Во насока на креирање и анализи на младински и образовни политики, програмата за истражување, анализа и креирање младински и образовни политики, работи да ги доближи образовните политики до стандардите дефинирани во европските документи, а и потребите на пазарот на трудот.
Дел од активностите како дел од програмата целат кон зголемување на транспарентноста и отчетноста на високо образовните институции, подобрување на квалитетот на образованието и условите за студирање, промовирање на студентите, учениците и младите како партнери во процесите на одлучување. Меѓу другото програмата цели и кон изградба на култура на толеранција, ненасилство и меѓуетничка доверба помеѓу младите преку образовниот процес.
Организацијата има изработено мониторинг на работата на Агенцијата за млади и спорт и во 2016/17 направено анализа на спроведување на Националната стратегија за млади и Стратегијата за образование.
Програмата на своите членови им нуди можност да се запознаат со националната регулатива од областа на образование и млади, истовремено компаративно да ја споредат со европските прописи и практики, да соработуваат со релевантните институции од овие области, да искусат како изгледаат процесите на застапување и лобирање во пракса.
Програмата истовремено работи на застапување за подобри политики за млади и во образованието преку учество во работни групи, давање препораки и коментари на документи и учество во креирање на политики и закони, како и спроведување консултации со млади.
МОФ е директно вклучен во процеси што промовираат младинско учество и младински политики. Организацијата даде придонес во креирањето на Законот за високо образование и Законот за младинско учество и младински политики, кој беше усвоен во 2020 година. Преку анализи, истражувања и препораки за јавни политики, МОФ се стреми да го намали просторот помеѓу јавните институции и младите и да ги охрабри да им пристапат доколку се соочуваат со одредени проблеми или имаат предлози и идеи.
