а пак етничките Албанци со просечна оцена од 3,3.

Четирите истражувачки трудови можат да се најдат во електронкса форма на Issuu профилот на Младински образовен форум – https://issuu.com/youtheducationalforum

Проектот има за цел да ги поврзе капацитетите и ресурсите на МОФ со знаењето и искуството на алумни стипендистите на Фондациите Отворено општество во корист на млади истражувачи, студенти и пошироката јавност во Северна Македонија. Младите и студентите немаат можност да прават истражувања и истражувачка академска работа поради ограничени ресурси – финансиски и менторски. Со овој проект беа искористени капацитетите на алумни стипендистите, со цел да ги споделат своите знаења со младите кои за прв пат се занимаваат со општествено релевантни истражувања и заедно да придонесат во креирање на квалитетни анализи кои ќе помогнат да се подобрат политиките или да се подигне свеста за важни прашања во Северна Македонија.

Презентација на резултатите од четири истражувачки трудови

Младински образовен форум (МОФ) ве поканува на промоција на резултатите од четири истражувачки труда кои се изработени во рами на Проектот за образовни центри за советување и алумни стипендисти на Фондациите Отворено oпштество.

Промоцијата ќе се одржи на 16 јули 2019 (вторник) со почеток од 18:00 часот во просториите на Јавна Соба.

Истражувачките трудови се изработени од страна на четири тима – седум млади истражувачи кои беа менторирани од искусни истражувачи, со поддршка од МОФ, и во изминатите неколку месеци работеа на своите трудови и ги креираа и финализираа истражувањата. Младите истражувачи обезбедија податоци на темите кои значајни за младите и тоа: врсничкото насилство, национализмот кај младите средношколци, работата и функционалноста на центрите за кариера и популаризирање на руралноста кај младите луѓе.

Со истражувачката работа, овие млади истражувачи го продлабочија своете знаењето за креирање подобри младински политики и разбирање на проблемите и трендовите во општеството. На промоцијата секој тим кусо ќе го презентира своето истражување и ќе ги сподели главните наоди добиени од истражувањето како и заклучоците од истото. Изработените истражувања се :

„Популаризирање на руралноста – Потенцијалите на руралното коработење и ефектот врз миграциските трендови на младите во Република Северна Македонија“ – Елена Андонова и Ѓорѓи Димески
„Улогата и работата на центрите за кариера при факултетите на Универзитетот „Св. Кирил и Методиј“ – Ангела Тасевска
„Анализа на врсничкото насилство на интернет кај средношколците“ – Симона Стојчевска
„Националистички чувства и ставови кај средношколците во Република Северна Македонија“ – Исаја Карадаковска, Емилија Божиновска и Мартина Георгиевска

Проектот има за цел да ги поврзе капацитетите и ресурсите на МОФ со знаењето и искуството на алумни стипендистите на Фондациите Отворено општество во корист на млади истражувачи, студенти и пошироката јавност во Северна Македонија. Младите и студентите немаат можност да прават истражувања и истражувачка академска работа поради ограничени ресурси – финансиски и менторски. Со овој проект беа искористени капацитетите на алумни стипендистите, со цел да ги споделат своите знаења со младите кои за прв пат се занимаваат со општествено релевантни истражувања и заедно да придонесат во креирање на квалитетни анализи кои ќе помогнат да се подобрат политиките или да се подигне свеста за важни прашања во Северна Македонија.

Повик за анкетари за теренско истражување

Повик за анкетари за спроведување на истражување за „Студентски стандард на станарите во студентските домови“

Младински образовен форум во периодот на март – јуни 2019 спроведува истражување за студентскиот стандард на станарите во студентските домови. За потребите на истражувањето, отвораме повик за 10 анкетари кои ќе бидат директно вклучени во теренското спроведување на истражувањето и внес на податоците. Теренското истражување предвидува спроведување на прашалници во студетските домови: „Гоце Делчев“, „Стив Наумов“ и „Кузман Јосифовски – Питу“, во периодот од 23ти април до 23ти мај.

За подготовка на избраните анкетари ќе биде организиран еднодневен тренинг на 22ри април 2019 година на кој е задолжително да се присуствува. За прибирање и внесување на податоците анкетарите ќе бидат ангажирани во месеците април и мај 2019 година.

Сите заинтересирани за овој повик потребно е:
• Да се полнолетни;
• Да имаат мотивација да бидат вклучени во теренско спроведување на истражување;
• Да се во можност да го спроведуваат истражувањето во текот на работно време;
• Во периодот од од 22ти април до 23ти мај да бидат во државата и во можност да го извршат анкетирањето во горенаведените студентски домови;
• Претходно искуство во анкетирање ќе се смета за предност;
• Да присуствуваат на еднодневен тренинг на 22ри април;
• Да поседуваат добри комуникациски вештини.

Заинтересираните кандидати потребно е да достават CV, најдоцна до 17ти април 2019 до 17:00 часот на policy@mof.org.mk со назнака „Пријава за анкетар“. Сите прашања за повикот може да ги упатите на истата мејл адреса.

Избраните анкетари ќе бидат известени до 19ти април за времето и локацијата за еднодневниот тренинг, а за ангажманот е предвиден финансиски надомест.

Ова истражување има за цел да открие повеќе сегменти од студентскиот живот на студентите во домовите. Преку спроведување на истраувањето ќе се добие претстава за мометалната состојба на вклучување на станарите во носењето на одлуки, условите за живот, задоволување на културните, информативните, спортско-рекреативните и други заеднички потреби на студентите.

„Проектот е финансиран од Фондација Отворено општество – Македонија. Содржината е единствена одговорност на авторите и на грантистот, и на ниту еден начин не може да се смета дека ги изразува гледиштата и ставовите на Фондацијата Отворено општество – Македонија.“

 

Тренинг за млади истражувачи

Од 15ти до 17ти февруари 2019 година, Младински образовен форум организираше тридневен тренинг за нови млади истражувачи кои имаат интерес да креираат истражувања во областите образование, политики за млади, социјални и политички прашања од важност за младите. Преку Проектот за образовни центри за советување и алумни стипендисти на Фондации Отворено општество МОФ ќе поддржи четири истражувачки трудови, спроведени од млади истражувачи под менторство на искусни алумни стипендисти на Фондациите Отворено општество.

На тродневниот тренинг младите истражувачи се запознаа со работата на Младински образовен форум и работата на програмата за Истражување, анализа и креирање на младински и образовни политики, како и со Основите на општествените истражувања.

Вториот ден, тренингот продолжи со предавања на темите: Што е истражување и креирања на истражувачки дизајн. Тимовите ги презентираа концептите за своите идни истражувања на општествени теми како што се: руралноста, насилството во образовниот систем, кариерни центри и националистичките и ксенофобичните чуства кај младите. Истражувачите слушаа предавања за главите техники и методи со кои ќе ги работат истражувањата, како квантитативни и квалитативни методи во општествените истражувања: анкета, квантитаивна анализа на содржина, интервју и фокус група, како и анализа на секундарни податоци како што е набљудувањето и основите на Академското пишување и пишување во областа на јавните политики заврши и вториот ден од овој тренинг.

Предавањата во првите два дена од овој тренинг ги одржа Марија Димитровска, докторанд на Филозофскиот факултет при УКИМ.

На третиот ден од тренингот,  тимовите се сретнаа со своите ментори кои се алумни на заедно работеа на дизајнот на истражувањето и финализирања на нивните идни истражувања.

Тренингот за нови истражувачи е поддржан од Фондациите Отворено општество.

Колку и на што троши еден студент?

Колку и на што троши еден македонски студент? 

На 11-ти декември, во ГЕМ клубот, беа презентирани наодите од истражувањето „Колку и на што троши еден македонски студент?“ кое претставува мапирање на трошоците на студентите кои студираат на државните универзитети во Македонија. Истражувањето беше овозможено со поддршка на Фондацијата Отворено општество – Македонија, а спроведено од страна на Младински образовен форум и Здружениеето на млади истражувачи и аналитичари.

Истражувањето беше спроведено во периодот февруари – март 2018 година и истото опфати 945 студенти од пет државни универзитети. Согласно истражувањето, студентските месечни трошоци или „студентската кошничка“ изнесува 21.410 ден. за студенти кои студираат со партиципација и 22.435 ден. за студенти кои студираат со кофинансирање, односно кои плаќаат школарина. Таа вклучува трошоци како партиципација односно школарина, трошоци поврзани со факултетот, трошоци за секојдневен живот, понатаму трошоци за превоз, домување но и режиски трошоци.

Студентскиот стандард е доста низок и финансиска состојба на студентите е навистина тешка. Најголемиот дел од нив живеат со родителите или старателите, кои се и најзначаен извор на финансии за студентите. На месечно ниво, за секојдневни трошоци, студентите располагаат просечно со 8.894 ден., износ кој за споредба, претставува 36,3% од просечната месечна нето-плата од мај 2018, или 74,1% од минималната месечна нето-плата во државата. Од овие средства, тие најмногу трошат на храна, алкохол и цигари, како и на хигиена и медицински производи. Најмалку трошат на културно-забавни настани, книги, списанија, весници или пак интернет-претплати.

На настанот говореа Сузана Пецаковска од Фондацијата Отворено општество – Македонија, Виктор Стојкоски од Здружението на млади аналитичари и истражувачи (ЗМАИ), Мартина Илиевска и Александра Филипова од Младинскиот образовен форум (МОФ) и проф. д-р Борче Треновски. Тие ги презентираа наодите, заклучоците и препораките од истражувањето, кое е всушност сериозен обид да се дојде до првични сознанија за тоа колку и на што троши македонскиот студент и во јавноста да се покрене прашањето: Како живее еден македонски студент?

Целосниот документ за јавни политики во кое можете да ги прочитате наодите од истражувањето е на следниов линк

Станица: Студентска по штести пат

Станица Студентска 6.0 се одржа на 29 мај 2018 година, на Филозофскиот факултет при Универзитетот Св. Кирил и Методиј.  На студентите им беше понудена  целодневна алтернативна програма исполнета со предавања, работилници, презентирање на истражувања и креативни активности.

 

Станица: Студентска имаше за цел да обезбеди простор за современи предавања кои студентите ретко имаат можност да ги следат на нивните факултети, можност да се информираат за организациите кои се отворени за нив, да учествуваат во работилници, да се запознаат со нови истражувања и да разменат искуства и контакти. Настанот го организираше МОФ со поддршка на Фондации Отворено општество.

 

На Станица: Студентска посетителите можеа да се запознаат и зачленат во 20 младински организации преку отворен саем. Дел од организациите одржаа и свои предавања на факултетот, со што Национален младински совет на Македонија, ЏЕФ Македонија, ХЕРА, ЕМСА, ИАЕСТЕ, Субврезивен фронт, КРИК, Гоу грин, Истражувачко друштво на студенти биолози, Social Impact Award, Сојуз на извидници и индивидуалци истакнати во своите полиња, дадоа придонес кон збогатување на академскиот ден на студентот.

 

Деветнаесет млади истражувачи за прв пат ги презентираа своите нови истражувачки трудови пред своите врсници, поддржани во својот потфат од МОФ и искусни ментори. Приоритетите кои тие ги избраа за своите истражувања се: условите за лица со посебни потреби во образование, дискриминацијата во образованието, емиграцијата на младите, сексуалното вознемирување во Македонија и младинската невработеност.

 

 

 

Промовирано првото истражување за мониторинг на работата на Агенијата за млади и спорт

Младински образовен форум денес го промовираше истражувањето „Мониторинг и унапредување на работата на Агенцијата за млади и спорт“ со фокус на Агенцијата како носител на креирањето и спроведување на младинските политики. На настанот говореа:  Сафет Незири од Министерството за образование и наука, Младен Фрчковски од Минстерството за труд и социјална политика, Матеј Маневски од Центар за интеркултурен дијалог, Горан Ѓорѓиев од Сојуз на извидници на Македонија, Гордана Цекова од АМС, Мартина Илиевска и Александра Филипова од МОФ.

 

Според истражувањето за перидот 2014-2016г, соработката помеѓу Агенцијата за млади и спорт (АМС) и другите институции била на ниско ниво. Имало малку заеднички проекти и нема уредна документација за активностите. Агенцијата имала константна соработка единствено со МОН и одредена соработка со МИОА, АВРМ и Министерството за култура. Со Министерството за локална самоуправа немало соработка, додека Агенцијата за администрација и МТСП не располагале со информации за соработка со АМС.

 

Соработката со младинските организации била посебно слаба. Во минатите години агенцијата делувала сегрегирачки кон младинските органзации и соработувала само со малку од нив. Од 2014 до 2016 Агенцијата имала потпишано само 11 меморандуми со 6 организации што е мал број за период од три години. Односот на агенцијата кон младите и општата јавност придонел да биде перцепирана како „агенција за спорт“ која ги исклучува младите од своето делување.

 

Правна рамка за млади речиси и да не постои. Освен Националната стратегија за млади, нема правен акт ги уредува прашањата во областа „млади“. Креирање на Закон за млади или Закон за младинско учество е клучно за да регулираат правните празнини, а Агенцијата да добие јасни насоки за да може успешно да ги исполнува своите цели и приоритети.

Според препораките на истражувањето Агенцијата треба да го зајакне секторот млади, да ја ревидира стратегијата за млади и да започне квалитетен процес за креирање на акциски план за млади за 2018-2019. Агенцијата треба воспостави и модели за поддршка на младинските организации.

 

Истражувањето е реализирано во периодот јуни 2017 – јануари 2018, со фокус на соработка со младински организации, соработка со државни институции, правна рамка, внатрешно уредување и работење и перцепцијата на младинските организации и младите.

 

Проектот „Мониторинг и унапредување на работата на Агенцијата за млади и спорт“ е реализиран од страна на Младински образовен форум во периодот од јуни 2017 до јануари 2018 година. Проектот е поддржан од проектот “Граѓанска алијанса за транспарентност – Набљудување на процесот на реформи на јавната администрација од страна на граѓанските организации”, имплементиран од “Фондација Отворено општество – Македонија” (ФООМ) и “ЕВРОТИНК – Центар за европски стратегии”, и е финансиски поддржан од Европската унија во рамки на IPA Civil Society Facility and Media Programme 2015.