Преглед на мартовските активности на Младински образовен форум

Младински образовен форум во чии рамки активни се неколку младински програми и тоа дебата, учиме право, медиа/арт, клубови за демократско учество, новинарски клуб и клубови за претприемништво,  направи преглед на своите мартовски активности.

Во рамки на дебатната програма се одржа предавањето „Шар Планина: национален парк или национална мета?“ во соработка со Институтот за комуникациски студии, потоа онлајн предавањето „Како да се спречи загадувањето од рудниците?“, мастеркласови за критичко размислување и Интернационален дебатен турнир за средношколци.

Онлајн предавањето „Шар Планина: национален парк или национална мета?“, се одржа на 23 март, во склоп на кампањата „Разбистри се“, а на предавањето учесниците се запознаа со кризата со која се соочува Шар Планина во поглед на нејзината борба за да стане најмладиот национален парк на Северна Македонија.

Онлајн предавање за Шар Планина

Онлајн предавање „Како да се спречи загадувањето од рудниците?“, се одржа на 18 март, а на ова предавање двајца студенти од ПМФ на повеќе од 80 учесници им објаснија која е поволноста од рударството, зошто се прави, но и кои се штетите кои рударството го има врз околината.

Онлајн предавање за опасноста од загадувањето и рудници

На 21 март се одржаа третиот и четвртиот мастерклас од младинските пакети, каде што 40 деца се запознаа со поимот критичко размислување и како истиот може да се користи во секојдневниот живот, при восприемањето на медиумски содржини. Додатно, учесниците се запознаа и со историјата на реториката и аргументираното изразување и како може една личност да стане добар говорник. Овој мастерклас е дел од Младинските пакети организирани од страна на Еквалис во соработка со МОФ, Хера и Психотерапика, а поддржани од страна на Фондација отворено општество.

На 27 март се одржи и петтиот, односно последниот од мастеркласовите за критичко размислување, на кое учесниците научија како тоа може да се искористи во секојдневниот живот.

Во текот на месец март, членовите на дебатната програма на МОФ учествуваа на интернационален дебатен турнир во форматот WS организиран од страна на дебатното друштво во Љутомер, Словенија.

Во склоп на програмата „Учиме право“ беа одржани неколку „ЈЕС“ предавања, а во „Europe House Skopje“ се одржа и квизот за работата на Европската Унија и нејзините институции – „Евроквизија“. Истовремено, членовите на оваа програма остварија и посета на Народниот правобранител во Тетово.

Во изминатиот месец членовите на клубовите за Младински претприемачки вештини ги слушаа предавањата за Јавно презентирање и пичинг,  кое беше менторирано од еко активистот Горјан Јовановски, кој е најдобро познат по неговата апликација „Аircare“.

Предавањето по Социјално претприемништво го менторираше Марија Матовска која има долгогодишно искуство во вметнување на социјален елемент во традиционалните бизниси, додека менторка на предавањето за Дигитален маркетинг беше Теодора Филовска која покрај својата меѓународно успешна компанија за маркетинг „Vrootok“ е сопственичка и на Академијата „Галексија“.

Онлајн предавање за социјално претприемништво

Освен редовните предавања, членовите имаа можност и да го проследат отвореното предавање на Софија Богева за „Design Thinking“, која е консултант за иновации, креатор на креативна содржина, design thinking фасцилитатор, тренер и консултант за стратегиски иновации.

Истовремено, над 50 средношколци од целата држава се натпреваруваа на „Евроквизија“ – натпревар за работата на Европската Унија. Во финалето влегоа најдобрите 20 учесници, а првите три места ги освоија Дарко Ефтимов, Марко Ингилизов и Мартина Костадинова. Тројцата победници беа поканети на средба со евроамбасадорот каде неговата екселенција им ги врачи заслужените награди.

Атмосферата на „ЕвроКвизија“

Членовите на почетниот клуб од програмата „Учиме право“ имаа посета на канцеларијата на Народниот правобранител во Тетово. Тие имаа шанса да се запознаат директно со работата на Народниот правобранител како институција за заштита и промоција на човековите права и слободи. Институцијата веќе петта година по ред е отворена за младите и членовите на Младинскиот образовен форум.

 

Од посетата на народниот правобранител во Тетово

Во склоп на програмата за младински активизам се одржа конференцијата за социјален активизам кај младите – „Еngage youth“, онлајн предавањето на тема „Техники за подобро учење, помнење и справување со онлајн настава“, а беше објавено и видеото „Имам право на знаковен јазик“.

Во склоп на конференцијата „Engage youth“, млади активисти споделија знаења и искуства на теми поврзани со граѓанска ангажираност, социјална промена, слобода на говор, технологија и иднината на образование. На настанот учествуваа повеќе од 70 млади луѓе на „Зум“ и стрим преносот на Фејсбук. Конференцијата се одржа на 30 март, на платформата за видео комуникација „Зум“.

Предавањето „Tехники за подобро учење, помнење и справување со онлајн настава“го одржаа Ивана Цилевска и Клементина Добревска од „Психеско“. Учесниците на предавањето се здобија со корисни техники и совети за подобро учење и помнење. Дополнително, се дискутираше и за тоа како полесно да се менаџира со онлајн наставата, но и како учениците директно да се справат со стресот од ваквата настава преку примери и дискусија. Предавањето го посетија повеќе од 100 млади луѓе на „Зум“ и стрим преносот на „Фејзбук“.

Видеото „Имам право на знаковен јазик“ има за цел да го потенцира проблемот со кој се соочуваат младите глуви и наглуви лица, да ги повика институциите за одговор на барањата и соодветно решавање на ситуацијата.

Видеото е реализирано од Младински образовен форум, „Млад знак“ и Фондација за демократија на Вестминстер. Видеото доби над  6100 прегледи.

Во склоп на програмата за Истражување, минатиот месец беше промовиран документот „Млади во криза 2.0“, преку кој се анализаат егектите од пандемијата врз младите. Истовремено, во рамки на оваа програма беше упатена јавна реакција во врска со наодите споделени од неколку медиуми поврзани со Државниот универзитет во Тетово (ДУТ).

Преку документот „Млади во криза 2.0“, група младински организации во Агенцијата за млади и спорт споделија препораки до институциите како да се поддржат младите при кризата.

Младинските организации апелираа институциите да ги земат во превид младите како клучна група при носењето на мерки за справување со здравствено-економската криза. Тие препорачаа да се олесни (ре)вработувањето на младите, но и да се поддржат преку поврат на персоналниот данок и ваучери за домашна потрошувачка на оние на кои им се најпотребни.

 

Младинските организации посочија дека образованието на далечина треба да стане достапно и за учениците со попреченост. Кризата и социјалната дистанца влијаат негативно на менталното здравје, за што стручните служби во улиштата мора да обезбедат активности за учениците, а државата да обезбеди сервисни линии за психолошка поддршка и линии за жртви на семејно насилство. Законот за младинско учество и младински политики не треба да чека да заврши кризата, треба да се работи на неговата имплементација, заедно со младинските организации.

Членки на иницијативата „Млади во криза“ се Младински образовен форум, Реактор – Истражување во акција, Здружение за истражување и анализи (ЗМАИ), ХЕРА, Центар за интеркултурен дијалог, Сојузот на извидници, Младински сојуз – Крушево, Еквалис, Психотерапика, ХОПС, Национален младински сојуз на Македонија, Хелсиншкиот комитет за човекови права и АРНО.

Во рамки на програмата „Истражување“ при МОФ, беше упатена јавна реакција во врска со наодите споделени од неколку медиуми поврзани со Државниот универзитет во Тетово (ДУТ).

Реакцијата може да ја прочитате тука.

Онлајн дебатно првенство за почетници 2021

На 12, 13 и 14 февруари се одржа годишното Национално дебатно првенство за почетници, овој пат во онлајн верзија. Првенството беше одржано на платформата mixidea.org којa e специјално опремена за компетитивна дебата. На првенството учествуваа 38 дебатери во категоријата почетници. Сите од нив беа дојдени да ги покажат своите новостекнати дебатни способности и да ја земат титулата за најдобар тим.

На првенството имаше четири прелиминарни рунди, полуфинале и финале. Учесниците дебатираа на три тези, од кои две беа импромпту тези, дадени 45 минути пред почетокот на рундата. Главната теза на првенството гласеше – Во места со високи нивоа на криминал, ОДВД е оправдано поединци своеволно до спроведуваат правда (на пример Бетмен), додека двете импромпту тези гласеа ОД, како матурант во 2021, би ја бојкотирал наставата, дебатирана во четвртата рунда и ОД претпочита свет во кој луѓето не стапуваат во романтични врски пред да наполнат 18 години, која ја дебатираа нашите полуфиналисти.

Победници на ова Онлајн национално дебатно првенство за почетници 2021 беше тимот Нинџа желки, составен од Јана Кокиноска и Ева Цветкова. Второто место го зазема тимот DB8, претставен од Ева Ставрева, Бранислав Максимовски, Миа
Мојсовска. На првенството исто така се прогласија и најдобрите говорници кои беа: на третото место Карла Станков, на второто Лука Кадриќ и првото место го зазема Леонардо Змајшек.

Одржан меѓународен онлајн дебатен камп 4-6 декември 2020

Изминатиот викенд Младински образовен форум успешно ја организираше првата Онлајн дебатна академија на овие простори. Настанот, кој се реализираше од 4-ти до 6-ти декември, беше спроведен на платформата „Дискорд“ и опфати повеќе од 70 дебатери од Северна Македонија, Србија, Косово, Албанија, Романија, Словенија и Словачка, како и неколку искусни дебатни тренери од Словенија, Летонија и Северна Македонија.

Дебатната академија опфати три теми кои беа креирани за почетниците во светот на компетитивната дебата, како и за искусните дебатери. На Академијата, почетниците имаа можност да се запознаат со темелот на компетитивната дебата, напредните дебатери добија увид во комплицираните концепти на дебатата од натпреварувачки карактер, како анализирање на теза и пронаоѓање на доказ, а најискусните ја изучуваа познатата Британска парламентарна дебата.

 

Покрај продлабочување на своите дебатни знаења, учесниците на Академијата имаа можност и да слушнат неколку отворени изборни предавања на теми како технологија, вештачка интелигенција и нивниот импакт во реалниот свет, како и сите полемики кои произлегуваат од овие технолошки пронајдоци.

Овој проект е финансиран од Европската унија и организиран од IDEA NL и Младински образовен форум како дел од „Иднината на Европа“ дебатите

Децата преземаа владин состанок на високо ниво: „За децата, од децата – иднината на образованието“

По повод 20ти ноември, Светскиот ден на Младите, Младински образовен форум, во соработка со УНИЦЕФ, Делегацијата на Европската Унија и Владата на Република Северна Македонија организираше Kids Takeover – преземање на владиниот состанок на високо ниво од страна на младите средношколци од земјата.

На овој состанок, под мотото „Како ја замислуваш ти иднината на образованието?“, младите средношколци имаа можност да ги претстават своите ставови по ова прашање пред членовите на Владата.

На средбата присуствуваа претседателот на Владата г. Зоран Заев, министерката за образование и наука г-а Мила Царовска, министерката за труд и социјална политика г-а Јагода Шахпаска, министерот за животна средина и просторно планирање г. Насер Нуредини, претставничката на УНИЦЕФ во Република Северна Македонија г-а Патриција Ди Џовани и шефот на делегацијата на Европската Унија г. Дејвид Гир. Тие заедно со 6 младински застапници зборуваа за иднината на образованието во Република Северна Македонија.

Шесте младински застапници од повеќе училишта ги презентираа своите излагања, каде се фокусираа на:

  • Подобрување на квалитетот на предавањето;
  • Намалување на дигиталниот јаз во образованието;
  • Менталното здравје и меѓуврсничкото насилство во образованието;
  • Вреднувањето на вештините за учење наспроти помнењето факти;
  • Трансформација кон еко-училишта;
  • Квалитетно и инклузивно образование;

Во нив, тие ги наведоа клучните проблеми и недостатоци со кои, според нив, образованието во нашата земја се соочува и дадоа голем број на совети и препораки за тоа што можат институциите да направат за нивно решавање.

Дел од изјавите на младинските застапници беа:

„Кога станува збор за праведното образование треба да се бориме со сите сили првенствено да го оствариме и да не го загрозиме основното право на секое дете, а тоа е правото на образование. Првенствено треба да започнеме со едукација на најмалите, односно да се избориме со сите пречки и бариери кои ќе ни ја попречат еднаквоста, а потоа и инклузијата.“ – Христина Јовчевска, средношколка.

„Нашите училишта со ниската енергетска ефикасна градба и со тоа што голем дел од нив се греат на нафта, мазут или јаглен влијаат врз загадувањето, како и на климатските промени. Образованието за климатски промени и еколошкото образование се на многу ниско ниво. Да не дозволиме да дојде до време кога нема да може да се направи ништо.“ – Васил Ханџиски, средношколец.

„Учениците повеќе учат и памтат факти отколку да се подготвуваат за критичко и аналитичко размислување, да се развива слободарскиот дух, што значи дека учениците треба да ја разиваат слободата на мислење и на изразување! Подобрувањето на начинот на учење во ниту еден случај не може да се постигне само преку една институција или пак личност, ниту пак за еден ден, туку треба да биде колективен напор од сите страни, вклучително и учениците и професорите.“ – Ерјона Азизи, средношколка.

„Сакаме да живееме во држава во која различностите ќе бидат гледани како мост помеѓу нас-обичните луѓе со секој со своја необична приказна. Сакаме да живееме во систем во кој кон менталните нарушувања нема да се гледа со презир, туку ќе се пристапува со емпатија. Сакаме низ образовниот процес секој ученик да го добие потребното внимание, а силеџиството да се санкционира најстрого, без исклучоци.“ – Сара Ковачовска, средношколка.

„Во моментот додека јас зборувам тука пред Вас, 40.000 мои соученици се приморани да бидат исклучени од моменталниот образовен процес и да ја следат наставата преку своите телевизори. Финансиската состојба не треба и не смее да биде предуслов за еднакво достапно образование.“ – Кудрет Феризи, средношколец.

„Квалитетната настава претставува предуслов на едно развиено општество. Креирањето и спроведувањето на квалитетната настава знае да биде предизвик. Некогаш е тешко да се фокусираме и да го најдеме крајот од каде треба да започнат промените, меѓутоа никогаш не треба да престане работењето кон подобрување на наставата.“ – Кристијан Поповски, средношколец.

На ваквиот настан, минатата недела му претходеше и тридневна обука во која младинските застапници ги изградија вештините преку кои ќе се застапуваат за квалитетно реобмислување на образованието. На оваа обука тие учеа за младински политики, квалитетно образование, основи на јавно говорење и градење на квалитетни аргументи со цел да се подготват да го преземат денешниот владин состанок.

 

Повик за нови членови во Младинските клубови на МОФ во 2020 година!

Драги средношколци, Младински образовен форум отвора повик за нови членови во младинските клубови!

Клубовите на МОФ ќе ти овозможат да се предизвикаш себе си, да научиш многу во неформална атмосфера и да се вклучиш на бројни онлајн и офлајн локални, национални и меѓународни настани. Опкружувањето со супер друштво ќе те мотивира да се подобриш и да стекнеш нови искуства и знаења надвор од формалното образование.

Кој клуб е за тебе, зошто би се вклучил во младински клуб и како ќе изгледаат предавањата во текот на следната година, се информации кои ги има подолу во оваа објава. Разгледај ги описите на клубовите подолу во текстот и одбери каде ќе се вклучиш. Резервирај го своето место!

Во согласност со учебната година, предавањата во клубовите за средношколци ќе започнат во текот на ноември 2020, а ќе се случуваат онлајн се додка состојбата не дозволи да се дружиме во живо.  Термините во кои ќе се одржуваат неделните предавања ќе се договорат помеѓу членовите и предавачите на клубовите.

Линк до прашалникот за пријавувањекликни тука

АРТИВИЗАМ

Сакаш да експериментираш со уметноста како средство за слободно изразување? Сакаш да дознаеш како да станеш младински активист? Дали си склон кон стекнување нови знаења, нови другарства и нови идеи? Ти треба креативна слобода?

Тогаш клубовите – Артивизам во склоп на МОФ се местото каде што треба да членуваш. Артивизам е можност за тебе да практикуваш слобода на изразување и да се запознаеш со креативни начини за пренесување на своите ставови, интереси, афинитети, склоности, барања и идеи.

Во Артивизам клубовите ќе имаш можност да ги изградиш своите капацитети, дознаеш повеќе за себе и околината, стекнеш вештини и знаења, се забавуваш и креираш нов круг на пријатели.

Секоја година, повеќе од 200 членови од различни градови имаат можност од да научат за граѓански активизам, медиумска писменост, креирање младински весници, фанзини, мурали уметност, стенсили, стикери, постери, фотографија и видео прилози.

ДЕБАТА

Преку глава ти е од неорганизираните и безвредни дискусии кои секојдневно ги слушаш околу тебе?  Сакаш да научиш како вистински да дебатираш и да ја победиш секоја дискусија со пријателите и соучениците?  Или пак можеби имаш желба конечно да ја победиш вечната трема од јавни настапи и презентации и да станеш добар оратор?

Ако одговорот на барем едно од овие прашања е да, тогаш дебатната програма е вистинското место за тебе!

Дебатниот клуб на МОФ оваа година онлајн продолжува со својата работа! Во склоп на неделните предавања, ќе  научиш за компетитивна дебата, техниките за одржување на говор, побивање, аргументирање на туѓи аргументи и анализирање на теми од различни области и сфери. Ти и твојот тим ќе можете да се натпреварувате на локални, национални и меѓународни дебатни турнири.

Стани дел од дебатен клуб, и во следната дискусија наместо да го повишиш тонот, ќе го подобриш аргументот.

УЧИМЕ ПРАВО

Знаеш ли дека не смееш да повторуваш учебна година? Секој ученик има право на дополнителна и додатна настава. Дали се прашуваш што ти се случува кога ќе добиеш закана за бркање од училиште со 10 неоправдани?

Членовите на Учиме право клубовите имаат можност практично да се запознаат со работата на државните институции и службеници преку посети на рочишта во Основните судови, седници на општинските совети, средби со градоначалниците, претседателот на државата како и посети во разни институции и министерства. Ваквите активности се уникатен пристап и можност, за проучување на институционалниот систем, како на локално, така и на национално ниво.

Учиме право клубовите се насочени и кон подигање на свеста за средношколските права, организирање и учество. Преку предавањата, членовите ќе имаат можност да ги запознаат своите права и обврски во училиштето и заедницата, начините на кои може да ги остварат, но и механизмите преку кои ќе може да ги заштитат. Преку ова, Учиме право клубовите придонесуваат кон изградба на активни млади, гласноговорници против сите форми на потиснување на правата и активни чинителни во процесите на креирање политики кои нив ги засегаат, затоа зачлени се!

Доколку ви се потребни повеќе информации може да ни се обратите:
преку порака на facebook или Instagram страната на МОФ,
на obuki@mof.org.mk, или пак
на телефонскиот број: 02/3139-692

 

Младинските клубови на МОФ се дел од проектот за Ангажирање на младите за студентски и младински политики финансиран од Фондација Отворено општество – Македонија и дел од Проектот за младинско изразување финансиран од Европската Унија.

Одржан првиот онлајн тренинг за тренери за средношколските клубови на МОФ

Триесетина млади луѓе од целата земја беа дел од првиот Онлајн Тренинг за Тренери за средношколските клубови на МОФ. Тренингот за нови дебатни тренери се одржа на 26-ти и 27-ми септември 2020, додека пак оние за тренерите за клубовите за артивизам и средношколските учиме право клубови се одржаа на 3-ти и 4-ти октомври.

Ваквиот тренинг, кој редовно се одржува на почетокот на секоја учебна година, има за цел да ги обучи нашите нови тренери за водење на онлајн клубовите во текот на претстојната година.

Во склоп на дводневните обуки беа реализирани неколку предавања на кои учесниците се запознаа со годишниот курикулум и тематските целини кои програмите ги нудат на своите членови. Ним исто така им беа пренесени и многубројните методолошки знаења, вештини и концепти за работа со млади средношколци од страна на нашите поискусни тренери.

Дополнително, учесниците беа обучени и како да ги водат и менаџираат своите идни клубови во текот на годината, но беа запознаени и со различните виртуелни алатки и платформи со помош на кои би реализирале современи и интерактивни онлајн предавања. Па така, дел од целите на овие тренинзи беа и пренесување на конкретни методолошки знаења и вештини за онлајн работа со млади луѓе. Учесниците беа запознаени со сите општи насоки, методи, техники, материјали, содржини и обврски за ефективно водење на клубовите. Тренингот ги запозна учесниците со методите на неформалното образование, одредени интерактивни пристапи во пренесување на знаења, вештини и креирање на предавања за млади.

Ѓорѓи Димески и Соња Митиќ работеа со новите дебатни тренери, Фари Хисени и Ристо Савески го спроведоа тренингот за новите учиме право предавачи, додека пак Ивона Кузмановска и Панде Ефтимов предаваа на обуката за новите предавачи во клубовите за артивизам.

Главната цел на овој Тренинг беше да се обучат идните тренери успешно да ги пренесуваат своите знаења од полето на дебатата, младински активизам и учиме право на помладите членови, но и да им помогнат во приспособувањето на кон онлајн предавањата кои би се реализирале во текот на оваа учебна година.

Обуките за новите предавачи на младинските клубови на МОФ се спроведоа во рамки на проектот за Ангажирање на младите за студентски и младински политики и со поддршка од Проектот за младинско изразување, финансиран од Европската Унија.

 

70 учесници на Онлајн Младинската Академија ја креираа првата Декларација за млади

Изминатава недела, 17-20 август, тимот на МОФ ја организираше првата Онлајн Младинска Академија. Настанот, кој традиционално се одржува во летниот период, овојпат за прв пат беше реализиран во онлајн форма, преку виртуелната платформа за видео-комуникација Дискорд.

Летната Академија, која МОФ годинава ја организираше по деветти пат, на повеќе oд 70 средношколци им понуди разни неформални предавања и содржини кои имаа за цел да го продлабочат нивното знаење,  да ги запознаат со начините за активно вклучување во општеството и критичко размислување со цел поголем придонес кон позитивни промени. Оваа година, како продолжеток на претходната Младинска Академија, учесниците се вклучија во креирањето на првата национална Младинска декларација – Youth Print – документ кој ќе ја подобри младинската позиција во општеството.


Содржините на Онлајн Младинската Академија беа поделени во четири модули – секој со различен пристап кон остварување на целите за подобро и поголемо младинско учество во општеството. Покрај одбраните модули, младите имаа можност да слушнат и неколку неформални отворени предавања на разни теми и области како: ментално здравје, одржливо живеење, претприемништво, продукција на музика, театар.

Првпат сум дел од вакво нешто, но пресреќна сум што се пријавив. Преубаво искуство и корисно исполнето време“, сподели со нас Наталија по завршувањето на Летната Академија.

Таа, заедно со уште дваесетина средношколци, учествуваше на траката за Академско Пишување 101 каде научија нешто повеќе околу начинот на кој се подготвува еден академски труд, како правилно се истражува за него, но исто така научија и како се пополнуват некои поважни документи и барања со кои ќе се среќаваат во текот на нивниот понатамошен академски живот.

Продуктивно искористено време! Интеракција меѓу членовите, комуникација без предрасуди и сочуство/разбирање на едно високо ниво. Доколку барате можност да го искажете вашето мислење без да бидете отфрлени со фразата ,,Што знаеш ти? Мал/а си!” и истовремено да научите нови корисни нешта оваа академија и воопшто МОФ е вистинското место за тоа. Едвај ги очекувам следните активности“, вели Христина, која пак учествуваше на траката за Виртуелно Аргументирано Изразување која се фокусираше да ја подобри примената на аргументациските вештини и способности во виртуелниот свет кај учесниците, како и подетално да објасни што претставува аргументот и критичката мисла и зошто се тие важни во денешниот свет.

„Прекрасно искуство за секој кој сака да научи нешто повеќе од она што се учи на училиште, да се запознае со многу нови деца и да сподели мислење, искуство, впечаток… Мене лично премногу ми се допадна академијата, предавањата, дебатите и многу ми е жал што заврши и едвај чекам да се организира уште еднаш нешто слично, затоа што по оваа академија се исполнив со многу позитивна енергија“, споделува Маја за нејзиното учество на Летната Академија како дел од траката за Аргументирано Изразување.

„Академијата беше едно ново искуство за мене каде можев да научам и слушнам нешто што никој не го споменал во училиште. Во изминативе 4 дена имавме можност да ги изнесеме своите идеи за подобрување на животот на младите во нашата земја, а со тоа да создадеме и нови пријателства“, вели пак Матеја за своето учество во траката за Академско Пишување.

Иако условите беа далеку од идеални и целосно беше оневозможена дружбата во живо, сепак првата Онлајн Летна Академија на МОФ заврши навистина успешно и ги реализираше своите зацртани цели – да им овозможи на младите простор и платформа да ги искажат своите ставови, да бидат ислушани и да ги продлабочат нивните знаења и можности за повисоки цели. И, секако, да им овозможи место за создавање нови пријателства со врсници од целата држава.

Целосната верзија на документот Младинска Декларација ќе биде промовиран и потпишан од носителите на одлуки и креатори на политики во периодот кој ни следи.

Им благодариме на сите предавачи, учесници и организатори на академијата кои го овозможија ова четири-дневно дружење.

Оваа активност е дел од Проектот за Младинско изразување, финансиран од Европската Унија.

 

 

 

 

 

Јавни дебати: Слобода на изразување во три чина

Младински образовен форум, во рамки на својата дебатна програма, го најавува новиот Циклус на Јавни Дебати: „Слобода на изразување во три чина“.

Општествените проблеми со кои секојдневно се среќаваме и за кои се водат безгранични дискусии, честопати ја заматуваат сликата за суштината на самите проблеми и потребата од нивно решавање.

Ваквата појава се повеќе ја поставува потребата од организирана дискусија на дадената тема, се со цел јасно да се увиди која е позадината зад целиот проблем и како до негова солуција.

Токму организираните и аргументирани дебати се решението на овој проблем. Почнувајќи од 4ти август, во текот на ова лето МОФ ќе одржи 3 Онлајн Јавни Дебати водени од искусни дебатери и тренери од нашите клубови. Дебатите ќе бидат стримани во живо на Фејсбук страната на Младински Образовен Форум и ќе покријат теми од неколку различни области кои ја диктираат сферата на дискусии во јавниот простор денес.

Дополнително, пред одржувањето на секоја од дебатите, публиката ќе може да им постави прашања на говорниците поврзани со самата тема на дискусија. Прашањата ќе можат да се постават на инстаграм профилот на МОФ (@youtheducationalforum), во текот на целиот ден пред одржувањето на дебатата.

Повеќе информации околу одржувањето на Јавните Дебати ќе можете да најдете на Фејсбук настанот (линк од евентот) на МОФ, како и на нашиот Инстаграм профил (и тука линк од профилот).

Дебатите се организираат во рамки на Проектот за младинско изразување. Проектот е финансиран од Европската Унија.

Одржан онлајн курс за средношколска дебата

Во периодот од 18-ти јуни до 9-ти јули, дебатната програма на МОФ организираше краток онлајн Курс по Дебата и Аргументирано изразување во соработка со Американското Катче во Битола. Курсот беше наменет за средношколци од повеќе училишта и се состоеше од четири онлајн предавања преку платформата Google Meet.

Предавањата кои ги одржаа Јаков Тушевски и Весела Трајкоска имаа за цел да им ги доловат на учесниците основите на Дебатата како основна алатка за организирана и аргументирана дискусија. Тие беа поделени во четири целини кои се предаваа на неделно ниво со цел подетално и подробно објаснување на самите елементи.

Учесниците (15 средношколци) во текот на курсот научија што е дебата, зошто е таа важна за општеството во кое живееме, какви видови на дебата постојат и каде и во кои се форми таа се среќава. Покрај тоа тие научија и за основниот елемент во дебатата – аргументот. Фокусирајќи се на овој елемент, тие научија што всушност тој претставува, кои се неговите елементи и низ практични примери се здобија со вештини за градење на еден правилен и целосен аргумент.

Покрја ваквите основни елементи, учесниците се здобија и со практични знаења од областа на анализа на теми и проблеми, како преку индкуција на големите и обемни проблеми да ги согледаат нивните чинители и да дојдат до нивно решавање.

На самиот крај на курсот на учесниците им беше прикажано како да искористат сѐ што научиле во претходните предавања за да состават еден аргументиран говор, поминувајќи ги сите стилски аспекти на јавното говорење и пронаоѓање и подобрување на индивидуалниот говорнички стил.

Отворен повик за учесници на: Онлајн Младинска Академија 2020

Онлајн Младинската Академија 2020 е првата онлајн младинска академија на МОФ. Академијата ќе понуди содржини преку кои учесниците ќе може да се запознаат со начините за активно вклучување за социјалните промени преку искористување на виртуелниот простор, но и ќе учествуваат во креирањето на првата национална Младинска декларација – Youth Print – документ кој ќе ја подобри младинската позиција во општеството.

Повикот е отворен за сите млади од 15-18 години кои периодот 17-20 август 2020 година сакаат да го поминат работејќи на своите вештини за критичко размислување и општествена вклученост, преку активности за неформално образование.

Пријавувањето е отворено заклучно со 2-ри август (недела) 2020 година, а сите заинтересирани млади, можат да го прочитаат описот на Траките на Младинската Академија (достапен подолу) за да ја изберат својата трака, па да се пријават со пополнување на следниот прашалник. Доколку имате прашања, можете да пишете на следната мејл адреса: akademija@mof.org.mk.

Секој учесник ќе има прилика да избере една од траките (ПОДКАСТирање 101, Виртуелно аргументирано изразување, Онлајн (не)правда и Академско пишување 101) и да учествува во сите активности планирани и креирани за академијата. Покрај предавањата по траки и Youth Print сесиите, ќе имате можност да изберете помеѓу интересните предавања кои ги подготвивме за вас од областите: ментално здравје, аrtificial intelligence, space law, sustainable living, продукција на музика, претприемништво и театар. Младинската академија претставува збир од активизам, образование, пријателство и создавање на социјална промена, а се организира преку Проектот за младинско изразување. Проектот е финансиран од Европската Унија.

 

ОПИС НА ТРАКИТЕ:

ИАКМОП – Академско пишување 101

Разум губиш со „фусноти“1, а треба да изработиш онлајн презентации? Веќе си добро запознаен со „writer’s block?

Сакаш да научиш како правилно да истражиш, да стигнеш до вистинските факти и да изработиш истражување на која било тема?

На траката Академско пишување 101 ќе имаш можност да се запознаеш со основите на академско пишување и презентирање на факти. Ќе се стекнеш со вештини и трпение за истражување кои понатаму ќе ти послужат за изработка на писмени работи, училишни проекти и проектни задачи без да гуглаш „izrabotka na seminarski eftino“.

Преку Академско пишување 101 ќе вежбаш критички пристап кон информации и презентирани наоди, а ќе се запознаеш со многу нешта кои досега не си имал/а прилика да ги научиш во училиште, а честопати се интегрален дел од сите твои оцени, особено во онлајн наставата.

Посветените ментори со големо истражувачко искуство ќе соработуваат со тебе, насочувајќи те низ алатките и гигабајтските лавиринти од симнати, но непрочитани текстови, па под нивно менторство ќе може да се изработи и кус истражувачки текст кој потоа ќе биде објавен на веб страната на МОФ.

(1) белешка под текстот што објаснува поблизу некои делови од текстот или споменатиот податок, односно термин. Подножната белешка се означува со натпис во облик на горен индекс или со ѕвездичка на горната десна страна од последната буква на зборот во текстот.

 

Учиме право – Онлајн (не)правда

Пионери, пионерки, хакери и сајбер ѕверки?

Те нервира кога ќе видиш злоупотреба на социјалните мрежи, но не знаеш како да го посочиш проблемот, освен спамање на „Фејсбук“ со пријави?

Сакаш да се запознаеш со онлајн бонтонот и ти се зборува за онлајн булинг и слободно изразување на социјалните мрежи?

На траката Онлајн (не)правда ќе ги дознаеш твоите права на онлајн платформите, нивните граници и како да се заштитиш кога се чувствуваш загрозено. Ќе се запознаеш со концептот на авторски права и начинот на преземање и споделување содржини. Дополнително, ќе имаш можност да слушаш предавања на тема сајбер булинг и каде да се обратиш ако онлајн правата ти се прекршени.

Траката за онлајн (не)правда ќе посочи на големата слика и ќе те научи како свесно да објавуваш и споделуваш информации на интернет. Секое снимено видео, секоја испратена слика, статус и твит имаат милиони начини за интерпретација, па некои од нив може да доведат до можно загрозување на угледот и секојдневието на корисниците на виртуелните алатки.

 

Младински активизам – ПОДКАСТирање 101

Имаш многу да кажеш, но те фаќа трема пред камера?

И Спотифај пристигна кај нас, а тебе ниедна содржина таму не ти фаќа 👀
Тогаш креирање сопствен подкаст е решението за тебе!

На првата онлајн Младинска Академија на МОФ, на траката „Подкастирање 101“ ќе имаш можност да се запознаеш со основите на правење подкаст и да ја сефтосаш својата идеја за аудио изразување во тим со други средношколци од целата држава. Искусни аудио новинари од Радио МОФ ќе го пренесат своето знаење, вештини и tips and tricks, ќе ги споделат и тајните на правење подкаст среде пандемија, за кон крајот на Академијата ти да работиш на твојот прв подкаст кој ќе биде објавен на Радио МОФ.

Покрај техничката основа, опфатен ќе биде и креативниот дел од продуцирањето подкаст – бирање теми, гости, презентација во онлајн просторот, однос со публика…

П.С. Радио МОФ е во постојана потрага по млади кои сакаат да го искористат аудио просторот за споделување интересни содржини, па ако ептен се пронајдеш во креирање подкасти можноста за сопствен подкаст кој би одел на Радио МОФ е отворена.

 

Дебата – Виртуелно аргументирано изразување

Те фаќа сафра, лето е и сонце пече, а има пандемија?

Сметаш дека социјалните мрежи не се добра платформа за аргументирана дебата, а ти имаш толку многу да кажеш и споделиш?

Приклучи се на дебатната трака за оваа летна академија! Предавањата на Дебатната програма на МОФ се фокусираат на примена на аргументациските вештини и способности во виртуелниот свет и plot twist 🤯 во онлајн сферата!

Предавањата ќе содржат осврт и објаснување на основните дебатни алатки и критичко размислување, односно аргументот и аргументираното изразување, како и детална анализа на елементите на овие алатки и нивното правилно користење во реалниот, но и во виртуелниот свет.

Траката ќе се осврне кон фактичкото поддржување на ваквите аргументи, односно како да се искористат онлајн алатките и методите кои се нудат денес за да се направи едно правилно истражување и наоѓање на издржани примери и докази.

На самиот крај, на предавањата ќе се посвети време да се објаснат разните вештини за презентирање на целосно аргументираните ставови во поддршка на критичкото размислување, со особен осврт кон методите за јавно изразување, како и сите останати презентациски вештини.

Академијата се спроведува со поддршка од Град Скопје во рамки на проектот за Младинско изразување финансиран од Европската Унија.