Младински образовен форум и Радио МОФ ве покануваат на осмото издание на ENGAGE – Kонференција за социјален активизам. Со 10 говорници, 300 гости во публика и видео-пренос, ENGAGE и оваа година ќе обезбеди едукација, интеракција и инспирација за индивидуалци, групи и организации чија цел е да го подобрат општетството во кое живееме.

На 18 мај (сабота) 2019 со почеток од 12:00 часот, во Кино Култура – Скопје, по осми пат, домашни и странски активисти ќе споделат знаења и искуства на теми поврзани со граѓанска ангажираност, активизам на јавен простор, слобода на говор, социјална правда, животна средина, човекови права, права на животни, култура и можностите за граѓанска мобилизација. Преку ENGAGE, МОФ и Радио МОФ се стремат да го подигнат нивото на информираност кај граѓаните, нивната присутност и активно делување, како онлајн така и во физичкиот простор.

Годинава, говорници на ENGAGE ќе бидат претставници на ПЕТА, светската организација за заштита на животни со над 6 милиони членови и поддржувачи. Тие ќе зборуваат за односот на луѓето и животните, но и за своите акции пред кои никој не останува рамнодушен. Енди Батентие, ко-организатор на маршевите против климатски промени во Париз и дел од жолтите елеци, на ENGAGE 2019 ќе ја раскаже приказната на младите Французи што се дел од последните социјални и еколошки движења во оваа земја. Од соседна Србија, доаѓаат Јелена Анасоновиќ и Миодраг Симовиќ од движењето #1od5milliona, како организатори на масовните антивладини протести што ја тресат земјата. Тие ќе зборуваат за тоа како и само еден човек може да започне протести на кои ќе излезат милиони луѓе.

Меѓу говорниците на ENGAGE 2019 се и Ирена Ристиќ, од #НеБидиЃубре која сака нашата земја да стане најчистата земја во светот, Симона Димковска и Мартин Анастасовски од Културно Ехо ќе говорат за потенцијалот на напуштените простори и активистот Виктор Мазнев кој својот дом го направи прифатилиште за напуштени кучиња во Велес. Никола Јовановски ќе презентира за македонското #FridaysForFuture, а хероитe од Специјална олимпијада Радован Петровиќ и Горјан Стојковски ќе го споделат своето искуство од Светските олимпски игри на Специјалната олимпијада 2019. На конференцијата доаѓаат и Haus of Fauché, првиот дрег колектив во Скопје, чија цел е забава и едукација низ уметноста. Листата на говорници сѐ уште не е затворена, stay tuned!

Регистрацијата за настанот е отворена на овој ЛИНК, а можност за учество ќе имаат првите 200 пријавени учесници за конференцијата. Сите информации за ENGAGE можете да ги најдете на веб страницата на конференцијата engage.mk.

Во изминатите осум години ENGAGE стана еден од најголемите собири за поединци и заедници во нашата земја и тоа е единствениот настан за активизам кој е организиран континуирано секоја година. Настанот нуди место за дискусија, иновација, креативност, зајакнување и развој во нашето општество и отвора дебата за статусот на слободата, правдата и еднаквоста, човековите права, младинските прашања и развојот на модерната демократија.

Овогодинешниот Engage е еден од серијата настани со кои ќе се одбележи 20 годишнината на Младински образовен форум.

Конференцијата е поддржана од National Endowment for Democracy, а е организирана од Младински образовен форум и Радио МОФ.

Низата настани со кои оваа година Младински образовен форум го одбележува 20-иот роденден започна со Станица: Студентска 7.0.

На 23-ти април 2019 година, на Правниот факултет „Јустинијан Први“ во Скопје, МОФ понуди целодневна интерактивна програма со алтернативни предавања, работилници, саем за вмжрежување на младински и студентски организации и креативни активности, во рамки на седмото издание на настанот Станица: Студентска.

Гостите на овој настан можеа да слушнат предавања од различни области, како: енергетика, медицина, филозофијата, политиката, правото, земјоделските науки и вештачка интелигенција. Со своите предавања настанот го збогатија: Леана Таќи, Јанаки Митровски, како и професорите: Игор Трајковски, Владимир Петрушевски, Ристо Солунчев, Ненад Марковиќ и Владимир Давчев. Предавања и презентации имаа и претставници од Факултетот за електротехника и информациски технологии, Македонската медицинска студентска асоцијација, како и студентите од Факултетот за земјоделски науки и храна.

На Станица: Студентска 7.0 се зборуваше за теми како: Иднината на човештвото, вештачката интелигенција, Демократија и револуција, покорност кон авторитет, па се до: правата при претрес на улица, правење пиво и вакцините во современото здравство.

Посетителите на Станица: Студентска7.0 се запознаа со работата и активностите на повеќе од 20 младински организации во рамки на отворениот саем на студентски и младински организации. Дел од организациите кои имаа свој штанд беа Национален младински совет на Македонија, ХЕРА, ЕМСА, ИАЕСТЕ, Младите можат, КРИК, Истражувачко друштво на студенти биолози, Правната клиника при Правниот факултет „Јустинијан Први“, АИСЕК, ЕЛСА, СКЕЕОР, Youth Peer и други студентски и младински здруженија истакнати во својата област, кои постојано даваат придонес кон збогатување на академските денови на студентите.

Станица: Студентска 7.0  има за цел да обезбеди простор за современи предавања кои студентите ретко имаат можат да ги следат на нивните факултети, простор за информирање за организациите кои се отворени за нив, учество во работилници и можеби најважно – размена на искуство и познанства.

Настанот го организираше Младински образовен форум во рамки на Проектот за образовни центри и алумни стипендистите на Фондациите Отворено Општество.

Младински образовен форум со задоволство ве поканува на првиот настан по повод одбележувањето 20 годинишнината од основањето на организацијата – „Станица Студентска 7.0″

На 23 април 2019 (вторник) со почеток во 12:00 часот на Правниот факултет „Јустинијан Први“ сите млади луѓе, студенти и останати заинтересирани ќе имаат можност да посетат алтернативни предавања, да се информираат и зачленат во младински и студентски организации, да учествуваат во работилници и да разменат искуства и идеи.

Во склоп на „Станица: Студентска 7.0“ е организиран саем на дваесет младински организации, а покрај тоа ќе се одржат различни интересни предавања и работилници од страна на студенти, професори и експери, како и целодневна “чил зона“ организирана заедно со „Board game café Samo”.

Програма за „Станица: Студентска 7.0“.

Перон 1: Саем на студентски и младински организации

Перон 2: Чил Зона  со „Board game café Samo”.

Перон 3:

12:00 – „Соларен потенцијал на РСМ – индивидуално и индустриско ниво“ – Ведран Симовски, Ангела Најдоска, Војдан Андонов и Дејан Димитриев, студенти на Факултетот за електротехника и информациски технологии;
13:00 – „Вакцини современ јавно здравствен проблем“  Ана Мицевска и Софиа Колева, Македонска Медицинска Студентска Асоцијација, под менторство на проф. др. Владимир Трајковски од Филозофски факултет, и претседател на Македонското научно здружение за аутизам.;
14:00 – „Како да си направиш пиво“ – Емилија Кавазова и Валентина Велкова, студенти од Факултетот за земјоделски науки и храна;
15:30 – „Вашите права при претрес на улица“ – Адвокат Јанаки Митровски;
16:15 – „Иднината на човештвото и вештачката интелигенција“ – Д-р Игор Трајковски;
17:15 – „Експериментот на Милграм: покорност кон авторитет“ – Владимир Петрушевски.

Перон 4:

11:15 – „Multi-potential“ – Леана Таќи;
13:00 – „Неформалните институции и демократијата“ – Проф. Д-р Ненад Марковиќ;
14:00 – „Демократија и револуција“ – Проф. Д-р Ристо Солунчев;
15:30 – „Треба ли да стравуваме од модерната технологија и вештачката интелигенција- филозофски дилеми“ – Проф. Д-р Владимир Давчев.

Настанот е поддржан од Фондациите Отворено општество во склоп на „Проектот за образовни центри за советување и алумни стипендисти на Фондациите Отворено општество“ 

Патувачката изложба „Ана Франк – Историја за денес“ во Свети Николе

Младински образовен форум на 27.02.2019 со почеток од 18:00 часот во Дом на култура „Крсте Мисирков“ во Свети Николе, ја отвори патувачката изложба „Ана Франк – Историја за денес“. Изложбата ќе биде отворена за посетители до 13-ти март 2019 година од 07:00 часот до 19:00 часот, а влезот е бесплатен.

Водичи на оваа изложба се млади волонтери – средношколци кои поминале обука да ја раскажат приказната за животот на малата Ана.
Патувачката изложба „Ана Франк – Историја за денес“ е посетена од над пет милиони посетители во над четириесет држави во светот. Таа е една од најпознатите светски едукативни изложби кои се однесуваат на холокаустот и човековите права. Изложбата е составена од триесет и девет изложбени панели кои ја раскажуваат приказната за Ана Франк, истовремено раскажувајќи за Холокаустот и Втората светска војна. Прикажува фотографии од детството на Ана, подемот на нацизмот, погромот на Евреите и реакциите на луѓето. Се ова е раскажано преку животот на едно семејство. Изложбата ја дополнуваат седум панели за домашниот контекст во периодот по Втората светска војна до денес. Овие панели се изработени од домашните експерти Мишо Докмановиќ и Бесник Емини.
Изложбата во Македонија е изработена и донесена во рамки на проектот „Хисторија, Историја, Повјест – Лекции за сегашноста“ кој е поддржан од Европската унија, а поддршка доби и од Министерството за надворешни работи, Министерството за култура, Министерството за образование и наука, Меморијалниот центар на холокаустот на Евреите од Македонија и Амбасадата на Кралството Холандија. До сега, беше поставена во 20 градови, а ја посетија повеќе од 18 илјади посетители.

Проектот има за цел да го покрене вниманието и поттикне дискусија за настаните од блиското минато на Западен Балкан кои се причина за различни поделби и генерирање на конфликти во минатиот век. Преку промовирање на критичко размислување за настани од историјата и нивното значење во современото време и случувања, целта на Anna Frank House и партнерите е да се постигне помирување преку дијалог за заедничкото минато.

Младински мурали, волонтерски акции и интервенции во јавниот простор во 5 градови.

Медиа/Арт клубовите на програмата Младински Активизам, во декември 2018 година реализираa пет интервенции во јавен простор, во пет различни градoви, во Скопје, Тетово, Велес, Куманово и Битола.

Медиа/Арт клубот во Тетово, на 15.12.2018 година, ја реализираа акцијата „Види! Размисли! Реализирај!“. Оваа акција вклучува поставување на три знаци со информативни пораки, во три различни локации, каде што, се информираат граѓаните на Тетово за проблемот со загадувањето. Целта на оваа акција беше да се подигне свеста за зачувување на животната средина и да се намали бројот на граѓани кои секојдневно го загадуваат амбиентот.

Медиа/Арт клубот во Скопје, на 22.12.2018 година, спроведоа „Парквенција!“ каде што, на ул. 50-та Дивизија (паркот до спортското игралиште), во Центар, ги обновија и поправија веќе постоечките делови од паркчето (лулашки, трансформатор, клупи), но исто така, поставија и различни арт инсталации кои дополнително го разубавија паркот. Целта на оваа интервенција беше да се поттикнат младите за самоиницијативно организирање и општествено дејствување.

Медиа/Арт клубот во Велес, на 23.12.2018 година, со акцијата наречена “Reborn Yard” го уредија дворот на невладините организации во Велес. За време на оваа акција се изврши менување на покривната конструкција на летниковецот, фарбање на летниковецот, клупите и масата, исто така, се изврши покривање на ѕидот на Домот на НВО.

Медиа/Арт клубот во Битола, на 23.12.2018 година, се ангажираа да цртаат мурал со ликот на Горан Стефановски, до ракометното игралиште. Повикувајќи се на неговото дело „Тетовирани Души“, нашиот настан го именувавме „Тетовирани ѕидови“. Целта на муралот е да ги инспирира млади генерации да дејствуваат во областа на култура и уметноста, имајќи предвид дека еден од највлијателните личности на Македонската култура е и Горан Стефановски.

Членовите на МОФ во Куманово, на 24-25.12.2018, на ул. Доне Божинов (спроти автобуската станица), користејќи ја алатката стенсил нацртаа мурал како Батко Ѓорѓија ја влече темната страна од градот и ја покажува убавината која е претставена со различно обоени цртежи. Целта беше да се разубави јавната површина и да се придонесе за поубаво Куманово.

„Проектот е финансиран од Фондација Отворено општество – Македонија“.

Младинските клубови за ученици кои функционираа во рамките на проектот „Средношколски клубови за ученички права, слободи и различности“, поддржан од Град Скопје, во последната недела од декември ги спроведоа своите завршни настани, наменети и отворени за сите ученици на овие средни училишта на територијата на Град Скопје.

Првиот се одржа на 24.12.2018 во СУГС „Зеф Љуш Марку“. Членовите на тој клуб организираа панел-дискусија за своите соученици насловена „Подигнување на свеста околу родовата еднаквост“ на која тие заедно со дел од своите професори дискутираа и дебатираа на теми поврзани со предрасудите, стеротипите и дискриминацијата, перцепцијата за девојките и жените во нашето општество и потребата од целосна еднаквост помеѓу половите. На почетокот се обрати претседателката на МОФ, Стефани Спировска, која беше и една од панелистите, покрај професорот по Социологија и дефектологот во училиштето. Настанот го водеа две ученички од клубот и беше посетен од страна на 30-тина ученици.

Во СУГС „Георги Димитров“ на 25.12.2018 се организираше проекција на филмот „Exit through the gift shop“ и дискусија по филмот за ангажираната улична уметност и како преку една субкултура може да се влијае на јавниот дискурс и да се покренат важни општествени прашања. На настанот присуствуваа 40-тина ученици.

Последниот, трет завршен настан се случи во СУГС „Орце Николов“ на 26.12.2018. Учениците организираа дискусија за 30-тина соученици од прва и втора година за предностите и недостатоците на образовниот систем во Република Македонија. За таа цел, разгледуваа и дискутираа за поединечни членови на актуелниот Закон за средното образование и предложуваа амандмани за истиот. Предлагаа и конкретни чекори и мерки за подобрување на нивниот статус во рамките на самото училиште, а изработија и плакати со цел да ја зголемат информираноста на останатите ученици за своите права и обврски.

На крајот на сите настани им беа доделени и сертификати на членовите на клубовите за нивното активно учество во текот на ноември и декември.

Младински образовен форум – Тетово, на 26.12.2018 година, со почеток од 19:00 часот организира јавен настан посветен на загадувањето на воздухот. Настанот ќе се реализира во кафулето Викториан (ул. Димо Гравровски Кара, во улица кај кафулињата).

– Настанот ќе започне со презентација на реализираните активности и успеси на клубовите Медиа/Арт, Дебата и Учиме право во изминатава година.
– Во вториот дел од настанот ќе се провозира краток видео запис посветен на загадувањето на воздухот, а кој претходно е изработен од страна на членовите на Медиа/Арт клубот од Тетово, како претходница на јавната акција за интервенција на три јавни паркови во Тетово.
– Членовите на Медиа/Арт клубот ќе објаснат за изработка на техниката фанзини и ќе се поделат изработени фанзини на тема загадување на воздух на присутните членови.
– Во рамките на настанот ќе говори Др. Ратко Димитриевски кој што ќе зборува за штетните последици од загаденоста на воздухот и мерки за заштита.
– На крајот ќе се организира Паб Квиз во кој што ќе учествуваат повеќе тимови.

Сите млади тетовчани и тетовчанки кои сакаат да бидат учесници на паб квизот, претходно нека го пријавуваат нивниот тим кај локалниот координатор на МОФ – Тетово, Бобан Костадиновски.

„Проектот е финансиран од Фондација Отворено општество- Македонија.“

Да не помине академската година без студентско организирање

Промовирана веб платформа за информирање на студентите

Денес, 21 декември 2018, во Хотел Солун во Скопје се одржа тркалезната маса „Студентско (не)организирање – проблеми и решенија“. На настанот организиран од Младински образовен форум (МОФ) со поддршка од DemocracyLab, Peacetech Lab и Амбасадата на САД, учествуваа 30 студенти, професори и претставници од различни институции, кои дискутираа за реформирањето на студентското организирање и потребата од студентски избори.

На тркалезната маса се презентираше новата веб платформа www.studentskisobranija.mk за информирање на студентите за студентското организирање на Универзитетот „Св. Кирил и Методиј“. Оваа веб страница е изработена од МОФ да помогне на студентите да се информираат за студентското организирање и да ги користат своите права.

На настанот дојде до израз тоа дека новото студентско организирање треба да донесе промени, но прво треба да се воспостави. Помина цел семестар откако стапи на сила новиот Закон за високо образование, со кој конечно требаше да се формираат вистински студентски претставнички тела. Правата на студентите се заглавени во институционалните лавиринти, и студентите не можат да добијат избори и свои претставници додека не се усвојат статутите на универзитетите.

„Собранието имаше должност да изгласа нови статути на универзитетите, како што налага новиот Закон за високо образование, за да можат студентите да можат да се вклучат во одлучувањето.  Студентите се заборавени и повторно немаат шанса да одлучуваат и да учествуваат, и доведена е во знак прашалник нивната позиција во самата академска заедница“, кажа Петар Барлаковски од МОФ.

Сефер Селими, извршен директор на Demoracy Lab посочи: „За да се разбере суштината на студентското организирање, пример е тоа што се случува со студентите моментално во Тетово. Имаме студенти кои во неможност да ги канализираат своите барања се принудени преку протести да ги кажат своите потреби“.

Стефан Дојчиноски, член на работната група која го изготви Законот за високо образование кажа: „Избравме делегратски модел за сите факултети рамноправно да учествуваат во Универзитетското студентско собрание. Студентот треба првичните битки да ги извојува внатре во универзитетот“. Борјан Ефтимов  – претставник на Студентската организација на Правен факултет „Јустинијан Први“ истакна: „Главниот проблем и кочница неформалните организации да учествуваат во учествувањето е брократијата. Мораме да ја притиснеме бирократијата и да поченеме со спроведување на Законот за високо образование“.

Присутните професори и студенти на настанот посочија дека и онаму каде што уште има студентски претставници во телата на факултетите и универзитетите, тие се нелегални, а со тоа и сите одлуки кои овие тела ги носат. Прашаа и дали студентите биле вклучени во изработката на новите статути кои се очекува допрва да се донесат. Целта на настанот беше да ја отвори дебатата за новото студентско организирање, очекуваните избори и да ја промовира платформата за информирање на студенти.

Беше промовирано и едукативното видео „Што се факултетски и студентски собранија?“

Со проекции во 5 градови, заврши филмскиот фестивал Movies That Matter

Младински образовен форум заедно со Амбасадата на Кралството Холандија од 4-ти до 16-ти декември 2018 го организираше филмскиот фестивал Movies that matter (Филмови што вредат), посветен на човековите права. Во рамки на филмскиот фестивал беа организирани 5 филмски проекции на документарни филмови со фокус на човековите  права во: Велес, Тетово, Скопје, Куманово и Битола. На фестивалот беа прикажани филмовите: Truth Detectives (Германија); Joshua: Teenager vs. Superpower, (САД) и Algo Mio, Argentina’s Stolen Children (Германија).

На настанот во Скопје, кој се одржа на 10-ти декември во Кафе и филм Котур се одржа дискусија на тема: „Новите генерации за човековите права“, на која говорници беа: Стефан Дојчиноски, активист за човекови права; Јована Јовановска од Хелсиншкиот комитет за човекови права и Даниел Евросимоски, новинар во Радио МОФ.

Јована Јовановска од Хелсиншкиот комитет за Човекови права изјави: „Промоцијата на човековите права е првиот чекор кон градење на свесни и активни граѓани во едно општество, а младите се оние на кои треба да се стави фокусот. Најважно е да веруваме дека можеме да промениме нешто, дека секоја неправда и прекршување на туѓо право не засега сите нас и дека не смееме да правиме ниту најмал компромис кога се во прашање човековите права.“

Даниел Евросимоски, новинар во Радио МОФ, вели: „Сведочиме и пишуваме како правото на живот, достоинство, приватност или еднаквоста пред законот се под постојана закана од загадувањето, сиромаштијата, нелегалните прислушувања и амнестиите. Проблемите најчесто не се во правните акти, туку во политичката култура и ниската јавна свест. Работите можат да се менуваат само преку малку повеќе храброст, смелост и активност на граѓаните во нивната реакција на кршењето на човековите права и неправдите кои ги окружуваат.“

На дискусијата Стефан Дојчиноски, активист за човековите права изјави: „Денес повеќе од било кога мораме да инсистираме на човековите права бидејќи тие преку нивната универзалност ја создаваат можноста за граѓанинот да се постави во својата радикална некоинциденција со сопствена позиција во даденоста и со тоа да го истакне прашањето за она што е погрешно во општеството“.

Говорници на проекциите беа и: Санела Шкријељ од Министерството за труд и социјална политика,  Исмет Шабановиќ активист за човекови права, Сибел Амет и Вилдан Дрпљанин, активисти и вработени Хелсиншкиот комитет за човекови права,  кои говореа за младите како борци за човекови права и поддршката која жртвите треба да ја добијат од институциите. Проекциите беа организирани во Кафе и филм Котур во Скопје, Градска библиотека „Гоце Делчев“, Центар за Балканска соработка Лоја Тетово, Младински центар MultiКулти Куманово, НУ Центар за култура Битола.

Movies that matter ја користи моќта на филмот за поддршка на човековите права и социјалната правда, а филмскиот фестивал служи како уникатна платформа за дијалог за јавноста, експерти, уметници, креатори на политики, новинари и граѓанско општество. Филмовите ставија фокус на заштита на човековите права од неколку аспекти: злосторства против човештвото, воени злосторства, транзиционална правда, социјални здружувања, слобода на говор, новинарство, медиуми и пропаганда.

Потребно е ново средношколско организирање за идни активни граѓани

Ученици и професори дискутираа за подобрување на ученичкото организирање преку законот за средно образование

Денес, 14 декември 2018, во Хотел Солун се одржа тркалезната маса „Средношколско учество помеѓу теорија и пракса”. На настанот организиран од Младински образовен форум (МОФ) во соработка со Коалиција на младински организации СЕГА, Првата детска амбасада во светот Меѓаши и со поддршка од Фондација Песталоци учествуваа 30 учесници и професори од различни училишта, кои дискутираа како да се обезбеди квалитетно средношколско организирање.

На тркалезната маса се разговараше за предностите од средношколското учество. Булингот, училишното насилство, третманот кон ученикот, условите и екологијата во училиштето беа најголемите проблеми кои учениците ги издвоија. Истовремено, кажаа дека тие самите се трудат да направат дебати со соучениците, акции, едукативни фестивали и други настани, кои би ги имало многу повеќе кога учениците би имале посериозна поддршка.

Средношколското организирање не е пропишано во Законот за средно образование, и единствено е утврдено во статутите на училиштата. Иако во пракса постојат средношколски заедници во многу училишта, во многу малку од нив имаат значајна улога.

Пратеничката Ивана Туфегџиќ од Собранискиот Клуб за младински прашања и политики, кажа: „Со дискусија за средношколското организирање, треба да одговориме на прашањата каде сакаме да биде следната генерација? Дали сакаме граѓани кои ќе молчат и ќе бидат незаинтересирани да делуваат, или сакаме граѓани кои ќе влијаат на секое прашање?“

Катерина Конеска од Првата детска амбасада во светот Меѓаши посочи дека во Собранието и институциите понекогаш се говори за детските права, но почесто на индиректен начин. „Со отворање на Законот за средно образование институциите ќе говорат повеќе“, кажа таа.

Мартин Лазаревски од МОФ кажа дека важно е да се направат законски измени за да се гарантира дека во секое училиште учениците ќе бидат чуени и ќе може да направат промена.

Дел од ученичките ги споделија своите искуства во училиштата:

„Немаат сите училишта функционални заедници, некои ги немаат ни воопшто, па и да сакаме не може да воспоставиме соработка меѓу средношколците од различните училишта“ кажа еден средношколец. Дел од учениците споделија одлични иницијативи кои ги реализирале: креативни фестивали, дебати, активности за поттикнување на другите ученици – но посакуваат да ги има повеќе и да имаат сите поддршка да ги пренесуваат своите пораки. Учениците имаат многу прашања кои сакаат да ги решат: намалување на булингот и насилството, добивање еднаков третман од наставниците, еко-училишта, вон-школски активности осмислени од нив, и сакаат повеќе простор да работат на тоа.

На двата линкови подолу може да се најдат документите поврзани со иницијативата за средношколско организирање:

Предлог измени на Закон за средно образование

Предлог Правилник за средношколска заедница