Преглед на априлските активности на Младинскиот образовен форум

Младински образовен форум во чии рамки активни се неколку младински програми и тоа дебата, учиме право, медиа/арт, клубови за демократско учество, новинарски клуб и клубови за претприемништво,  направи преглед на своите априлски активности.

Во рамки на Дебатната програма се одржа второто Онлајн национално дебатно првенство, од 23 до 25 април. На првенството учествуваа 15 тима ширум Северна Македонија кои се бореа за победничките позиции на турнирот.

Првенството го освои тимот „Оревите“, составен од Леонардо Змајшек, Лука Кадриќ и Митко Неданоски. Исто така ги добивме и петте најдобри говорници кои ќе ја претставуваат Северна Македонија на Светското првенство во форматот „World Schools“, организирано од страна на Макау. Говорниците се Леонид Сајков, Георгина Петреска, Љубен Атов, Фросина Кекеновска, Карла Станков.

Наградите за Националното дебатно првенство 2021 се поддржани од АРС Ламина.

Онлајн национално дебатно првенство

Додатно, започна работата на младинските кампањи во склоп на проектот „Младински пакети и ангажираност преку младински кампањи“, поддржан од Фондација отворено општество – Македонија, кој МОФ го спроведува во соработка со „Еквалис“, „Хера“ и „Психотерапика“.

Во склоп на програмата Младински активизам се одржа второто онлајн издание на конференцијата за социјален активизам кај младите – „Еngage youth“. Конференцијата „Engage youth“ виртуелно спои млади активисти кои споделија знаења и искуства на теми поврзани со граѓанска ангажираност, социјална промена, инклузија, слобода на говор, активизам на јавен простор, технологија и иднина на образование. Настанот се одржа на 27 април, на платформата за видео комуникација „Зум“, ја проследија над 100 млади луѓе како на „Зум“ така и преку стрим преносот на Фејсбук и беа поставени над 25 прашања од публиката. Конференцијата беше пренесена и на знаковен македонски јазик.

Второ онлајн издание на „Engage Youth“

Тимот на Програмата за истражување, анализа и креирање на младински и образовни политики одржа неколку состаноци со претставници на државните институции, презентирајќи им го документот „Млади во криза 2.0 – Ефекти од пандемијата врз младите и препораки до институциите“. Беа одржани состаноци со советникот за млади и советникот за труд и социјална политика, Ѓорѓи Тасев и Милан Живковиќ, со Заменик-Премиерот Фатмир Битиќи, со министерката за образование и наука, Мила Царовска, со директорот на агенцијата за млади и спорт, Наумче Мојсоски како и со Клубот на млади пратеници во рамки на Собранието на РСМ. На состаноците беа презентирани податоците од истражувањето како и препораките кои имаат за цел да ги намалат односно превенираат штетите од пандемијата врз младите.

Средба со министерката за образование и наука, Мила Царовска

Во рамките на програмата за Младински претприемачки вештини, на 17 април се одржа отвореното предавање со Белино Џафа на тема „Финансирање и вреднување на вашиот стартап“. Предавачот го искористи своето искуство во банкарството за да ги поучи учесниците како да ги добијат најдобрите услови кога на претприемачите им е потребна финансиска поддршка од банка.

Онлајн предавање за претприемништво

 

Преглед на мартовските активности на Младински образовен форум

Младински образовен форум во чии рамки активни се неколку младински програми и тоа дебата, учиме право, медиа/арт, клубови за демократско учество, новинарски клуб и клубови за претприемништво,  направи преглед на своите мартовски активности.

Во рамки на дебатната програма се одржа предавањето „Шар Планина: национален парк или национална мета?“ во соработка со Институтот за комуникациски студии, потоа онлајн предавањето „Како да се спречи загадувањето од рудниците?“, мастеркласови за критичко размислување и Интернационален дебатен турнир за средношколци.

Онлајн предавањето „Шар Планина: национален парк или национална мета?“, се одржа на 23 март, во склоп на кампањата „Разбистри се“, а на предавањето учесниците се запознаа со кризата со која се соочува Шар Планина во поглед на нејзината борба за да стане најмладиот национален парк на Северна Македонија.

Онлајн предавање за Шар Планина

Онлајн предавање „Како да се спречи загадувањето од рудниците?“, се одржа на 18 март, а на ова предавање двајца студенти од ПМФ на повеќе од 80 учесници им објаснија која е поволноста од рударството, зошто се прави, но и кои се штетите кои рударството го има врз околината.

Онлајн предавање за опасноста од загадувањето и рудници

На 21 март се одржаа третиот и четвртиот мастерклас од младинските пакети, каде што 40 деца се запознаа со поимот критичко размислување и како истиот може да се користи во секојдневниот живот, при восприемањето на медиумски содржини. Додатно, учесниците се запознаа и со историјата на реториката и аргументираното изразување и како може една личност да стане добар говорник. Овој мастерклас е дел од Младинските пакети организирани од страна на Еквалис во соработка со МОФ, Хера и Психотерапика, а поддржани од страна на Фондација отворено општество.

На 27 март се одржи и петтиот, односно последниот од мастеркласовите за критичко размислување, на кое учесниците научија како тоа може да се искористи во секојдневниот живот.

Во текот на месец март, членовите на дебатната програма на МОФ учествуваа на интернационален дебатен турнир во форматот WS организиран од страна на дебатното друштво во Љутомер, Словенија.

Во склоп на програмата „Учиме право“ беа одржани неколку „ЈЕС“ предавања, а во „Europe House Skopje“ се одржа и квизот за работата на Европската Унија и нејзините институции – „Евроквизија“. Истовремено, членовите на оваа програма остварија и посета на Народниот правобранител во Тетово.

Во изминатиот месец членовите на клубовите за Младински претприемачки вештини ги слушаа предавањата за Јавно презентирање и пичинг,  кое беше менторирано од еко активистот Горјан Јовановски, кој е најдобро познат по неговата апликација „Аircare“.

Предавањето по Социјално претприемништво го менторираше Марија Матовска која има долгогодишно искуство во вметнување на социјален елемент во традиционалните бизниси, додека менторка на предавањето за Дигитален маркетинг беше Теодора Филовска која покрај својата меѓународно успешна компанија за маркетинг „Vrootok“ е сопственичка и на Академијата „Галексија“.

Онлајн предавање за социјално претприемништво

Освен редовните предавања, членовите имаа можност и да го проследат отвореното предавање на Софија Богева за „Design Thinking“, која е консултант за иновации, креатор на креативна содржина, design thinking фасцилитатор, тренер и консултант за стратегиски иновации.

Истовремено, над 50 средношколци од целата држава се натпреваруваа на „Евроквизија“ – натпревар за работата на Европската Унија. Во финалето влегоа најдобрите 20 учесници, а првите три места ги освоија Дарко Ефтимов, Марко Ингилизов и Мартина Костадинова. Тројцата победници беа поканети на средба со евроамбасадорот каде неговата екселенција им ги врачи заслужените награди.

Атмосферата на „ЕвроКвизија“

Членовите на почетниот клуб од програмата „Учиме право“ имаа посета на канцеларијата на Народниот правобранител во Тетово. Тие имаа шанса да се запознаат директно со работата на Народниот правобранител како институција за заштита и промоција на човековите права и слободи. Институцијата веќе петта година по ред е отворена за младите и членовите на Младинскиот образовен форум.

 

Од посетата на народниот правобранител во Тетово

Во склоп на програмата за младински активизам се одржа конференцијата за социјален активизам кај младите – „Еngage youth“, онлајн предавањето на тема „Техники за подобро учење, помнење и справување со онлајн настава“, а беше објавено и видеото „Имам право на знаковен јазик“.

Во склоп на конференцијата „Engage youth“, млади активисти споделија знаења и искуства на теми поврзани со граѓанска ангажираност, социјална промена, слобода на говор, технологија и иднината на образование. На настанот учествуваа повеќе од 70 млади луѓе на „Зум“ и стрим преносот на Фејсбук. Конференцијата се одржа на 30 март, на платформата за видео комуникација „Зум“.

Предавањето „Tехники за подобро учење, помнење и справување со онлајн настава“го одржаа Ивана Цилевска и Клементина Добревска од „Психеско“. Учесниците на предавањето се здобија со корисни техники и совети за подобро учење и помнење. Дополнително, се дискутираше и за тоа како полесно да се менаџира со онлајн наставата, но и како учениците директно да се справат со стресот од ваквата настава преку примери и дискусија. Предавањето го посетија повеќе од 100 млади луѓе на „Зум“ и стрим преносот на „Фејзбук“.

Видеото „Имам право на знаковен јазик“ има за цел да го потенцира проблемот со кој се соочуваат младите глуви и наглуви лица, да ги повика институциите за одговор на барањата и соодветно решавање на ситуацијата.

Видеото е реализирано од Младински образовен форум, „Млад знак“ и Фондација за демократија на Вестминстер. Видеото доби над  6100 прегледи.

Во склоп на програмата за Истражување, минатиот месец беше промовиран документот „Млади во криза 2.0“, преку кој се анализаат егектите од пандемијата врз младите. Истовремено, во рамки на оваа програма беше упатена јавна реакција во врска со наодите споделени од неколку медиуми поврзани со Државниот универзитет во Тетово (ДУТ).

Преку документот „Млади во криза 2.0“, група младински организации во Агенцијата за млади и спорт споделија препораки до институциите како да се поддржат младите при кризата.

Младинските организации апелираа институциите да ги земат во превид младите како клучна група при носењето на мерки за справување со здравствено-економската криза. Тие препорачаа да се олесни (ре)вработувањето на младите, но и да се поддржат преку поврат на персоналниот данок и ваучери за домашна потрошувачка на оние на кои им се најпотребни.

 

Младинските организации посочија дека образованието на далечина треба да стане достапно и за учениците со попреченост. Кризата и социјалната дистанца влијаат негативно на менталното здравје, за што стручните служби во улиштата мора да обезбедат активности за учениците, а државата да обезбеди сервисни линии за психолошка поддршка и линии за жртви на семејно насилство. Законот за младинско учество и младински политики не треба да чека да заврши кризата, треба да се работи на неговата имплементација, заедно со младинските организации.

Членки на иницијативата „Млади во криза“ се Младински образовен форум, Реактор – Истражување во акција, Здружение за истражување и анализи (ЗМАИ), ХЕРА, Центар за интеркултурен дијалог, Сојузот на извидници, Младински сојуз – Крушево, Еквалис, Психотерапика, ХОПС, Национален младински сојуз на Македонија, Хелсиншкиот комитет за човекови права и АРНО.

Во рамки на програмата „Истражување“ при МОФ, беше упатена јавна реакција во врска со наодите споделени од неколку медиуми поврзани со Државниот универзитет во Тетово (ДУТ).

Реакцијата може да ја прочитате тука.

Повик за ангажирање на експерт/ка за креирање на методологија за истражување и спроведување на истражување

Mладински образовен форум (МОФ) во рамки на проектот „Квалитетни образовни политики и можности за младите“, поддржан од Фондацијата Отворено општество – Македонија, отвора повик за ангажирање на 1 (еден) експерт/ка за подготовка на методологија за истражување и спроведување на истражување за животниот стандард на младите од урбаните и руралните средини, со фокус на пристапот до образование и можностите за образование на младите.

Избраниот кандидат, односно кандидатка, ќе треба да подготви методологија за истражување, како и да го спроведе истражувањето за животниот стандард на младите со фокус на пристапот до образование од урбаните и руралните средини, опфаќајќи ги сите осум плански региони во државата.

Селектираниот кандидат/кандидатка треба да изработи:

  • Анкетен прашалник за млади од 15 до 29 години;
  • Сценарио за фокус-групи со млади од 15 до 29 години;
  • Анализа на податоците од прашалникот и фокус-групите;
  • Анализа на релевантните акти кои го регулираат рамноправниот развој помеѓу планските региони во државата;

Заинтересираните треба да ја достават својата апликација за ангажманот на електронската адреса info@mof.org.mk и policy@mof.org.mk, не подоцна од 18.04.2021 година со наслов „Пријава за експерт за подготовка на методологија за истражување на животниот стандард на младите од урбаните и руралните средини“.

Во пријавата, кандидатите треба да ги поднесат следните документи:

  • Лична биографија (CV) на македонски јазик;
  • Пополнета апликација (Апликација за подготовка на методологија и спроведување на истражување);
  • Финансиска понуда

Експертот/експертката ќе биде ангажиран/а во периодот април-август 2021 година. Предвидено е финалното истражување да биде готово до крајот на јуни односно почетокот на јули 2021 година.

За дополнителни информации или прашања, слободно обратете се на електронската адреса petar_barlakovski@mof.org.mk.

Проектот е финансиран од Фондацијата Отворено општество – Македонија.

Претставен документот „Млади во криза 2.0“, младинските организации апелираат за економско-општествени мерки

Група младински организации на 23 март во просториите на Агенцијата за млади и спорт го промовираа документот „Млади во криза 2.0“ со кој ги анализираа ефектите од пандемијата врз младите и споделија препораки до институциите како да се поддржат младите при кризата.

Младинските организации апелираа институциите да ги земат во превид младите како клучна група при носењето на мерки за справување со здравствено-економската криза. Препорачуваат да се олесни (ре)вработувањето на младите, но и да се поддржат преку поврат на персоналниот данок и ваучери за домашна потрошувачка на оние на кои им се најпотребни. За образованието да не биде прекинато за ниту едно дете треба да се обезбедат услови за пристап до наставата, особено за младите кои немаат дигитални уреди, кои не се во образовен систем и кои се од економски помалку моќни семејства.

„За младите, особено оние од ранливи групи, пандемијата на КОВИД-19 предизвика проблеми во образованието, вработувањето, менталното здравје и финансиската состојба. Додека младите ќе претрпат најмногу економско-социјални последици од кризата, нивната благосостојба може да се подобри преку брзи и правични политички решенија“, изјави Теодора Столевска од МОФ.

Младинските организации посочуваат дека Образованието на далечина треба да стане достапно и за учениците со попреченост. Кризата и социјалната дистанца влијаат негативно на менталното здравје, за што стручните служби во улиштата мора да обезбедат активности за учениците, а државата да обезбеди сервисни линии за психолошка поддршка и линии за жртви на семејно насилство. Во однос на еднаквото образование за сите, воведување на сеопфатното сексуално образование во сите степени на образование е уште еден начин државата да докаже дека е грижлива за секој млад човек и сите млади имаат подеднакво пристап до информации кои се неопходни за нивното физички и менталено здравје. Законот за младинско учество и младински политики не треба да чека да заврши кризата, треба да се работи на неговата имплементација, заедно со младинските организации. Препорака има и до младите – волонтерството, младинската работа и активизам треба да опстојат.

Од почетокот на пандемијата, оваа мрежа на организации постојано ги следи промените и дава препораки за олеснување на последиците предизвикани здравствената и општествена криза.

Членки на иницијативата „Млади во криза“ се: Младински образовен форум, Реактор – Истражување во акција, Здружение за истражување и анализи (ЗМАИ), ХЕРА, Центар за интеркултурен дијалог, Сојузот на извидници, Младински сојуз – Крушево, Еквалис, Психотерапика, ХОПС, Национален младински сојуз на Македонија, Хелсиншкиот комитет за човекови права и АРНО.

Процесот на криерање на документот и анализите беше поддржан од Фондацијата за демократија на Вестминстер преку Иницијативата за демократија на Западен Балкан.

Целиот документ е достапен тука.

Делиберација или манипулација: Средношколско учество во Град Скопје

Презентација на наоди од истражувањето за средношколско учество во Град Скопје 

Младински образовен форум во изминатите 3 месеци спроведе истражување за состојбата со учество на учениците во училишната заедница во средните училишта во Град Скопје.

Истражувањето ги опфати речиси сите училишта во Град Скопје и во истото беа вклучени 1870 испитаници – ученици од средните училишта во градот. Наодите на истражувањето ги дадоа следните резултати:

–              Фактички информации за постоењето на УПТ: 73,7 % од испитаниците одговориле дека во нивното училиште постои УТП

–              Квалитет на комуникацијата: Од испитаниците во чие училиште постои УПТ, 6,53% дале оценка 1 или 2 за комуникацијата помеѓу учениците и професорите, споредено со 9,37 % од оние во чие училиште не постои УПТ, или кои не се сигурни дали телото постои или не.

–              Честота на појава на конфликт: Од испитаниците во чие училиште постои УПТ, 11,17 % процениле дека често или многу често настанува конфликт помеѓу учениците и професорите, споредено со 18,13 % од оние во чие училиште не постои УПТ, или кои не се сигурни дали телото постои или не.

–              Чувства на одговорност за квалитетот на наставата и на учество во одлучувачкиот процес: Од испитаниците кои во моментов се дел од УПТ, 73,74 % (потполно) се согласуваат со тврдењето дека тие се одговорни за квалитетот на нивното образование, споредено со 70,97 % од оние кои не се дел од УПТ

–              Поставеност на професорите и училишната администрација: Релативно мал процент од учениците сметаат дека професорите и училишната администрација им дозволуваат (55.6%), ги поддржуваат (61.3%), и ги поттикнуваат (57.8%) да учествуваат во одлучувачкиот процес

По повод промоција на наодите од истражувањето беше организирана панел дискусија на која присуствуваа: Ајше Бекири, психолог во СУГС „Зеф Љуш Марку“, Мила Јовановиќ, Претставник од Училишната заедница на СУГС „Никола Карев“, Жана Живадиновиќ, професор во СУГС „Арсени Јовков“ и Матеј Поп-Дучев, автор на истражувањето.

Даниела Адамова – Раководителот на секторот за средно образование во Град Скопје го поздрави истражувањето и за истото сподели дека „ истражување е поддржано по пат на јавен повик како истражување кое што е приоритет на градот Скопје веќе 15 години. Ние нема да се откажеме и понатаму да ја истакнуваме како важна императивна оваа тема, особено во отсуство на правна легислатива“.

На прашањето која е улогата на претставниците на средношколците, Мила Јовановиќ – претставник на средношколсаката заедница во Орце Николов сподели дека тие се легитимно тело кое ги застапува учениците и дека нивната улога е да работат на подобрување на ученичките услови и да организираат дополнителни иницијативи и настани кои носат придобивки на учениците.

Автор на ова истражување е Матеј Поп-Дучев, а целосниот документ е достапен на следниот линк: https://bit.ly/3sVWyt2

Истражувањето е поддржано од Град Скопје.

Кризни обиди на високообразовните институции за дигитализација во академската 19/20 година

Младински образовен форум изминатиов период работеше на анализа на промените во високото образование предизвикани од пандемијата на КОВИД – 19 – „Кризни обиди на високообразовните институции за дигитализација во академската 19/20 година“.

Целта на оваа анализа е да одговори на прашањето како пандемијата предизвикана од КОВИД – 19 влијае на високото образование во Република Северна Македонија, односно кои се новитетите и проблемите со кои се соочуваат високообразовните установи и институции, како и накусо да прикаже компаративен приказ за тоа како се справуваат државите со пандемијата.

Документот прикажува хронолошки приказ на преземените мерки од надлежните институции со цел справување со пандемијата предизвикана од КОВИД – 19 и непречено одвивање на наставата. Документот најпрвин ги прикажува промените во високото образование за време на пандемијата, а понатаму детално ги објаснува преземените чекори од страна на високообразовните институции во доменот на спроведување на онлајн настава како и во доменот на полагање на испити и оценување на студентите. Дополнително, направена е и куса компаративна анализа на состојбите во високото образование ширум светот, која ги опфаќа аспектите на спроведување на наставата и полагањето на испити и нивното оценување.

Младински образовен форум (МОФ) како организација која долги години ги анализира состојбите во високото образование, примарно ставајќи го фокусот на квалитетот на образованието, ги има следниве препораки до надлежните институции:

– Дигитализацијата е клучен фактор: потребен е поголем и поефикасен приод кон дигитализирање на високообразовниот процес преку обезбедување на квалитетна и двонасочна настава, дигитална практична настава, онлајн достапност на образовните ресурси, литература и материјали, подготвеност во спроведување на онлајн полагања, како и онлајн административна поддршка.

– Користење на низа различни начини за спроведување на полагањата и оценувањата. Универзитетите треба да имаат слобода во одлучувањето за начинот и методот на спроведување на полагањата и оценувањата (на пр., устен или писмен испит, изготвување трудови, семинарски, решавање задачи, спроведување анализи и истражувања и сл.).

– Во идни вакви состојби, материјата за полагање на колоквиуми и испити треба да соодветствува на реалната ситуација. При креирање и спроведување на полагањата, знаењето кое се бара од студентите треба да го отсликува обемот на материјалот поминат преку онлајн наставата, како и достапноста до испитните материјали.

– Да се овозможи продолжено полагање на испити по истекот на редовните рокови од три редовни испитни сесии, но и испитните сесии да траат временски подолго со цел да се обезбеди помала фреквенција на студенти во еден термин, при што би се обезбедила поголема заштита од пренесување на вирусот.

Анализата дава приказ на состојбата со високото образование во периодот од почетокот на месец март до средината на месец април 2020 година и може да послужи како основа за понатамошни следења на состојбите во високото образование во услови на и постковид кризата. Анализата ја изработија Ванѓел Ѓорѓиев и Петар Барлаковски, членови на Програмата за истражување, анализа и креирање на младински и образовни политики при Младонски образовен форум.

Целата анализа со сите препораки на МОФ и заклучокот можете да ја прочитате тука: „Кризни обиди на високообразовните институции за дигитализација во академската 19/20 година“

Промоција на две истражувања за студентски стандард

 Анализа на јавни набавки во ДСД  и  Крпен студентски живот се насловите на двете истражувања кои  Младински образовен форум (МОФ) на 22.01.2020 ги промовираше во Europe House.
Истражувањето „Крпен студентски живот – истражување за животниот стандард на станарите во ДСД – Скопје“ ги адресира прашањата поврзани со корупцијата во студентските домови, начинот на носење одлуки и вклученоста на студентите во истите, како и квалитетот на живот во домовите, додека пак истражувањето „Анализа на јавни набавки во студентските домови“ ги одговара прашањата: колку, во колкава мера и дали се трошат и инвестираат доволно средства од страна на Државниот студентски дом „Скопје“ – Скопје, а во врска со квалитетот на домувањето и квалитетот на услугите за студентите во домовите под капа на Државниот студентски дом „Скопје“ – Скопје.
Проектот „Студентски домови без корупција“ се спроведуваше од август 2018 до јули 2019. Примарната цел на проектот беше поттикнување на институциите на потранспарентно и поодговорно управување со студентските домови, како и вклучување на други институции, организации и правни лица за подобрување на условите во домовите. Анализата на јавните набавки се однесува на периодот 2015-2018 година, додека пак податоците во Крпен студентски живот се однесуваат на перцепциите на станарите во ДСД во учебната 2018/2019 година.
Целосните истражувања се достапни во електронска форма:
Крпен студентски живот
Истражувањата се дел од проектот „Студентски домови без корупција“ овозможен со финансиска поддршка на Програмата за поддршка на високото образование на Фондациите Отворено општество, преку Фондацијата Отворено општество-Македонија.

Дополнување:

По изготвувањето и објавата на Анализата на јавните набавки на студентските домови, на 23.01.2020 година стигна информација до Младински образовен форум дека во 2018 година во ДСД „Скопје“ имало вработено лице со положен испит за јавни набавки. Презентираните податоци во анализата се добиени преку интервју со официјален претставник на ДСД „Скопје“.

Промоција на две истражувања од областа на студентскиот стандард

Младински образовен форум (МОФ) со огромно задоволство Ве поканува на промоција на две истражувања од областа на студентскиот стандард на 22-ри јануари (среда) со почеток од 11:00 часот во просториите на Europe House (поранешно ЕУ Инфоцентар).

На промоцијата ќе бидат презентирани истражувањата „Анализа на јавни набавки во студентските домови“ и „Крпен студентски живот – истражување за животниот стандард на станарите во ДСД – Скопје“.

Истражувањето „Крпен студентски живот – истражување за животниот стандард на станарите во ДСД – Скопје“ ги адресира прашањата поврзани со корупцијата во студентските домови, начинот на носење одлуки и вклученоста на студентите во истите, како и квалитетот на живот во домовите, додека пак истражувањето „Анализа на јавни набавки во студентските домови“ ги одговара прашањата: колку, во колкава мера и дали се трошат и инвестираат доволно средства од страна на Државниот студентски дом „Скопје“ – Скопје, а во врска со квалитетот на домувањето и квалитетот на услугите за студентите во домовите под капа на Државниот студентски дом „Скопје“ – Скопје.

Истражувањата се изработени од страна на искусни истражувачи, членови на Младински образовен форум.

Проектот „Студентски домови без корупција“ се спроведуваше од август 2018 до јули 2019. Примарната цел на проектот беше поттикнување на институциите на потранспарентно и поодговорно управување со студентските домови, како и вклучување на други институции, организации и правни лица за подобрување на условите во домовите.

МОФ е младинска заедница која создава простор за дебата, слободно изразување и младинско организирање, охрабрува активизам, ги штити и унапредува младинските права и политики. МОФ ги остварува своите цели преку информирање, едукација, дискусија, соработка и преку мотивирање и поддршка на младите.

„Проектот „Студентски домови без корупција“ е овозможен со финансиска поддршка на Програмата за поддршка на високото образование на Фондациите Отворено општество, преку Фондацијата Отворено општество-Македонија. Содржината е единствена одговорност на авторите и на грантистот, и на ниту еден начин не може да се смета дека ги изразува гледиштата и ставовите на Фондацијата Отворено општество – Македонија.“

Промоција на резултати од четири труда

Младински образовен форум (МОФ) вчера, на 16.07.2019 г, одржа промоцијата на резултатите од четири истражувачки труда кои се изработени во рамки на Проектот за образовни центри за советување и алумни стипендисти на Фондациите Отворено oпштество.

Истражувачките трудови се изработени од страна на четири тима составени од седум млади истражувачи кои во изминатите неколку месеци беа менторирани од искусни истражувачи, со поддршка од МОФ. Младите истражувачи обезбедија податоци за теми кои се значајни за младите и тоа: врсничкото насилство помеѓу средношколците, национализмот кај младите средношколци, работата и функционалноста на центрите за кариера и популаризирање на руралноста кај младите.

На промоцијата секој тим кусо го презентираше своето истражување и ги сподели главните наоди добиени од истражувањето, како и заклучоците од истото. Изработените истражувања се :

1. „Популаризирање на руралноста – Потенцијалите на руралното коработење и ефектот врз миграциските трендови на младите во Р. Северна Македонија“ – Елена Андонова и Ѓорѓи Димески;
* 25% од вкупното население живее во Скопскиот плански регион, со акцент на градот Скопје, иако по површина овој регион е најмал од 8-те плански региони.
* Р. Северна Македонија е трета држава во светот по бројот на фриленсери.
* Најголемата категорија на иселеници од руралните средини е младо работоспособно население кое ја напушта руралната средина заради ниски образовни и кариерни можности.
* Работниците од креативната класа имаат минимално влијание врз стапката на вработеност на локалното население во руралната средина, но големо влијание врз социоекономскиот раст (диверзитет на бизнис средина, иновативност, внесување дигитални технологии итн).
* Се појавува и тренд на контраурбанизација во кој млади професионалци се преселуваат во     руралните средини.

2. „Улогата и работата на центрите за кариера при факултетите на Универзитетот „Св. Кирил и Методиј“– Ангела Тасевска;
* 54,73% од испитаните студенти не знаат дали има Центар за кариера на нивниот факултет.
* 61,61% од испитаниците не учествувале во работата на Центарот за кариера, но би сакале да учествуваат.
* 85% од испитаниците се согласни Центарот за кариера да ги известува студентите за своите активности на веб-сајтот на факултетот

3 „Анализа на врсничкото насилство на интернет кај средношколците“ – Симона Стојчевска
*Секој четврти средношколец поминува над 6 часа дневно на интернет.
*40 % од испитаниците одговориле дека се имаат почувствувано непријатно поради вознемирување или навреда на Интернет во последната година.
*42 % од испитаниците барем понекогаш имаат потреба да пријават кога ќе доживеат непријатно искуство на Интернет.
*74 % од нив не знаат кои механизми им стојат на располагање.
*Кај 63 % од нив не се зборува на училиште на тема врсничко насилство на Интернет.

и

4. „Националистички чувства и ставови кај средношколците во Република Северна Македонија“ – Исаја Карадаковска, Емилија Божиновска и Мартина Георгиевска.
* Етничките Македонци од соседните народи за најблизок го чувствуваат српскиот народ, додека пак етничките Албанци како најблизок го чувствуваат албанскиот и косовскиот народ.
* На тврдењето Ја сакам Македонија и горд/а сум на мојот народ, делумна или целосна согласност изразуваат 44% од испитаниците.
* На тврдењето „Би употребил/а физичко насилство за одбрана на честа и угледот на мојот народ“ делумна или целосна согласност изразуваат 36.8% од вкупниот број на средношколците, додека пак несогласност изразуваат 41.5%.
* На тврдењето „Мојата историја е пославна од онаа на другите народи“ , на скала од 1 до 5 етничките Македонци одговориле со просечна оценка 1,2 а пак етничките Албанци со просечна оцена од 3,3.

Четирите истражувачки трудови можат да се најдат во електронкса форма на Issuu профилот на Младински образовен форум – https://issuu.com/youtheducationalforum

Проектот има за цел да ги поврзе капацитетите и ресурсите на МОФ со знаењето и искуството на алумни стипендистите на Фондациите Отворено општество во корист на млади истражувачи, студенти и пошироката јавност во Северна Македонија. Младите и студентите немаат можност да прават истражувања и истражувачка академска работа поради ограничени ресурси – финансиски и менторски. Со овој проект беа искористени капацитетите на алумни стипендистите, со цел да ги споделат своите знаења со младите кои за прв пат се занимаваат со општествено релевантни истражувања и заедно да придонесат во креирање на квалитетни анализи кои ќе помогнат да се подобрат политиките или да се подигне свеста за важни прашања во Северна Македонија.