Одржана тркалезна маса на тема „Младинско учество во единиицте на локалната самоуправа“

Младински образовен форум организираше тркалезна маса на тема „Младинско учество во единиците на локалната самоуправа “ на 20.10.2022 во просториите на Холидеј Ин во Скопје.

Во рамките на проектот се одржаа 6 работилници во повеќе градови низ државата на кои учествуваа над 100 млади лица. Учесниците се стекнаа со знаење за општините и нивните обврски спрема жителите и имаа можност да ги споделат проблемите со кои се соочуваат во нивното место на живеење. Лоцираните проблеми се протегаат од неасфалтирани патишта до нефункционални кина.

На настанот се презентираше документот за јавни политики кој содржи проблеми кои младите ги мапираа за време на работилниците, како и препораки насочени кон општините и останатите локални институции кои се  обврзани да ги адресираат истите.

Документот можете да го прочитате на следниот линк:  https://mof.mk/…/Dokument-za-javni-politiki-mladinsko…

Овој настан е дел од проектот „Младински политики за подобар животен стандард на млади од помали средини“, кој е овозможен со финансиска поддршка на Фондација Отворено општество – Македонија  и во соработка со локалните организации Фондација за развој на локалната заедница – Штип , Регионален центар за одржлив развој – Гевгелија, Центар за истражувања и анализи НОВУС / Center for research and analysis  Струмица, Центар за едукација и развој – Теарце и НВО КХАМ – Делчево.

Преглед на мартовските активности на Младински образовен форум

Младински образовен форум во чии рамки активни се неколку младински програми и тоа дебата, учиме право, медиа/арт, клубови за демократско учество, новинарски клуб и клубови за претприемништво,  направи преглед на своите мартовски активности.

Во рамки на дебатната програма се одржа предавањето „Шар Планина: национален парк или национална мета?“ во соработка со Институтот за комуникациски студии, потоа онлајн предавањето „Како да се спречи загадувањето од рудниците?“, мастеркласови за критичко размислување и Интернационален дебатен турнир за средношколци.

Онлајн предавањето „Шар Планина: национален парк или национална мета?“, се одржа на 23 март, во склоп на кампањата „Разбистри се“, а на предавањето учесниците се запознаа со кризата со која се соочува Шар Планина во поглед на нејзината борба за да стане најмладиот национален парк на Северна Македонија.

Онлајн предавање за Шар Планина

Онлајн предавање „Како да се спречи загадувањето од рудниците?“, се одржа на 18 март, а на ова предавање двајца студенти од ПМФ на повеќе од 80 учесници им објаснија која е поволноста од рударството, зошто се прави, но и кои се штетите кои рударството го има врз околината.

Онлајн предавање за опасноста од загадувањето и рудници

На 21 март се одржаа третиот и четвртиот мастерклас од младинските пакети, каде што 40 деца се запознаа со поимот критичко размислување и како истиот може да се користи во секојдневниот живот, при восприемањето на медиумски содржини. Додатно, учесниците се запознаа и со историјата на реториката и аргументираното изразување и како може една личност да стане добар говорник. Овој мастерклас е дел од Младинските пакети организирани од страна на Еквалис во соработка со МОФ, Хера и Психотерапика, а поддржани од страна на Фондација отворено општество.

На 27 март се одржи и петтиот, односно последниот од мастеркласовите за критичко размислување, на кое учесниците научија како тоа може да се искористи во секојдневниот живот.

Во текот на месец март, членовите на дебатната програма на МОФ учествуваа на интернационален дебатен турнир во форматот WS организиран од страна на дебатното друштво во Љутомер, Словенија.

Во склоп на програмата „Учиме право“ беа одржани неколку „ЈЕС“ предавања, а во „Europe House Skopje“ се одржа и квизот за работата на Европската Унија и нејзините институции – „Евроквизија“. Истовремено, членовите на оваа програма остварија и посета на Народниот правобранител во Тетово.

Во изминатиот месец членовите на клубовите за Младински претприемачки вештини ги слушаа предавањата за Јавно презентирање и пичинг,  кое беше менторирано од еко активистот Горјан Јовановски, кој е најдобро познат по неговата апликација „Аircare“.

Предавањето по Социјално претприемништво го менторираше Марија Матовска која има долгогодишно искуство во вметнување на социјален елемент во традиционалните бизниси, додека менторка на предавањето за Дигитален маркетинг беше Теодора Филовска која покрај својата меѓународно успешна компанија за маркетинг „Vrootok“ е сопственичка и на Академијата „Галексија“.

Онлајн предавање за социјално претприемништво

Освен редовните предавања, членовите имаа можност и да го проследат отвореното предавање на Софија Богева за „Design Thinking“, која е консултант за иновации, креатор на креативна содржина, design thinking фасцилитатор, тренер и консултант за стратегиски иновации.

Истовремено, над 50 средношколци од целата држава се натпреваруваа на „Евроквизија“ – натпревар за работата на Европската Унија. Во финалето влегоа најдобрите 20 учесници, а првите три места ги освоија Дарко Ефтимов, Марко Ингилизов и Мартина Костадинова. Тројцата победници беа поканети на средба со евроамбасадорот каде неговата екселенција им ги врачи заслужените награди.

Атмосферата на „ЕвроКвизија“

Членовите на почетниот клуб од програмата „Учиме право“ имаа посета на канцеларијата на Народниот правобранител во Тетово. Тие имаа шанса да се запознаат директно со работата на Народниот правобранител како институција за заштита и промоција на човековите права и слободи. Институцијата веќе петта година по ред е отворена за младите и членовите на Младинскиот образовен форум.

 

Од посетата на народниот правобранител во Тетово

Во склоп на програмата за младински активизам се одржа конференцијата за социјален активизам кај младите – „Еngage youth“, онлајн предавањето на тема „Техники за подобро учење, помнење и справување со онлајн настава“, а беше објавено и видеото „Имам право на знаковен јазик“.

Во склоп на конференцијата „Engage youth“, млади активисти споделија знаења и искуства на теми поврзани со граѓанска ангажираност, социјална промена, слобода на говор, технологија и иднината на образование. На настанот учествуваа повеќе од 70 млади луѓе на „Зум“ и стрим преносот на Фејсбук. Конференцијата се одржа на 30 март, на платформата за видео комуникација „Зум“.

Предавањето „Tехники за подобро учење, помнење и справување со онлајн настава“го одржаа Ивана Цилевска и Клементина Добревска од „Психеско“. Учесниците на предавањето се здобија со корисни техники и совети за подобро учење и помнење. Дополнително, се дискутираше и за тоа како полесно да се менаџира со онлајн наставата, но и како учениците директно да се справат со стресот од ваквата настава преку примери и дискусија. Предавањето го посетија повеќе од 100 млади луѓе на „Зум“ и стрим преносот на „Фејзбук“.

Видеото „Имам право на знаковен јазик“ има за цел да го потенцира проблемот со кој се соочуваат младите глуви и наглуви лица, да ги повика институциите за одговор на барањата и соодветно решавање на ситуацијата.

Видеото е реализирано од Младински образовен форум, „Млад знак“ и Фондација за демократија на Вестминстер. Видеото доби над  6100 прегледи.

Во склоп на програмата за Истражување, минатиот месец беше промовиран документот „Млади во криза 2.0“, преку кој се анализаат егектите од пандемијата врз младите. Истовремено, во рамки на оваа програма беше упатена јавна реакција во врска со наодите споделени од неколку медиуми поврзани со Државниот универзитет во Тетово (ДУТ).

Преку документот „Млади во криза 2.0“, група младински организации во Агенцијата за млади и спорт споделија препораки до институциите како да се поддржат младите при кризата.

Младинските организации апелираа институциите да ги земат во превид младите како клучна група при носењето на мерки за справување со здравствено-економската криза. Тие препорачаа да се олесни (ре)вработувањето на младите, но и да се поддржат преку поврат на персоналниот данок и ваучери за домашна потрошувачка на оние на кои им се најпотребни.

 

Младинските организации посочија дека образованието на далечина треба да стане достапно и за учениците со попреченост. Кризата и социјалната дистанца влијаат негативно на менталното здравје, за што стручните служби во улиштата мора да обезбедат активности за учениците, а државата да обезбеди сервисни линии за психолошка поддршка и линии за жртви на семејно насилство. Законот за младинско учество и младински политики не треба да чека да заврши кризата, треба да се работи на неговата имплементација, заедно со младинските организации.

Членки на иницијативата „Млади во криза“ се Младински образовен форум, Реактор – Истражување во акција, Здружение за истражување и анализи (ЗМАИ), ХЕРА, Центар за интеркултурен дијалог, Сојузот на извидници, Младински сојуз – Крушево, Еквалис, Психотерапика, ХОПС, Национален младински сојуз на Македонија, Хелсиншкиот комитет за човекови права и АРНО.

Во рамки на програмата „Истражување“ при МОФ, беше упатена јавна реакција во врска со наодите споделени од неколку медиуми поврзани со Државниот универзитет во Тетово (ДУТ).

Реакцијата може да ја прочитате тука.

Промовирана студентска платформа

Да не помине академската година без студентско организирање

Промовирана веб платформа за информирање на студентите

Денес, 21 декември 2018, во Хотел Солун во Скопје се одржа тркалезната маса „Студентско (не)организирање – проблеми и решенија“. На настанот организиран од Младински образовен форум (МОФ) со поддршка од DemocracyLab, Peacetech Lab и Амбасадата на САД, учествуваа 30 студенти, професори и претставници од различни институции, кои дискутираа за реформирањето на студентското организирање и потребата од студентски избори.

На тркалезната маса се презентираше новата веб платформа www.studentskisobranija.mk за информирање на студентите за студентското организирање на Универзитетот „Св. Кирил и Методиј“. Оваа веб страница е изработена од МОФ да помогне на студентите да се информираат за студентското организирање и да ги користат своите права.

На настанот дојде до израз тоа дека новото студентско организирање треба да донесе промени, но прво треба да се воспостави. Помина цел семестар откако стапи на сила новиот Закон за високо образование, со кој конечно требаше да се формираат вистински студентски претставнички тела. Правата на студентите се заглавени во институционалните лавиринти, и студентите не можат да добијат избори и свои претставници додека не се усвојат статутите на универзитетите.

„Собранието имаше должност да изгласа нови статути на универзитетите, како што налага новиот Закон за високо образование, за да можат студентите да можат да се вклучат во одлучувањето.  Студентите се заборавени и повторно немаат шанса да одлучуваат и да учествуваат, и доведена е во знак прашалник нивната позиција во самата академска заедница“, кажа Петар Барлаковски од МОФ.

Сефер Селими, извршен директор на Demoracy Lab посочи: „За да се разбере суштината на студентското организирање, пример е тоа што се случува со студентите моментално во Тетово. Имаме студенти кои во неможност да ги канализираат своите барања се принудени преку протести да ги кажат своите потреби“.

Стефан Дојчиноски, член на работната група која го изготви Законот за високо образование кажа: „Избравме делегратски модел за сите факултети рамноправно да учествуваат во Универзитетското студентско собрание. Студентот треба првичните битки да ги извојува внатре во универзитетот“. Борјан Ефтимов  – претставник на Студентската организација на Правен факултет „Јустинијан Први“ истакна: „Главниот проблем и кочница неформалните организации да учествуваат во учествувањето е брократијата. Мораме да ја притиснеме бирократијата и да поченеме со спроведување на Законот за високо образование“.

Присутните професори и студенти на настанот посочија дека и онаму каде што уште има студентски претставници во телата на факултетите и универзитетите, тие се нелегални, а со тоа и сите одлуки кои овие тела ги носат. Прашаа и дали студентите биле вклучени во изработката на новите статути кои се очекува допрва да се донесат. Целта на настанот беше да ја отвори дебатата за новото студентско организирање, очекуваните избори и да ја промовира платформата за информирање на студенти.

Беше промовирано и едукативното видео „Што се факултетски и студентски собранија?“

 

Треба ново средношколско организирање

Потребно е ново средношколско организирање за идни активни граѓани

Ученици и професори дискутираа за подобрување на ученичкото организирање преку законот за средно образование

Денес, 14 декември 2018, во Хотел Солун се одржа тркалезната маса „Средношколско учество помеѓу теорија и пракса”. На настанот организиран од Младински образовен форум (МОФ) во соработка со Коалиција на младински организации СЕГА, Првата детска амбасада во светот Меѓаши и со поддршка од Фондација Песталоци учествуваа 30 учесници и професори од различни училишта, кои дискутираа како да се обезбеди квалитетно средношколско организирање.

На тркалезната маса се разговараше за предностите од средношколското учество. Булингот, училишното насилство, третманот кон ученикот, условите и екологијата во училиштето беа најголемите проблеми кои учениците ги издвоија. Истовремено, кажаа дека тие самите се трудат да направат дебати со соучениците, акции, едукативни фестивали и други настани, кои би ги имало многу повеќе кога учениците би имале посериозна поддршка.

Средношколското организирање не е пропишано во Законот за средно образование, и единствено е утврдено во статутите на училиштата. Иако во пракса постојат средношколски заедници во многу училишта, во многу малку од нив имаат значајна улога.

Пратеничката Ивана Туфегџиќ од Собранискиот Клуб за младински прашања и политики, кажа: „Со дискусија за средношколското организирање, треба да одговориме на прашањата каде сакаме да биде следната генерација? Дали сакаме граѓани кои ќе молчат и ќе бидат незаинтересирани да делуваат, или сакаме граѓани кои ќе влијаат на секое прашање?“

Катерина Конеска од Првата детска амбасада во светот Меѓаши посочи дека во Собранието и институциите понекогаш се говори за детските права, но почесто на индиректен начин. „Со отворање на Законот за средно образование институциите ќе говорат повеќе“, кажа таа.

Мартин Лазаревски од МОФ кажа дека важно е да се направат законски измени за да се гарантира дека во секое училиште учениците ќе бидат чуени и ќе може да направат промена.

Дел од ученичките ги споделија своите искуства во училиштата:

„Немаат сите училишта функционални заедници, некои ги немаат ни воопшто, па и да сакаме не може да воспоставиме соработка меѓу средношколците од различните училишта“ кажа еден средношколец. Дел од учениците споделија одлични иницијативи кои ги реализирале: креативни фестивали, дебати, активности за поттикнување на другите ученици – но посакуваат да ги има повеќе и да имаат сите поддршка да ги пренесуваат своите пораки. Учениците имаат многу прашања кои сакаат да ги решат: намалување на булингот и насилството, добивање еднаков третман од наставниците, еко-училишта, вон-школски активности осмислени од нив, и сакаат повеќе простор да работат на тоа.

На двата линкови подолу може да се најдат документите поврзани со иницијативата за средношколско организирање:

Предлог измени на Закон за средно образование

Предлог Правилник за средношколска заедница

 

Колку и на што троши еден студент?

Колку и на што троши еден македонски студент? 

На 11-ти декември, во ГЕМ клубот, беа презентирани наодите од истражувањето „Колку и на што троши еден македонски студент?“ кое претставува мапирање на трошоците на студентите кои студираат на државните универзитети во Македонија. Истражувањето беше овозможено со поддршка на Фондацијата Отворено општество – Македонија, а спроведено од страна на Младински образовен форум и Здружениеето на млади истражувачи и аналитичари.

Истражувањето беше спроведено во периодот февруари – март 2018 година и истото опфати 945 студенти од пет државни универзитети. Согласно истражувањето, студентските месечни трошоци или „студентската кошничка“ изнесува 21.410 ден. за студенти кои студираат со партиципација и 22.435 ден. за студенти кои студираат со кофинансирање, односно кои плаќаат школарина. Таа вклучува трошоци како партиципација односно школарина, трошоци поврзани со факултетот, трошоци за секојдневен живот, понатаму трошоци за превоз, домување но и режиски трошоци.

Студентскиот стандард е доста низок и финансиска состојба на студентите е навистина тешка. Најголемиот дел од нив живеат со родителите или старателите, кои се и најзначаен извор на финансии за студентите. На месечно ниво, за секојдневни трошоци, студентите располагаат просечно со 8.894 ден., износ кој за споредба, претставува 36,3% од просечната месечна нето-плата од мај 2018, или 74,1% од минималната месечна нето-плата во државата. Од овие средства, тие најмногу трошат на храна, алкохол и цигари, како и на хигиена и медицински производи. Најмалку трошат на културно-забавни настани, книги, списанија, весници или пак интернет-претплати.

На настанот говореа Сузана Пецаковска од Фондацијата Отворено општество – Македонија, Виктор Стојкоски од Здружението на млади аналитичари и истражувачи (ЗМАИ), Мартина Илиевска и Александра Филипова од Младинскиот образовен форум (МОФ) и проф. д-р Борче Треновски. Тие ги презентираа наодите, заклучоците и препораките од истражувањето, кое е всушност сериозен обид да се дојде до првични сознанија за тоа колку и на што троши македонскиот студент и во јавноста да се покрене прашањето: Како живее еден македонски студент?

Целосниот документ за јавни политики во кое можете да ги прочитате наодите од истражувањето е на следниов линк

Промовирано првото истражување за мониторинг на работата на Агенијата за млади и спорт

Младински образовен форум денес го промовираше истражувањето „Мониторинг и унапредување на работата на Агенцијата за млади и спорт“ со фокус на Агенцијата како носител на креирањето и спроведување на младинските политики. На настанот говореа:  Сафет Незири од Министерството за образование и наука, Младен Фрчковски од Минстерството за труд и социјална политика, Матеј Маневски од Центар за интеркултурен дијалог, Горан Ѓорѓиев од Сојуз на извидници на Македонија, Гордана Цекова од АМС, Мартина Илиевска и Александра Филипова од МОФ.

 

Според истражувањето за перидот 2014-2016г, соработката помеѓу Агенцијата за млади и спорт (АМС) и другите институции била на ниско ниво. Имало малку заеднички проекти и нема уредна документација за активностите. Агенцијата имала константна соработка единствено со МОН и одредена соработка со МИОА, АВРМ и Министерството за култура. Со Министерството за локална самоуправа немало соработка, додека Агенцијата за администрација и МТСП не располагале со информации за соработка со АМС.

 

Соработката со младинските организации била посебно слаба. Во минатите години агенцијата делувала сегрегирачки кон младинските органзации и соработувала само со малку од нив. Од 2014 до 2016 Агенцијата имала потпишано само 11 меморандуми со 6 организации што е мал број за период од три години. Односот на агенцијата кон младите и општата јавност придонел да биде перцепирана како „агенција за спорт“ која ги исклучува младите од своето делување.

 

Правна рамка за млади речиси и да не постои. Освен Националната стратегија за млади, нема правен акт ги уредува прашањата во областа „млади“. Креирање на Закон за млади или Закон за младинско учество е клучно за да регулираат правните празнини, а Агенцијата да добие јасни насоки за да може успешно да ги исполнува своите цели и приоритети.

Според препораките на истражувањето Агенцијата треба да го зајакне секторот млади, да ја ревидира стратегијата за млади и да започне квалитетен процес за креирање на акциски план за млади за 2018-2019. Агенцијата треба воспостави и модели за поддршка на младинските организации.

 

Истражувањето е реализирано во периодот јуни 2017 – јануари 2018, со фокус на соработка со младински организации, соработка со државни институции, правна рамка, внатрешно уредување и работење и перцепцијата на младинските организации и младите.

 

Проектот „Мониторинг и унапредување на работата на Агенцијата за млади и спорт“ е реализиран од страна на Младински образовен форум во периодот од јуни 2017 до јануари 2018 година. Проектот е поддржан од проектот “Граѓанска алијанса за транспарентност – Набљудување на процесот на реформи на јавната администрација од страна на граѓанските организации”, имплементиран од “Фондација Отворено општество – Македонија” (ФООМ) и “ЕВРОТИНК – Центар за европски стратегии”, и е финансиски поддржан од Европската унија во рамки на IPA Civil Society Facility and Media Programme 2015.

Младите да се исклучат од традиционалните медиуми или да ги бараат содржините кои ги заслужуваат?


Дебата за младите и медиумите во Македонија

Денес со почеток на пладне во Клуб на новинари во Скопје се одржа трибината „Млади и медиуми – Како до заеднички интереси?“ на која младинските организации, новинарите и медиумските експрети ги вкрстија ставовите за состојбата и иднината на младите во медиумскиот постор. Со аргументација базирана на резултати од презентираното истражување „Млади и медиуми“ спроведено во Македонија од Младински обраовен форум и Фондација Метаморфозис, свои мислења презентираа: Марјан Забрчанец, извршен директор на Младински образовен форум, Зорана Гаџовска, новинар од Радио Слободна Европа, Зоран Бојаровски, уредник во ТВ Алфа и Дарко Булдиовски, директор на NewMedia MK.

Резултатите за Македонија покажуваат дека додека ¾ од младите читаат електронски вести, дури 14% од младите никогаш не прочитале печатен медиум. Речиси половина од младите сметаат дека медиумите често пласираат лажни факти, додека 1/3 стуктурираат вести на пропагандистичен јазик. Општиот заклучок е дека младите малку веруваат на содржините кои се пласираат во медиумите, а од нив најмногу веруваат на радиото. Во однос на слободата на говор на интернет кој е најкористен медиум од страна на младите, 1/3 од нив секогаш се чувствуваат неудобно да објавуваат политички ставови.

Марјан Забрчанец од Младинскиот образовен форум го покрена прашањето за начинот на кој се известува за младите „Во медиумите младите многу ретко се портретирани на современ начин како интегрален дел од општеството, додека многу почесто се известува за нив како проблематична категорија. Дури постојат и случаи кога медумите доделуваат на младите етикети дека тие се виновни за стостојбите во општеството.“ Тој додаде дека младите сочинуваат ¼ од популацијата на земјата и се хетерогена група, од која не треба да се очекува сама да се грижи за сопствениот имиџ.

За известувањето за релевантни прашања за младите се надоврза Зорана Гаџовска, со искуство од медиумот од кој доаѓа – Радио Слободна Европа: „Младинската онлајн колумна на која млади активисти, блогери или организации искажуваат сопствени статвови на општествени прашања е еден од најчитаните и најсподелувани текстови на сајтот. Колумната се претвори во простор за оние кои имаат што да кажат и читаноста покажува дека младите ги интересира нешто повеќе од изгледот на Ким Кардашијан и Судбината на Фатмаѓул.“ Таа додаде дека високата стапка на невработеност и одливот на мозоци се младински теми кои добиваат внимание, но вклученоста на младите во донесувањето одлуки и нивните потреби се запоставени.

На препораката да се креираат редакции за млади во медиумите, уредникот Зоран Бојаровски од ТВ Алфа посочи дека тоа е тешко бидејќи речиси и да нема редакции. Тој исто така изјави и дека младите во себе ја носат суштината на слободата на изразување, но тие го чуствуваат и општествениот притисок кој е причина за стравот кој ги спречува да го користат ова свое право.

Дарко Булдиовски зборуваше за разликата во читаност на општествено важни содржини и „шунд-текстовите“ кои носат повеќе публика: „Кога важните вести ќе поминат добро и ќе донесат повеќе публика кај еден медиум, тогаш тој медиум можеби ќе почне да креира повеќе вести од таков тип“.

Прашањата за подобрување на позицијата на младите во медиумскиот простор треба да бидат предмет на дискусија и акција од страна на медиумите, новинарите, младинските и медиумските организации, институциите и младите.

Оваа трибина имаше за цел да поттикне дискусија помеѓу различните засегнати страни,  базирана на резултатите од регионалното истражување за млади и медуми, спроведено во 11 земји и оригинално презентирана на конференцијата „Млади и медиуми- еОпштество“ која се одржа на почетокот на февруари. Во рамки на истражувањето во Македонија се испитани 1734 млади, 65 медиуми, 37 младински организации, медиумиски организации и институции.

Трибина за студентско организирање

На 05 јуни (среда) во просториите на МКЦ – Битола се одржа јавна трибина со наслов „Евтини студентски приказни”. Трибината беше во организација на Младински образовен форум (МОФ) од Скопје во соработка со Младински културен центар (Битола) во склоп на Проектот на УСАИД за граѓанско општество. На трибината фокусот на дискусијата беше насочен кон состојбаta во студентското организирање на Универзитетот „Св. Климент Охридски“ (УКЛО) – Битола, како и за можностите за реформи во системот на студентско претставување. Во својство на панелисти на трибината, на присутните им се обратија Мартин Алексоски – претставник од МОФ, Марија Мерковска – претставник од МКЦ- Битола, Никола Главинче – поранешен студентски правобранител на УКИМ.

Поранешниот правобранител посочи дека до сега критиките беа главно фокусирани кон студентските претставници на Универзитетот Кирил и Методиј (УКИМ), а се запоставува состојбата на другите универзитети. Како една од причините за немање на вистинско влијание на студентите го посочи недостатокот на национално тело кое ќе ги вклучува претставниците на студентите од сите високо образовните институции. Во однос на реформирање на студентското организирање како можни алатки тој ги предложи донесување на Закон за студентско организирање, што ќе опфаќа и промена на моделот на внатрешно организирање како и изборните правила и/или вршење притисок врз надлежните за креирање политики преку меѓународни организации од типот на Европска студентска унија.

Претставникот од МКЦ, укажа на недостаток од информираност на студентите за постоењето на студентски претставници, како и нивната неволност да се вклучат во решавање на вистинските проблеми, како на пример подобрување на квалитетот на образованието. За разлика од другите Универзитети, на УКЛО не постои студентски медиум, ниту во пишана, ниту во електронска форма (освен Универзитетско радио што има само информативен карактер), со што се отежнува комуникацијата со студентите. Претставникот на МОФ укажа на нетранспарентноста и прекршување на процедурите од страна на студентските претставници на УКИМ, и направи споредба со ситуацијата на УКЛО.

На настанот беше прикажан и првиот документарен филм за студентското организирање во Македонија насловен „Студентите за плурализам“.

Трибина за студентско организирање во Штип

На 30 мај 2013 (четврток) со почеток во 13:00 часот, во големата конференциска сала на хотел Оаза – Штип се одржа јавна трибина со наслов „Евтини студентски приказни”. Трибината беше во организација на Младински образовен форум (МОФ) од Скопје во соработка со Фондацијата за развој на лoкaлната заедница (ФРЛЗ) – Штип во рамки на Проектот на УСАИД за граѓанско општество.

Една од главните цели на трибината беше покренување на прашањето за функционалноста на формите на студентско организирање и претставување во Република Македонија, активностите кои ги реализираат студентските претставници и нивната ангажираност во заштитата и афирмирањето на правата и интересите на студентите.

Фокусот на дискусијата беше насочен кон моменталната состојба во студентското организирање на Универзитетот Гоце Делчев (УГД) – Штип, како и за можностите за реформи во системот на студентско претставување. Во својство на панелисти на трибината, на присутните им се обратија Мартин Алексоски – претставник од МОФ, Маријана Ангелова – претставник од ФРЛЗ – Штип, Игор Костов -претставник од ЕХО – локален студентски медиум, а и покрај тоа што го потврди своето присуство на трибината не се појави претставник од Студентскиот парламент на УГД (СПУГД). Во своите излагања панелистите ги споделија своите искуства со студентското организирање, начинот на избор и функционирање на студентските претставници. Беа коментирани наодите од истражувањата на тема студентско организирање и резултатите добиени како продукт на истражувањето. Како проблем се посочи незаинтересираноста на студентите за учество во вонкурикуларни активности, меѓудругото и во работата на СПУГД. Претставникот на ЕХО се осврна на соработката со студентските претставници и нивната заинтересираност за поддршка за студентските медиуми и иницијативи.

Претставникот од МОФ укажа на нетранспарентноста во работата на студентските претставници, особено во поглед на финансиите и начинот на кој се трошат средствата кои можат да бидат многу попродуктивно искористени. Беше дискутирана и легалноста на принудно наплаќање и членување во студентските парламенти, проблем со кој се соочуваат студентите на УГД. Како проблематично во системот на студентско организирање се посочи фактот што матичните парламенти моментално се управувани од В.Д. претседатели, како резултат на неспроведени избори за студентски претставници, кои би го имале легитимитетот да ги претставуваат и одлучуваат во име на студентите на УГД.

Како можни предизвици, понатаму беа дефинирани потребата да се издејствува независност на студентските претставнички тела од факултетската управа и администрација. Претставникот од ФРЛЗ изјави „Сè додека интересот на студентскиот парламент е насочен кон импресијата која ќе ја остави кај ректорската управа, нема да имаме успешно студентско организирање. Наместо таквата поставеност, би било фино малку да се посветат на импресијата која ја оставаат кај студентите, и да ги застапуваат правата и ставовите на истите пред ректорската управа.“

Посебно место во дискусијата зазема и самата публика, која доби можност да ги образложи нејзините ставови, да ги коментира активностите на студентските претставници на УГД – Штип, начинот на работа на матичните парламенти по факултетите, како и да постави прашања во поглед на остварувањето на своите права и реализацијата на студентски иницијативи.

Студентски правобранител како механизам за заштита на правата на студентите, според коментарите на публиката не постои на УГД.

На настанот беше прикажан и првиот документарен филм за студентското организирање во Македонија насловен „Студентите за плурализам“, а настанот го посетија студенти, студентски активисти, како и претставници на локални медиуми.

Трибина „Евтини студентски приказни“ на Медицински факултет – Скопје

Младински образовен форум (МОФ) ве поканува да присуствувате на четвртата по ред трибина со наслов „Евтини студентски приказни“, која ќе се одржи на 13.05.2013 (понеделник) на Медицински факултет – Скопје (амфитеатар 1) во 14:00 часот.

На „Евтини студентски приказни” ќе се дискутира за моменталната состојба во студентското организирање на УКИМ, како и за можностите за унапредување на истото. Како панелисти на трибината ќе говорат Горан Стевановиќ (ЕМСА), Стефан Марковски (Иницијатива за ново младинско/студентско движење) и Огнен Јакасановски (МОФ). Посебно место во дискусијата ќе и се даде и на самата публика, која ќе може да ги образложи нејзините ставови, мислења и искуства на темата.

На настанот ќе биде прикажан и првиот документарен филм за студентското организирање во Македонија насловен „Студентите за плурализам“.

Линк до ФБ настан