Отворен повик за учесници на: Онлајн Младинска Академија 2020

Онлајн Младинската Академија 2020 е првата онлајн младинска академија на МОФ. Академијата ќе понуди содржини преку кои учесниците ќе може да се запознаат со начините за активно вклучување за социјалните промени преку искористување на виртуелниот простор, но и ќе учествуваат во креирањето на првата национална Младинска декларација – Youth Print – документ кој ќе ја подобри младинската позиција во општеството.

Повикот е отворен за сите млади од 15-18 години кои периодот 17-20 август 2020 година сакаат да го поминат работејќи на своите вештини за критичко размислување и општествена вклученост, преку активности за неформално образование.

Пријавувањето е отворено заклучно со 2-ри август (недела) 2020 година, а сите заинтересирани млади, можат да го прочитаат описот на Траките на Младинската Академија (достапен подолу) за да ја изберат својата трака, па да се пријават со пополнување на следниот прашалник. Доколку имате прашања, можете да пишете на следната мејл адреса: akademija@mof.org.mk.

Секој учесник ќе има прилика да избере една од траките (ПОДКАСТирање 101, Виртуелно аргументирано изразување, Онлајн (не)правда и Академско пишување 101) и да учествува во сите активности планирани и креирани за академијата. Покрај предавањата по траки и Youth Print сесиите, ќе имате можност да изберете помеѓу интересните предавања кои ги подготвивме за вас од областите: ментално здравје, аrtificial intelligence, space law, sustainable living, продукција на музика, претприемништво и театар. Младинската академија претставува збир од активизам, образование, пријателство и создавање на социјална промена, а се организира преку Проектот за младинско изразување. Проектот е финансиран од Европската Унија.

 

ОПИС НА ТРАКИТЕ:

ИАКМОП – Академско пишување 101

Разум губиш со „фусноти“1, а треба да изработиш онлајн презентации? Веќе си добро запознаен со „writer’s block?

Сакаш да научиш како правилно да истражиш, да стигнеш до вистинските факти и да изработиш истражување на која било тема?

На траката Академско пишување 101 ќе имаш можност да се запознаеш со основите на академско пишување и презентирање на факти. Ќе се стекнеш со вештини и трпение за истражување кои понатаму ќе ти послужат за изработка на писмени работи, училишни проекти и проектни задачи без да гуглаш „izrabotka na seminarski eftino“.

Преку Академско пишување 101 ќе вежбаш критички пристап кон информации и презентирани наоди, а ќе се запознаеш со многу нешта кои досега не си имал/а прилика да ги научиш во училиште, а честопати се интегрален дел од сите твои оцени, особено во онлајн наставата.

Посветените ментори со големо истражувачко искуство ќе соработуваат со тебе, насочувајќи те низ алатките и гигабајтските лавиринти од симнати, но непрочитани текстови, па под нивно менторство ќе може да се изработи и кус истражувачки текст кој потоа ќе биде објавен на веб страната на МОФ.

(1) белешка под текстот што објаснува поблизу некои делови од текстот или споменатиот податок, односно термин. Подножната белешка се означува со натпис во облик на горен индекс или со ѕвездичка на горната десна страна од последната буква на зборот во текстот.

 

Учиме право – Онлајн (не)правда

Пионери, пионерки, хакери и сајбер ѕверки?

Те нервира кога ќе видиш злоупотреба на социјалните мрежи, но не знаеш како да го посочиш проблемот, освен спамање на „Фејсбук“ со пријави?

Сакаш да се запознаеш со онлајн бонтонот и ти се зборува за онлајн булинг и слободно изразување на социјалните мрежи?

На траката Онлајн (не)правда ќе ги дознаеш твоите права на онлајн платформите, нивните граници и како да се заштитиш кога се чувствуваш загрозено. Ќе се запознаеш со концептот на авторски права и начинот на преземање и споделување содржини. Дополнително, ќе имаш можност да слушаш предавања на тема сајбер булинг и каде да се обратиш ако онлајн правата ти се прекршени.

Траката за онлајн (не)правда ќе посочи на големата слика и ќе те научи како свесно да објавуваш и споделуваш информации на интернет. Секое снимено видео, секоја испратена слика, статус и твит имаат милиони начини за интерпретација, па некои од нив може да доведат до можно загрозување на угледот и секојдневието на корисниците на виртуелните алатки.

 

Младински активизам – ПОДКАСТирање 101

Имаш многу да кажеш, но те фаќа трема пред камера?

И Спотифај пристигна кај нас, а тебе ниедна содржина таму не ти фаќа 👀
Тогаш креирање сопствен подкаст е решението за тебе!

На првата онлајн Младинска Академија на МОФ, на траката „Подкастирање 101“ ќе имаш можност да се запознаеш со основите на правење подкаст и да ја сефтосаш својата идеја за аудио изразување во тим со други средношколци од целата држава. Искусни аудио новинари од Радио МОФ ќе го пренесат своето знаење, вештини и tips and tricks, ќе ги споделат и тајните на правење подкаст среде пандемија, за кон крајот на Академијата ти да работиш на твојот прв подкаст кој ќе биде објавен на Радио МОФ.

Покрај техничката основа, опфатен ќе биде и креативниот дел од продуцирањето подкаст – бирање теми, гости, презентација во онлајн просторот, однос со публика…

П.С. Радио МОФ е во постојана потрага по млади кои сакаат да го искористат аудио просторот за споделување интересни содржини, па ако ептен се пронајдеш во креирање подкасти можноста за сопствен подкаст кој би одел на Радио МОФ е отворена.

 

Дебата – Виртуелно аргументирано изразување

Те фаќа сафра, лето е и сонце пече, а има пандемија?

Сметаш дека социјалните мрежи не се добра платформа за аргументирана дебата, а ти имаш толку многу да кажеш и споделиш?

Приклучи се на дебатната трака за оваа летна академија! Предавањата на Дебатната програма на МОФ се фокусираат на примена на аргументациските вештини и способности во виртуелниот свет и plot twist 🤯 во онлајн сферата!

Предавањата ќе содржат осврт и објаснување на основните дебатни алатки и критичко размислување, односно аргументот и аргументираното изразување, како и детална анализа на елементите на овие алатки и нивното правилно користење во реалниот, но и во виртуелниот свет.

Траката ќе се осврне кон фактичкото поддржување на ваквите аргументи, односно како да се искористат онлајн алатките и методите кои се нудат денес за да се направи едно правилно истражување и наоѓање на издржани примери и докази.

На самиот крај, на предавањата ќе се посвети време да се објаснат разните вештини за презентирање на целосно аргументираните ставови во поддршка на критичкото размислување, со особен осврт кон методите за јавно изразување, како и сите останати презентациски вештини.

Академијата се спроведува со поддршка од Град Скопје во рамки на проектот за Младинско изразување финансиран од Европската Унија.

 

Организирани 10 (Из)вонредни младински предавања со 390 учесници

Повеќе од 390 млади, во изминатите два месеци, имаа можност да ги проследат младинските Онлајн (Из)Вонредни предавања во организација на Младински образовен форум. Низ десетте отворени предавања, одржани од страна на МОФ членови и алумни,
беа опфатени најразлични теми од повеќе области, како дебата, екологија, меѓународни односи, статистика, право, технологија, театар, медицина, социјална еднаквост, космологија, филм и феминизам.

Користејќи ја платформата за видео-комуникација ‘Zoom’, ваквите предавања беа одлична можност за учесниците да дознаат нешто повеќе за различните проблеми, процеси и случувања со кои секојдневно се среќаваат. Меѓутоа, покрај просторот за едукација, предавањата понудија време и место за постојана едуктивна интеракција помеѓу учесниците во периодот на вонредната состојба.
Преку (Из)Вонредните предавања, учесниците имаа можност да научат нешто повеќе за тоа кои се причинители на природните катастрофи и какви се природни предизвици не очекуваат во иднина, да научат како подобро да се ‘караат’; на интернет, се едуцираа за меѓународните односи во светот, за подобро осознавање и анализирање на светот преку статистики и податоци, за важноста на правото, театарот, уметноста, филмот, но и универзалниот пристап до здравствена заштита.
Преку сите овие теми прикажани низ повеќе од 1000 минути и дополнети со стотина прашања, Младински образовен форум, и во целосно променето општественофункционирање, продолжи да го прави она што успешно го реализира веќе 21 година –
креирање простор за волонтирање, споделување знаење и младинска дискусија.

ИзВонредните предавања се дел од Проектот за ангажирање на младите и студентите за младински политики, финансиран од Фондацијата Отворено општество – Македонија.

Ново студентско секојдневие #6 – Редефинирање на јавните простори

Младински образовен форум и и Фондацијата за демократија Вестминстер (WFD) ве покануваат да го проследите шестото отворено предавање за студенти од цуклусот „Ново студентско секојдневие“ насловено “Редефинирање на јавните простори во пост-ковид светот“

Студирате архитектура или едноставно ве интересира урбаниот дизајн и просторното планирање? Пандемијата предизвикува промени и во оваа област, а јавниот простор веќе почнува да изгледа поинаку. Ако сакате да бидете во тек со овие прашања и да се информирате, приклучете се на отвореното предавање со наградуваниот архитект Дејан Ивановски, на 5-ти јуни (петок) од 19:00 часот.

За да го следите предавањето се што треба да направите е да ја пополните апликацијaта и да се вклучите на линкот во терминот на посакуваното предавање, кој ќе ви биде испратен на вашата e-mail адреса.

Предавањето ќе покрие што значи епидемијата за планирањето на јавните простори и како ќе се одрази на јавните настани и собири. Предавањето ќе ги опфати целите на одржлив развој и како светот се однесува кон јавниот простор, но ќе се осврне и на прашањата:
Што значи пандемијата за образовните институции, канцелариите и другите заеднички простори?
Каков белег ќе остави врз јавното собирање и однесување?
Што ние индивидуално придонесуваме за да го направиме градот/светот подобро место за живеење?

Архитектот Дејан Ивановски е претставник на Република Северна Македонија на архитектонското биенале во Венеција во 2008, 2010 и 2018 година. Го води архитектонското студио АРХИТЕКТРИ (www.arhitektri.mk) формирано во 2009 година. Во 2006 година е практикант во архитектонското студио на Њирич+архитекти (www.njiric.com) во Загреб, Република Хрватска. Добитник е на повеќе награди за својата работа на полето на архитектонскиот дизајн, индустриски дизајн и дизајнот на ентериер. Се занимава со проекти кои го прават градот подобро место за живеење.

Циклусот отворени предавања за студенти „Ново студентско секојдневие“ е организиран во рамки на проектот „Зајакнување на демократските компетенции и учество на младите луѓе“, имплементиран од страна на Младински образовен форум, а во соработка со Фондацијата за демократија на Вестминстер.  

 

21 година од основањето на Младински образовен форум

Драги членови, волонтери, пријатели и поддржувачи на МОФ,

Денес одбележуваме 21 година од основањето на Младински образовен форум!

Во изминатите 21 година, организацијата посветено и неуморно работи на подобрување на животниот стандард и вештините кај младите од нашата земја, зголемување на квалитетот на образованието и образовните политики и мерки, се залага за почитување и заштита на демократијата и човековите права и слободи, го промовира и унапредува младинскиот активизам во локалните заедници, гради општествено одговорни млади кои на аргументиран и конструктивен начин учествуваат во јавниот дискурс и известува и покрива теми и области од интерес за младите преку своето младинско онлајн радио, Радио МОФ.

Оваа година роденденот го дочекавме во несекојдневна состојба која го промени нашето функционирање, но и начинот на кој МОФ комуницира и работи со своите членови и корисници.

Сепак, благодарение на брзото приспособување и креативноста на тимот и членовите на МОФ, успеавме да организираме онлајн средби на младинските клубови, отворени предавања на повеќе од 20 теми и области, работилници, филмски проекции и разговори кои младите можеа да ги проследат од своите домови за време на карантинот, да научат нешто ново и да учествуваат со свои ставови и мислења во дискусиите. МОФ и оваа година ќе пронаоѓа интересни и инспиративни начини за преку своите процеси и активности  да продолжи да ги поддржува младите и да инспирира критичко размислување и активно граѓанство.

Тимот на МОФ им благодари на сите кои изминатите години несебично одвојуваа дел од своето време и енергија за да придонесат кон она што е МОФ денес, а особено на младинските тренери и членовите на програмите кои се дел од приказната на МОФ во овие исклучително предизвикувачки времиња.

Нека ни е честит и среќен 21-виот роденден, со искрени желби за среќни и успешни години пред нас, исполнети со активни и успешни млади кои работат на подобрување на својот статус и општата состојба во нашето општество.

Тимот на МОФ

Ново студентско секојдневие #5 – Дигитално освестување во дигитална ера

Младински образовен форум и и Фондацијата за демократија Вестминстер (WFD) ве покануваат да го проследите петтот отворено предавање за студенти од цуклусот „Ново студентско секојдневие“. Ова предавање го посветуваме на технологијата и дигиталната трансформација и истото е насловено „Дигитално освестување во дигитална ера“.

Веќе долго време живееме во дигитална ера, но со појавата на пандемијата и префрлањето на нашите приватни и професионални животи онлајн, приморани сме да ги прифатиме дигиталните промени во нов контекст. Горјан Јовановски, еден од нашите најдобри девелопери и креатор на апликацијата МојВозух/AirCAre, ќе одржи предавање на на 27-ми мај (среда) од 19:00 часот.

Предавањето ќе ги отвори следните прашања:
📍Kако технологијата помага да се одржи секојдневието, работата, образованието и дружењето во кризата?
📍Кои се дигиталните херои кои спасуваат животи преку апликации, тракери и информирање?
📍Кои се новите ризиците во подем, од лажни вести од онлајн измами?
📍Како технологијата помага да се задржи демократијата во време на вонредни состојби?
📍Дали има надеж дека кризата ќе поттикне период на иновација?
📍Која е улогата на технологијата справување со Ковид-19?

Горјан, оригинално потекнува од Скопје. Таму тој дипломира како софтверски инженер на Факултетот за Информатички Науки и Компјутерско Инженерство (ФИНКИ) во 2015 година, а магистрира cum-laude на University of Amsterdam во 2016 како магистар по софтверско инженерство. До 2020 година, работи во Booking.com како софтверски инженер и менаџер на над 30 луѓе, а потоа ја основа МојаФирма и го вложува делиот фокус во Aircare (МојВоздух). Како дел од 3000 еко активисти низ Македонија, од 2014 година бара начин како да помогне околу проблемот со енормното загадување на воздухот. Комбинирајќи ги пасијата за технолоција и зелена средина, ја креира МојВоздух, апликација која што го прикажува степенот на загадување низ целата земја. Со над 200.000 преземања, МојВоздух бргу ја подигнува јавната свест околу загадувањето, а Горјан со неговата љубов на јавно говорење, продолжува да ја шири приказната и надвор од границите на Македонија преку разни говори, како и неговиот TED говор насловен “The Data I Breathe”.

Ако сакате да го следите предавањето се што треба да направите е да ја пополните апликацијaта: [shorturl.at/FSZ08] и да се вклучите на линкот во терминот на посакуваното предавање, кој ќе ви биде испратен на вашата e-mail адреса.

Циклусот отворени предавања за студенти „Ново студентско секојдневие“ е организиран во рамки на проектот „Зајакнување на демократските компетенции и учество на младите луѓе“, имплементиран од страна на Младински образовен форум, а во соработка со Фондацијата за демократија на Вестминстер.

Ново студентско секојдневие #4 – Демократија за време на пандемија

Младински образовен форум и и Фондацијата за демократија Вестминстер (WFD) ве покануваат да го проследите четвртотот отворено предавање за студенти – „Демократија за време на пандемија“ со д-р Марко Кртолица. Предавањето ќе се одржи преку платформата за видео комуникација Zoom на 22-ри мај од 19:00 часот

„Често во секојдневието може да се слушне цитатот на Винстон Черчил дека демократијата е најдобриот облик на владеење во споредба со сите други облици на владеење со кои досега сме имале искуство. Таквиот став на Черчил се потпира врз идејата дека во демократско општество постои уставно ограничена власт, владеење на правото, заштита на човекови права и слободи, еднаквост, плуралност, учество на граѓаните во креирањето и практикувањето на власта (владеење на народот, од народот, за народот). Сето тоа придонесува за демократијата најчесто да се говори во позитивна конотација“, се вели во најавата за онлајн настанот.

Меѓутоа, вирусот Ковид-19 целосно го смени функционирањето на светот, а со тоа предизвика и голем број на промени и предизвици во функционирањето на демократиите во светот. На самиот старт под влијание на ширењето на вирусот Ковид – 19 речиси во сите демократски држави беа одложени изборните процеси. Дополнително, стои во најавата, под пазувите на воведувањето на вонредна состојба во голем број демократии денес имаме состојба на така наречена уставна диктатура во која, со цел справување со вирусот Ковид-19, уште поголемата моќ на извршната власт и ограничувањето на човековите слободи и права станаа реалност.

„Тоа ни говори дека денес под влијание на Ковид-19 под закана се основните елементи на едно демократско општество. Затоа, во овој период, како и во периодот кој следува во пост-корона ерата треба да се биде внимателен во која насока ќе се развиваат состојбите во демократските општества – дали демократските општества без проблем ќе се вратат во нормална состојба или, пак, животот во вонредна состојба ќе стане новото ‘нормално’ на демократиите во светот“, се вели во соопштението за онлајн предавањето.

Инаку, Марко Кртолица е доцент на Правниот факултет ,,Јустинијан Први” во Скопје, работи на Катедрата за уставно право и политички систем.

Ако сакате да го следите предавањето се што треба да направите е да ја пополните апликацијaта и да се вклучите на линкот во терминот на посакуваното предавање, кој ќе ви биде испратен на вашата e-mail адреса.

Циклусот отворени предавања за студенти „Ново студентско секојдневие“ е организиран во рамки на проектот „Зајакнување на демократските компетенции и учество на младите луѓе“, имплементиран од Младински образовен форум, а во соработка со Фондацијата за демократија на Вестминстер.

(Из)вонредна проекција #3 со кратките филмови на Георги М. Унковски

Младински образовен форум и Радио МОФ ве покануваат да го проследите третото издание на „(Из)вонредни проекции“. Секоја недела од месец мај, на платформата за видео комуникација – Zоom, МОФ и Радио МОФ организираат заедничко гледање на проекции на македонски краткометражни филмови, во придружба на режисерите и дел од екипата која работела на филмовите.

На 24-ти мај (недела) 2020 година, во 19:00 часот, наместо да ја бинџате истата серија по навика, придружете ни се на третата (Из)вонредна проекција на ZOOM да ги проследиме краткометражните филмови „Налепница“ и „Пепи и Муто“ режисерот Георги М. Унковски.

По проекцијата, која публиката ја гледа од дома, следи виртуелна интерактивна Q&A сесија со режисерот Георги М. Унковски, кој ќе ги открие тајните позади овие две филмски остварувања, инспирацијата и предизвиците кои ги носи снимањето.

Краткиот игран филм „Пепи и Муто“ е криминалистичка комедија која го следи запознавањето и првиот заеднички случај на искусниот полициски инспектор Пепи (Петар Мирчевски) и кадетот Муто (Сашко Коцев). Пепи е задолжен да го научи Муто, неговата замена, како да стане вистински инспектор.Филмот

„Налепница“, е црна комедија во која главниот лик по неуспешниот обид да ја обнови својата сообраќајна дозвола, тргнува на пат и запаѓа во серија бирократски проблеми. „Налепница“ е избран во официјалната селекција на Санденс 2020.

Не двоумете се, ако досега не сте се пријавиле, веднаш направете го тоа на следниот линк https://forms.gle/HduVTC1C4oskRh6m7, а ние ќе ви испратиме линк од Zoom на вашата мејл адреса.
За првите 10 пријавени, седиште во првите редови 😉

Цикулусот (Из)вонредни проекции се организира во склоп на проектот Ангажирање на младите за студентски и младински политики, поддржан од Фондација Отворено општество-Македонија.

(Из)вонредно предавање #10 – Приказ на жената во филмовите

Младински образовен форум ве поканува на десетто (Из)вонредно предавање – „Приказ на жената во филмовите: главниот спореден лик“. Предавањето ќе го одржи нашиот член Бисера Самарџиева на 16-ти мај (сабота) во 19:00 часот на платформата за видео комуникација Zoom.

Ова отворено предавање е посветено на филмовите и улогата на женските ликови во истите. Филмот е еден од најдобрите медиуми за раскажување на приказна. Комплетна контрола врз сценографија, можност за пресликување на реалноста, актери коишто ги доловуваат сите емоции на сценариото. Но, што се случува кога ќе се занемари некој лик? Поточно што се случува кога ќе се занемарат женските ликови? Во ова предавање ќе се разгледаат популарни калапи за женски ликови од Manic Pixie Dream Girl до Femme Fatale, со цел да ги истражиме, анализираме и да откриеме  што означуваат истите?

Ќе откриеме како да се препознаат овие ликови, ќе разгледаме што ги прави нив толку посебни и која е нивната позиција во дејствието во филмот. Но, тоа што најмногу не интересира е – ако филмот треба да личи на реалноста,  зошто толку често женските ликови изгледаат токму спротивното – нереални?

За да го проследите предавањето треба да го пополнитe краткиот прашалник: https://forms.gle/QJoc5heha3Bx3tPV6. Доколку веќе сте регистрирани за (Из)вонредните предавања, еден час пред терминот за предавање ние ќе ви испратиме е-маил со линк до предавањето.

Отворените предавања за млади се организираат во склоп на проектот Ангажирање на младите за студентски и младински политики, поддржан од Фондација Отворено општество – Македонија.

(Из)вонредна проекција #2 со кратките филмови на Ана Јакимска

Младински образовен форум и Радио МОФ ве покануваат да го проследите второто издание на „(Из)вонредни проекции“. Секоја недела од месец мај, на платформата за видео комуникација – Zоom, МОФ и Радио МОФ организираат заедничко гледање на проекции на македонски краткометражни филмови, во придружба на режисерите и дел од екипата која работела на филмовите.

На 17-ти мај (недела) во 19:00 часот придружете ни се на втората (Из)вонредна проекција заедно да ги проследиме двата краткометражни филмови „Неонски срца“ и „Ќе дојдат децата“  на режисерката Ана Јакимска.

По проекцијата, која публиката ја гледа од дома, следи виртуелна интерактивна Q&A сесија со режисерката Ана Јакимска и Петар Антевски, продуцент на филмот „Неонски срца“, кои ќе ги откријат тајните позади овие две филмски остварувања, инспирацијата и предизвиците кои ги носи снимањето.

„Неонски срца“ е филм за Петар кој е средовечен возач на камион, кој поминува многу време на пат, далеку од дома и семејството. На патот, каде што никој не го познава, тој е слободен да биде тоа што е и да живее како што сака, без осудувања. Но, една ноќ кога се враќа од тура во Букурешт, дознава дека син му исчезнал. Решен е да го најде и да го врати, без разлика на последиците.

„Ќе дојдат децата“ е филм за една млада учителка која е испратена да подучува деца во далечно планинско село. Како што минуваат деновите, од децата нема ни трага ни глас. Единствениот човек што го среќава во селото е една старица, чистачката во училиштето. Кога старицата ќе почине, младата учителка мора да најде начин да преживее.

Пријавете се на следниот краток формулар https://forms.gle/pLP3jKUncqNc49Et7, а ние ќе ви испратиме линк од Zoom на вашата мејл адреса.

Извонредните проекции за млади се организираат во склоп на проектот Ангажирање на младите за студентски и младински политики, поддржан од Фондација Отворено општество – Македонија.

Повик за учесници за онлајн курс за Аргументирано изразување

Дебатната програма во рамките на Младински образовен форум ве поканува да го проследите „Онлајн курсот за Aргументирано изразување“.

Умешноста правилно и аргументирано да се изразите е една од најважните вештини кои треба да се поседуваат. Држењето на јасен, слободен, прецизен и концизен говор е способност која се користи во најразлични ситуации во текот на целиот живот. При секојдневните разговори, усни испити, интервјуа, состаноци и јавни настапи, поседувањето на исклучителна реторичка способност може во голема мера да ја промени сликата која луѓето ја имаат за вас.

Со цел вистински да ги совладате техниките на успешно говорење и да се стекнете со оваа вештина, МОФ во текот на претстојниот период ќе одржи „Онлајн курс за Аргументирано изразување“ составен од 4 предавања кои ќе имаат за цел да ве обучат како правилно да градите еден аргумент, да ја анализирате темата која е пред вас, правилно да и пристапите и финално да структурирате еден целосен и концизен убедлив говор.

Курсот започнува од 14-ти мај 2020 и ќе биде воден од страна на искусни дебатни тренери од МОФ. Предавањата се двочаснови и ќе се одржуваат еден месец, секој четврток со почеток во 19:00 часот на платформата за видеокомуникација Zoom со следниот распоред:

  • 14-ти мај – Што е дебата и аргумент?
  • 21-ви мај – Видови аргументи и техники на побивање;
  • 28-ми мај – Анализа на тема;
  • 4-ти јуни – Конструкција на говор.

Учеството на курсот е бесплатно, се што треба да направите за да присуствувате е да се регистрирате пополнувајќи го следниов формулар: https://forms.gle/ME3R8tj12AgVijMs5. Кога ќе дојде терминот за предавање ние ќе ви испратиме е-маил со линк до предавањето.

Отворените предавања за млади се организираат во склоп на проектот Ангажирање на младите за студентски и младински политики, поддржан од Фондација Отворено општество-Македонија.